ខ្លាញ់ក្បាលពោះជាខ្លាញ់ដែលស្ថិតនៅជ្រៅក្នុងពោះយើង ហើយមានសរីរាង្គនៅជុំវិញវាដូចជា ថ្លើម លំពែង ពោះវៀន និងក្រពះ។ ចំពោះខ្លាញ់នេះកាន់តែកកកុញច្រើននាំឱ្យមានការរលាករ៉ាំរ៉ៃ និងហានិភ័យកើនជំងឺផ្សេងៗ ដូចជាបញ្ហាធាត់ មានទឹកនោមផ្អែម និងបញ្ហាលើសឈាម។ ៣ទម្លាប់ប្រចាំថ្ងៃនេះជាការប្រមូលផ្តុំខ្លាញ់ក្បាលពោះលឿន។
១. ភេសជ្ជៈមានជាតិផ្អែមលើសកម្រិត៖ យោងតាម Eating Well បានបញ្ជាក់ថា ការផឹកភេសជ្ជៈមានជាតិស្ករលើសកម្រិតមិនថាកាហ្វេ និងភេសជ្ជៈផ្សេងៗ នោះទេ វាជាការប្រមូលផ្តុំជាតិខ្លាញ់ក្នុងពោះដោយសារកើនកាឡូរី។ បើអ្នកមិនត្រូវបានប្រើប្រាស់ជាតិខ្លាញ់នេះអស់ទេ បញ្ហាដំបូងគឺក្បាលពោះរបស់អ្នកកាន់តែធំ។ អ្នកធាត់ភាគច្រើនមកពីទម្លាប់ផឹកភេសជ្ជៈផ្អែម និងនំផ្អែមនេះឯង។
២. អង្គុយច្រើនម៉ោងជាប់ៗ គ្នា៖ ការអង្គុយយូរម៉ោងជាប់ៗ គ្នាធ្វើឱ្យរាងកាយចំណាយថាមពលតិចតួច តែស្រ្តេសច្រើន ហើយបរិមាណកាឡូរីដែលអ្នកហូបពីអាហារមានការរំលាយតិច ធ្វើឱ្យរាងកាយអ្នកសល់ខ្លាញ់ច្រើន។ លើសពីនេះ ការអង្គុយយូរនេះនាំបញ្ហាដល់សាច់ដុំ ការរំលាយអាហារ និងកើនជាតិខ្លាញ់។ ទម្លាប់បែបនេះ ធ្វើឱ្យមានការភាពប្រែប្រួលអាំងស៊ុយលីនថយចុះ ចំណែករាងកាយកាន់តែផ្ទុកជាតិខ្លាញ់កាន់តែច្រើនឡើង។
៣. ការញ៉ាំអាហារកែច្នៃជាអាហារសម្រន់៖ ការហូបនំខេក សាច់ក្រក ដំឡូងបំពង និងមីកញ្ចប់ច្រើនដែលមានផ្ទុកជាតិស្ករ ជាតិខ្លាញ់ឆ្អែត និងអំបិលច្រើន ព្រមទាំងជាតិសរសៃ និងប្រូតេអ៊ីនទាប ជាបញ្ហានាំឱ្យឡើងទម្ងន់ និងបញ្ហាមេតាប៉ូលីសនៃជាតិខ្លាញ់ និងជាតិស្ករក្នុងរាងកាយកើនឆាប់ណាស់។ យូរៗទៅ ជាតិខ្លាញ់ក៏ប្រមូលផ្តុំនៅជុំវិញថ្លើម និងលំពែងនាំឱ្យក្បាលពោះអ្នកធំ ហើយក៏មានហានិភ័យជំងឺទឹកនោមផ្អែម និងជំងឺសរសៃឈាមបេះដូងថែមទៀត នេះបើយោងគេហទំព័រTimes of India៕ អត្ថបទដោយ៖ ទ្រ សុភាព