ព័ត៌មាន
៧៥ឆ្នាំទើបជួបម្ដងនេះ! ទីក្រុងឌូបៃ រងគ្រោះព្រោះភ្លៀងធ្លាក់កម្រិតធ្ងន់ធ្ងរ ខណៈជើងហោះហើរ សាលារៀន…ត្រូវបិទ
April 18,2024
៧៥ឆ្នាំទើបជួបម្ដងនេះ! ទីក្រុងឌូបៃ រងគ្រោះព្រោះភ្លៀងធ្លាក់កម្រិតធ្ងន់ធ្ងរ ខណៈជើងហោះហើរ សាលារៀន…ត្រូវបិទយោងតាមរយៈប្រភព CNN នាថ្ងៃទី១៧ ខែមេសា ឆ្នាំ២០២៤ បានបញ្ជាក់ថា នៅទីក្រុងឌូបៃស្ថិតទៅប្រទេសអារ៉ាប់រួម បានកំពុងជួបប្រទះនឹងព្យុះភ្លៀងកម្រិតធ្ងន់ធ្ងរ មិនធ្លាប់មាន ត្រឹមតែរយៈពេល២៤ម៉ោងប៉ុណ្ណោះទឹកភ្លៀងឡើងលើសពី ២៥០ មីលីម៉ែត្រ (ប្រហែល ១០ អ៊ីញ) នេះជាការធ្លាក់ភ្លៀង ទឹកជន់៧៥ឆ្នាំហើយទើបជួបម្ដងនេះបើរាប់ចាប់ផ្តើមនៅឆ្នាំ ១៩៤៩ ។ដោយហេតុថា កម្រិតទឹកភ្លៀងធ្លាក់ គឺកើតមានឡើងខ្លាំង បង្កជាទឹកជន់ លេចផ្លូវជាហេតុធ្វើឱ្យប៉ះពាល់ រហូតដល់ឡានមិនអាចបើកបាន មិនអាចបន្តដំណើរទៅមុខបាន ត្រូវបង្ខំចិត្តទុកឡានចោល សាលារៀនក៏ត្រូវបិទ ជាពិសេស ជើងហោះហើរនៅទីក្រុងឌូបៃដែលជាអាកាសយាន្តដ្ឋានអន្តរជាតិ ធំជាងគេលើពិភពលោកត្រូវបានលុបចោលឬក៏ពន្យាពេលហោះហើរព្រោះមិនអាចហោះបាន។ជាការពិតណាស់ ដោយសារតែការធ្លាក់ភ្លៀង លាយឡំព្យុះយ៉ាងគំហុក និងកម្រិតទឹកភ្លៀងជន់ឡើងយ៉ាងលឿន នៅមិនទាន់បានធូរស្បើយនោះទេទើប ប្រទេសអារ៉ាប់រួមក៏ បានបញ្ជាក់ប្រាប់អ្នកធ្វើដំណើរត្រូវហោះហើរ បើមិនចាំបាច់កុំមកអាកាសយាន្ដដ្ឋាន ព្រោះ ការហោះហើរអាចនឹងត្រូវផ្អាកបណ្ពោះអាសន្ន ឬក៏ពន្យារម៉ោងហោះហើរ។ បន្ថែមលើសពីនេះ ព្យុះភ្លៀងកម្រិតធ្ងន់នេះមិនត្រឹមតែប៉ះពាល់ប្រទេសអារ៉ាប់រួមតែ១នោះទេ តែក៏ប៉ះពាល់ដល់ ប្រទេសអូម៉ង់ ប៉ាគីស្ថាននិង ប្រទេសអ៊ីរ៉ង់ផងដែរ។បើតាមការឱ្យដឹងនៅក្នុងប្រទេសអូម៉ង់ យ៉ាងហោចណាស់មនុស្ស ១៨ នាក់បានស្លាប់នៅក្នុងទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំង៕
ចាប់ពីថ្ងៃទី១៨ ដល់ទី២០! អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់វិញហើយ បង្កើនការប្រុងប្រយ័ត្ន
April 18,2024
ចាប់ពីថ្ងៃទី១៨ ដល់ទី២០! អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់វិញហើយ បង្កើនការប្រុងប្រយ័ត្ន យោងតាមរយៈក្រសួងធនធានទឹក និងឧតុនិយម នាថ្ងៃទី១៨ ខែ មេសា ឆ្នាំ ២០២៤នេះ បានឱ្យដឹងថា សម្ពាធទាបគ្របដណ្ដប់មកលើឈូងសមុទ្រថៃ ព្រះរាជាណាចក្រកម្ពុជា ភាគកណ្តាលនៃអាងទន្លេមេគង្គ និងសមុទ្រចិនខាងត្បូង។ ស្ថានភាពបែបនេះនឹងធ្វើឱ្យ៖ ចាប់ពីថ្ងៃទី១៨ ដល់ថ្ងៃទី២០ ខែមេសា ឆ្នាំ២០២៤៖ ១. តំបន់វាលទំនាប ៖ -សីតុណ្ហភាពអប្បបរមា២៥°C និងសីតុណ្ហភាពអតិបរមា៣៧°C។ ខ្យល់បក់មកពីទិសអាគ្នេយ៍ និងទិសនិរតី មានល្បឿនមធ្យម២,៥ម៉ែត្រ/វិនាទី។ តំបន់ភាគពាយ័ព្យ និងអាគ្នេយ៍អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្ដប់លើផ្ទៃដី១០%។២.តំបន់ខ្ពង់រាប ៖ -សីតុណ្ហភាពអប្បបរមា២៦°C និងសីតុណ្ហភាពអតិបរមា៣៨°C។ ខ្យល់បក់មកពីទិសបស្ចិម និងទិសនិរតី មានល្បឿនមធ្យម៣,៥ម៉ែត្រ/វិនាទី។ តំបន់ភាគឦសានអាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្ដប់លើផ្ទៃដី៥%។៣.តំបន់មាត់សមុទ្រ ៖-សីតុណ្ហភាពអប្បបរមា២៥°C និងសីតុណ្ហភាពអតិបរមា៣៦°C។ ខ្យល់បក់មកពីទិសនិរតីមានល្បឿន មធ្យម២,៥ម៉ែត្រ/វិនាទី។ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្ដប់លើផ្ទៃដី៥%។-រលកសមុទ្រមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,៥០ម៉ែត្រ៕
ចំនួនអ្នកស្លាប់ ព្រោះគ្រោះថ្នាក់ចរាចរណ៍ទូទាំងប្រទេស នៅអំឡុងពិធីបុណ្យចូលឆ្នាំរយៈពេល៤ថ្ងៃ
April 17,2024
យោងតាមរយៈរបាយការណ៍របស់អគ្គស្នងការដ្ឋាននគរបាលជាតិនិង ការចុះផ្សាយរបស់ក្រសួងពត៌មាន នាថ្ងៃទី១៧ ខែ មេសា ឆ្នាំ ២០២៤ បានឱ្យដឹងថា ក្នុងឱកាសពិធីបុណ្យចូលឆ្នាំខ្មែរ រយៈពេល៤ថ្ងៃ រាប់ចាប់ពីថ្ងៃទី១៣ ដល់ទី១៦ខែ មេសា ឆ្នាំ២០២៤ គឺមានមនុស្សសរុបចំនួន ៣៧នាក់បានស្លាប់ និង ៨៨នាក់បានរងរបួស ដោយសារករណីគ្រោះថ្នាក់ចរាចរណ៍សរុបចំនួន៦៤ករណីនៅទូទាំងប្រទេស។យោងតាមរបាយការណ៍របស់អគ្គស្នងការដ្ឋាននគរបាលជាតិចំនួនគ្រោះថ្នាក់ចរាចរណ៍តាមថ្ងៃដូចខាងក្រោម៖ -នៅថ្ងៃទី១៣ ខែមេសា ឆ្នាំ២០២៤៖ គឺមាន ករណីគ្រោះថ្នាក់ចរាចរណ៍កើតឡើងមានចំនួនសរុប១៧លើក(បណ្តាលឱ្យមនុស្សស្លាប់ចំនួន១១នាក់ស្រី០៧នាក់ រងរបួសសរុប២២នាក់។-នៅថ្ងៃទី១៤ ខែមេសា៖ គឺកើតមានករណីគ្រោះថ្នាក់ចរាចរណ៍មានចំនួនសរុប១៧លើក មនុស្សស្លាប់៨ និងរបួស២៨នាក់។-នៅថ្ងៃទី១៥ ខែមេសា ៖ គឺមានករណីគ្រោះថ្នាក់ចរាចរណ៍មានចំនួនសរុប១៨លើក មនុស្សស្លាប់១១នាក់ រងរបួសសរុប២៤នាក់។-នៅថ្ងៃទី១៦ ខែមេសា ៖ គឺមានករណីគ្រោះថ្នាក់ចរាចរណ៍មានចំនួនសរុប ១២លើក បណ្ដាលឱ្យមនុស្សស្លាប់ចំនួន០៧នាក់ និងរងរបួសចំនួន១៤នាក់។គូសបញ្ជាក់ឱ្យដឹងថា បើប្រៀបធៀបនឹងចំនួនករណីគ្រោះថ្នាក់ចរាចរណ៍ក្នុងឱកាសពិធីបុណ្យចូលឆ្នាំប្រពៃណីជាតិក្នុងឆ្នាំ២០២៣ដែលមានរយៈពេល៣ថ្ងៃ ពីថ្ងៃទី១៤-១៦ ខែមេសា សង្កេតឃើញថា ក្នុងឆ្នាំ២០២៤នេះ ករណីគ្រោះថ្នាក់ចរាចរណ៍បានកើតឡើងសរុបចំនួន៤៧ករណី គឺកើនឡើងចំនួន២ករណីដែលបណ្តាលឱ្យមនុស្សស្លាប់សរុបចំនួន២៥នាក់ គឺកើនឡើងចំនួន១នាក់ និងរងរបួសធ្ងន់ស្រាលសរុបចំនួន៦៦នាក់ គឺថយចុះចំនួន២៦នាក់៕ប្រភព៖ អគ្គស្នងការដ្ឋាននគរបាលជាតិនិង និងក្រសួងពត៌មាន
ខេត្តលេខ១ មានទេសចរចូលរួមច្រើនជាងគេបង្អស់ នៅអំឡុងពិធីបុណ្យចូលឆ្នាំ៣ថ្ងៃ
April 17,2024
យោងតាមរយៈក្រសួងពត៌មាន ចុះផ្សាយនាថ្ងៃទី១៧ ខែមេសាឆ្នាំ ២០២៤បានបង្ហាញពី របាយការណ៍ស្ថិតិទេសចរណ៍ ពិធីបុណ្យចូលឆ្នាំថ្មីប្រពៃណីជាតិ រយៈពេល០៣ថ្ងៃ ត្រូវនឹងថ្ងៃទី១៣-១៥ ខែមេសា ឆ្នាំ២០២៤ ទេសចរជាតិ ទេសចរបរទេស ចូលរួមច្រើន ខណៈខេត្តមួយនេះមានចំនួនទេសចរច្រើនជាងគេ។ចំពោះ រាជធានី ខេត្ត ដែលទទួលបានទេសចរច្រើនជាងគេទាំង៥ រួមមាន៖ ១. កំពង់ចាម- ទេសចរជាតិ ប្រមាណ ៣.៤៣១.២២៤ នាក់- ទេសចរបរទេស ប្រមាណ ៣៥៦ នាក់២. កំពង់ស្ពឺ- ទេសចរជាតិ ប្រមាណ ១.២៣៣.២៩៥ នាក់- ទេសចរបរទេស ប្រមាណ ១.២៤៣ នាក់៣. បាត់ដំបង- ទេសចរជាតិ ប្រមាណ ១.០៧១.៥៥៥ នាក់- ទេសចរបរទេស ប្រមាណ ១.៦៤១ នាក់៤. ព្រៃវែង- ទេសចរជាតិ ប្រមាណ ១.០១៤.៦០៦ នាក់- ទេសចរបរទេស ប្រមាណ ៣៣ នាក់៥. សៀមរាប- ទេសចរជាតិ ប្រមាណ ៩៤៣.០០០ នាក់- ទេសចរបរទេស ប្រមាណ ១២.៩៩១ជាចុងក្រោយ ទាំងភ្ញៀវទេសចរជាតិ និងបរទេស ចូលរួមក្នុងពិធីបុណ្យចូលឆ្នាំប្រពៃណីខ្មែរចាប់ពី១៣-១៥ ខែមេសា ឆ្នាំ២០២៤ មានចំនួន ប្រមាណ ១៣.២៧៧.៥៥៦ នាក់ និង ទេសចរបរទេស ប្រមាណ ៨១.៧៤៥ នាក់។ ខណៈខេត្តកំពង់ចាម ជាខេត្តជាប់លំដាប់ថ្នាក់លេខ១ មានទេសចរចូលរួមច្រើនជាងគេបង្អស់៕
ដំណឹងល្អៗ ក្រុមហ៊ុនតេលេក្រាម បើកឱ្យរកលុយបានហើយ ឱ្យតែគ្រប់លក្ខខណ្ឌទាំងនេះ
April 10,2024
បងប្អូនមានដឹងអត់ ថាឥឡូវនេះ Telegram គឺបើកឱ្យរកលុយបានហើយ ក៏ប៉ុន្ដែតម្រូវឱ្យ Telegramរបស់បងប្អូនមានគ្រប់លក្ខខណ្ឌដែលក្រុមហ៊ុនបានកំណត់ លក្ខខណ្ឌទាំងនោះមានដូចខាងក្រោម។យោងតាមការចេញផ្សាយរបស់ Telegram.org កាលពីពេលថ្មីៗកន្លងទៅនេះបានឱ្យដឹងថា ក្រោយពីរៀបចំមុខងាររួចរាល់ពេលនេះ អ្នកប្រើប្រាស់ Telegram អាចធ្វើការរកលុយបាន ប៉ុន្តែដើម្បីអាចបើករកលុយបាន លុះត្រាតែ Channel Telegram នោះមានអ្នក Subscribers ចាប់ពី ១ពាន់នាក់ឡើងទៅទើបអាចរកចំណូលបាន ។ប្រភពដដែលបានបញ្ជាក់ថា មធ្យោបាយនៅក្នុងការរកលុយនេះគឺពឹងផ្អែកទៅលើពាណិជ្ជកម្ម ដែលមានន័យថានៅពេលដែល Channel Telegram របស់យើងមានអ្នកតាមដានចាប់ពី១ពាន់នាក់ឡើង តេឡេក្រាមនឹងធ្វើការផ្សាយពាណិជ្ជកម្មនៅក្នុងនោះហើយចំណូលដែលបានពីការផ្សព្វផ្សាយពាណិជ្ជកម្មនឹងបានទៅដល់ម្ចាស់ Channel ម្នាក់ពាក់កណ្តាល។ដោយឡែកសម្រាប់ចំណូលដែលរកបាន Telegram នឹងធ្វើការទូទាត់ទៅម្ចាស់ Channel តាមរយៈ Toncoins ដែលជារូបិយប័ណ្ណគ្រីបតូដែលដំណើរការដោយ TON Blockchain ។ មូលហេតុដែល Telegram មិនប្រើមធ្យោបាយទូទាត់តាមធនាគារដោយហេតុថា ការទូទាត់តាម Toncoins សេវាទូទាត់រហ័សនិងសេវាទូទាត់ទាបជាងសេវាធនាគារ។គួរបញ្ជាក់ផងដែរថា សម្រាប់ការបើកឱ្យរកលុយនេះគឺខាង Telegram មិនទាន់មានបញ្ជាក់ពីមធ្យោបាយតភ្ជាប់ណាមួយដើម្បីអាចចូលទៅរកលុយបាននោះទេ Telegram គ្រាន់តែបង្ហាញពីការបើកឱ្យរកលុយប៉ុណ្ណោះ ដោយឡែកសម្រាប់របៀបក្នុងការបើករកលុយយ៉ាងណានោះ Telegram នឹងធ្វើការបញ្ជាក់នៅពេលក្រោយបន្តទៀត៕
ក្រសួងការងារបានចេញវិធានការអនុវត្តបន្ទាន់តាមរោងចក្រក្នុងអំឡុងពេលអាកាសធាតុក្តៅ
April 09,2024
ពេលសព្វថ្ងៃនេះអាកាសធាតុមានការក្តៅខ្លាំង ដូច្នេះហើយបានជាក្រសួងការងារ និងបណ្តុះបណ្តាលវិជ្ជាជីវៈបានសេចក្តីប្រកាសថា ដោយអាកាសធាតុនារដូវប្រាំងនេះកើនកម្ដៅ ក្រសួងការងារ និងបណ្តុះបណ្តាលវិជ្ជាជីវៈ សូមណែនាំ ដល់ម្ចាស់ ឬនាយករោងចក្រទាំងអស់ យកចិត្តទុកដាក់អនុវត្តនូវវិធានការបន្ទាន់ ដូចខាងក្រោម៖១. ត្រូវបើកទ្វារ បង្អួចទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញ ក្នុងអគារធ្វើការ។២. ត្រូវបង្កើនការផ្គត់ផ្គង់ទឹកស្អាតសម្រាប់ពិសាដល់កម្មករនិយោជិត និងណែនាំឱ្យពិសាទឹកឱ្យ បានច្រើន និងញឹកញាប់ យ៉ាងតិច ២លីត្រក្នុងមួយថ្ងៃ ទោះបីមិនស្រេកទឹកក៏ដោយ។ ៣. ត្រូវបាញ់ទឹកនៅលើដំបូលអគារធ្វើការឱ្យបានយ៉ាងតិច ២ដងក្នុងមួយថ្ងៃ និងត្រូវចាត់វិធានការ ចាំបាច់ផ្សេងៗទៀត ដើម្បីកាត់បន្ថយកម្ដៅជាបន្ទាន់។៤. ត្រូវពិនិត្យប្រព័ន្ធបញ្ចេញបញ្ចូលខ្យល់ទាំងអស់នៅតាមអគារធ្វើការ ដើម្បីធានាថាដំណើរការល្អ និងត្រូវបើកឱ្យដំណើរការយ៉ាងតិច ១ម៉ោង មុនឱ្យកម្មករនិយោជិតចូលធ្វើការ។ ៥. ត្រូវចាត់បុគ្គលិកទទួលបន្ទុក ត្រួតពិនិត្យឧបករណ៍វាស់ស្ទង់កម្ដៅជាប្រចាំ នៅកន្លែងធ្វើការ។ ក្រសួងការងារ និងបណ្តុះបណ្តាលវិជ្ជាជីវៈ សង្ឃឹមយ៉ាងមុតមាំថា ម្ចាស់ ឬនាយករោងចក្រទាំងអស់ នឹង ចូលរួមអនុវត្តតាមសេចក្តីណែនាំនេះឱ្យបានម៉ឺងម៉ាត់ប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់៕អត្ថបទដោយ៖ ទ្រ សុភាព
