អ្នកធាត់ភាគច្រើនមានអារម្មណ៍ខ្លាច ហូបអាហារនេះ ឬអាហារនោះ គិតថាវាកាន់តែឡើងគីឡូ។ ដើម្បីងាយស្រួល ស្រកគីឡូ ស្រកក្បាលពោះនោះ គ្រាន់តែអ្នកហូបគ្រាប់ធញ្ញជាតិទាំង ៣នេះជួយដុតខ្លាញ់មានប្រសិទ្ធភាព។ តើគ្រាប់ធញ្ញជាតិ ៣មុខនេះមានអ្វីខ្លះ?
១.គ្រាប់កៅឡាក់៖ វាមានកាឡូរីតិចជាងគ្រាប់ធញ្ញជាតិដទៃទៀត មានផ្ទុកដោយជាតិសរសៃច្រើនជាតិនេះ ជាតិខ្លាញ់ទាប វាល្អសម្រាប់សុខភាពអ្នកដើម្បីកម្ចាត់ជាតិខ្លាញ់ក្បាលពោះល្អ មិនធ្វើឱ្យអ្នកឆាប់ឃ្លានអាហារថែមទៀត។ មួយវិញទៀត គ្រាប់កៅឡាក់នេះក៏មានប្រយោជន៍ជួយដល់សុខភាពរបស់បេះដូង រួមទាំងជួយកាត់បន្ថយជាតិស្ករក្នុងឈាមយ៉ាងអស្ចារ្យផងដែរ។
២. គ្រាប់អាល់ម៉ុន៖ អ្នកចូលញ៉ាំគ្រាប់អាល់ម៉ុនភាគច្រើនជួយសម្រកគីឡូ កម្ចាត់ខ្លាញ់ក្បាលពោះបានលឿន។ ព្រោះគ្រាប់ធញ្ញជាតិនេះវាសម្បូរទៅដោយខ្លាញ់ល្អ មានជាតិសរសៃ មានជាតិប្រូតេអ៊ីន មានជាតិកាល់ស្យូម និងវីតាមីនE ដើម្បីជួយរំលាយខ្លាញ់ក្បាលពោះបានលឿន។ បើយោងតាមគេហទំព័រ California Almonds បានបញ្ជាក់ថា ការញ៉ាំគ្រាប់អាល់ម៉ុនពី ២០ ទៅ ២៣ គ្រាប់ក្នុងមួយថ្ងៃជាបរិមាណល្អសម្រាប់រាងកាយ ដើម្បីដុតខ្លាញ់ក្នុងរាងកា។ ការញ៉ាំគ្រាប់អាល់ម៉ុន ពិតជាជួយបញ្ចុះសម្ពាធឈាម បញ្ចុះកូឡេស្ដេរ៉ូល និងកាត់បន្ថយកម្រិតជាតិស្ករក្នុងរាងកាយយ៉ាងល្អ។
៣. គ្រាប់ស្វាយចន្ទី៖ ការញ៉ាំគ្រាប់ស្វាយចន្ទីជាប្រចាំត្រូវបានគេសិក្សារកឃើញថា វាមានឥទ្ធិពលដល់ការកាត់បន្ថយហានិភ័យនៃជំងឺមហារីកទាក់ទងនឹងប្រព័ន្ធរំលាយអាហារមួយចំនួនដូចជាថ្លើម ពោះវៀនធំ និងជាតិខ្លាញ់ក្បាលពោះជាដើម។ ព្រោះនៅក្នុងគ្រាប់ស្វាយចន្ទីមានសារធាតុពិសេសម៉្យាងប្រឆាំងនឹងម៉ូលេគុលសេរីទាំងនេះ អាចជួយកាត់បន្ថយហានិភ័យនៃការវិវឌ្ឍន៍របស់កោសិកាមហារីកទាំងឡាយ ជាពិសេសប្រព័ន្ធរំលាយអាហារ។ យោងតាមមូលដ្ឋានទិន្នន័យ FoodData Central នៃក្រសួងកសិកម្មសហរដ្ឋអាមេរិកថា គ្រាប់ស្វាចន្ទីសម្បូរដោយជាតិសរសៃ ជាតិខ្លាញ់ទាប ដែលល្អសម្រាប់អ្នកមានបំណង់ចង់សម្រកទម្ងន់ក្បាលពោះមានប្រសិទ្ធភាពបំផុត៕ អត្ថបទដោយ៖ ទ្រ សុភាព