ព័ត៌មាន
ប្រធានាធិបតីប្រេស៊ីលធ្វើតេស្តវិជ្ជមានកូវីដ១៩ ខណៈប្រស៊ីលឡើងទៅលំដាប់លេខ ២ ដែលមានករណីឆ្លងនិងស្លាប់ខ្ពស់បំផុត
ប្រធានាធិបតីប្រេស៊ីល លោក Jair Bolsonaro បានប្រកាសដោយខ្លួនឯងផ្ទាល់ពីលទ្ធផលធ្វើតេស្តវិជ្ជមានកូវីដ១៩ របស់គាត់តាមបណ្តាញទូរទស្សន៍ប្រេស៊ីល កាលពីថ្ងៃអង្គារ នេះបើតាមសេចក្តីរាយការណ៍របស់ភ្នាក់ងារកាសែត CNN នារាត្រីថ្ងៃពុធនេះ។លោក Bolsonaro មានប្រសាសន៍ថា៖ “កាលពីថ្ងៃអាទិត្យ ខ្ញុំមានអារម្មណ៍ថាមិនសូវស្រួលខ្លួន”។ “នៅថ្ងៃច័ន្ទ អាការៈនោះកាន់តែអាក្រក់ទៅ ៗ ហើយខ្ញុំចាប់ផ្តើមអស់កម្លាំងនិងឈឺសាច់ដុំ”។ “ខ្ញុំក៏មានអាការៈក្តៅខ្លួន ៣៨ អង្សាសេផងដែរ”។ “ដោយសាររោគសញ្ញាទាំងនោះគ្រូពេទ្យបាននិយាយថាមានការសង្ស័យថាឆ្លងកូវីដ១៩”។ បន្ទាប់មកលោក Bolsonaro បានទៅមន្ទីរពេទ្យដើម្បីស្កេនសួត ហើយភរិយារបស់គាត់ លោកស្រី First Lady Michelle Bolsonaro ក៏ធ្វើតេស្តដែរ។សូមជម្រាបថា កាលពីថ្ងៃច័ន្ទ លោក Bolsonaro បានធ្វើតេស្តរកវីរុសកូរ៉ូណាបន្ទាប់ពីត្រូវបានគេរាយការណ៍ពីការលេចចេញរោគសញ្ញាកូវីដ១៩ ក្រោយពីលេចធ្លាយរូបថតលោកស្និតស្នាលក្នុងកំឡុងញ៉ាំអាហារជាមួយឯកអគ្គរដ្ឋទូតអាមេរិកក្នុងឪកាសថ្ងៃឈប់សម្រាក កាលពីថ្ងៃសៅរ៍ ទី៤ ខែកក្កដា និងមិនមានពាក់ម៉ាស។ ហើយកាលពីថ្ងៃអង្គារម្សិលមិញ New York Times បានចុះផ្សាយថា លោក Bolsonaro បានធានាដល់អ្នកគាំទ្រកាលពីថ្ងៃច័ន្ទថា “លទ្ធផលស្កេនបង្ហាញថាសួតរបស់គាត់គឺស្អាត”។ នៅក្នុងបទសម្ភាសន៍មួយជាមួយទូរទស្សន៍ CNN Brasil បន្ទាប់ពីការធ្វើរោគវិនិច្ឆ័យ លោក Bolsonaro បានព្រមទទួលស្គាល់ហើយពីគ្រោះថ្នាក់ធ្ងន់ធ្ងរដែលបង្កឡើងដោយវីរុសកូរ៉ូណា ដែលគាត់ធ្លាប់តែច្រានចោលជារឿយៗ និងថាវាគ្រាន់តែជាជំងឺផ្តាសាយធម្មតាប៉ុណ្ណោះ។ លើសពីនេះ លោកបានបញ្ជាក់ថា "ខ្ញុំនឹងមិនជួបអ្នកណាម្នាក់ក្នុងកិច្ចប្រជុំទេ”។ “អ្វីគ្រប់យ៉ាងនឹងធ្វើឡើងតាមសន្និសិទវីដេអូ ហើយខ្ញុំនឹងមិនជួបអ្នកណាទេ"។ផងដែរ ក្រោយពីឆ្លងកូវីដ១៩ ខ្លួនឯងមក លោក Bolsonaro បាននិយាយកាលពីថ្ងៃអង្គារថា "ខ្ញុំសារភាពថា ខ្ញុំគិតថាខ្ញុំឆ្លងវាមុននេះដោយពិចារណាលើសកម្មភាពរបស់ខ្ញុំចំពោះមុខប្រជាជន"។ “ហើយខ្ញុំអាចប្រាប់បន្ថែមទៀតថា ខ្ញុំជាប្រធានាធិបតី ហើយខ្ញុំនឹងនៅជួរមុខ ខ្ញុំនឹងមិនរត់ចេញពីការទទួលខុសត្រូវរបស់ខ្ញុំទេ ហើយខ្ញុំក៏មិននៅឆ្ងាយពីប្រជាជនខ្ញុំដែរ”។គួរបញ្ជាក់ថា គិតត្រឹមរសៀលម៉ោង ៤ ថ្ងៃពុធ ទី០៨ខែកក្កដា ឆ្នាំ២០២០ យោងតាមតួរលេខនៃទិន្នន័យកូវីដ១៩ របស់ Worldometers ប្រទេសប្រេស៊ីលវ៉ាដាច់រ៉ុស្ស៊ីឡើងទៅលំដាប់ខ្ពស់បំផុតទី ២ ទូទាំងពិភពលោក បន្ទាប់ពីសហរដ្ឋអាមេរិក ដែលមានចំនួនករណីឆ្លងសរុប ១,៦៧៤,៦៥៥ ករណី ស្លាប់ ៦៦,៨៦៨ ករណី ខណៈចំនួនករណីឆ្លងសរុបទូទាំងពិភពលោក ១១,៩៦៥,៩៣៨ ករណី និងស្លាប់ជាសកលសរុប ៥៤៧,០០២ ករណី បន្ទាប់ពីសហរដ្ឋអាមេរិក។ ធ្លាប់តែអះអាងជាយូរមកហើយថាការចាក់សោរនឹងធ្វើឱ្យសេដ្ឋកិច្ចប្រទេសរងការឈឺចាប់ច្រើនជាងដោយវីរុស លោក Bolsonaro ក្នុងសុន្ទរកថាមួយដែលចាក់ផ្សាយលើកញ្ចក់ទូរទស្សន៍និងវិទ្យុជាតិ បានផ្លាស់ប្តូរគំនិតហើយបាននិយាយថា៖ "សង្គ្រោះជីវិតមនុស្សមុន នោះយើងនឹងអាចសង្គ្រោះអ្វីផ្សេងៗទៀតបាន"។ ហើយលោកបានប្តេជ្ញាថា “គ្មាននរណាម្នាក់បាត់បង់ជីវិតឡើយ ព្រោះក្នុងករណីស្លាប់ភាគច្រើនដោយសារតែកង្វះគ្រែ ICU ឬម៉ាស៊ីនខ្យល់”។ បន្ទាប់ពីការធ្វើរោគវិនិច្ឆ័យរបស់គាត់កាលពីថ្ងៃអង្គារលោក Bolsonaro បានសង្កត់ធ្ងន់ថាអភិបាលក្រុងនិងអភិបាលខេត្តត្រូវទទួលខុសត្រូវចំពោះការដោះស្រាយជំងឺរាតត្បាតនេះ។ លោកបានប្រាប់ CNN Brasil ថា“ ប្រសិនបើវាដំណើរការល្អ ឬដំណើរការមិនល្អ វាជាទំនួលខុសត្រូវរបស់អភិបាលខេត្តនិងអភិបាលក្រុង យោងតាមសេចក្តីសំរេចរបស់តុលាការកំពូល។កាលពីថ្ងៃអង្គារ អង្គការសុខភាពពិភពលោកបានជូនពរឱ្យ Bolsonaro មានការងើបឡើងវិញយ៉ាងឆាប់រហ័ស។ លោក Tedros Adhanom Ghebreyesus អគ្គនាយកអង្គការសុខភាពពិភពលោកបានថ្លែងនៅក្នុងសន្និសីទសារព័ត៌មានមួយនៅទីក្រុងហ្សឺណែវថា “ វាមានសារៈសំខាន់ខ្លាំងណាស់ក្នុងការស្វែងយល់ពីភាពធ្ងន់ធ្ងរនៃវីរុសរាតត្បាត”។ “គ្មានប្រទេសណាដែលមានភាពស៊ាំ ហើយគ្មានប្រទេសណាដែលមានសុវត្ថិភាព ហើយគ្មានបុគ្គលណាម្នាក់អាចមានសុវត្ថិភាពបានឡើយ”។ទោះបីជាមានការធ្វើរោគវិនិច្ឆ័យរបស់គាត់ក៏ដោយ ក៏លោក Bolsonaro កាលពីថ្ងៃអង្គារបានសង្កត់ធ្ងន់ថាអាទិភាពរបស់គាត់គឺនៅតែចាប់ផ្តើម “ស្តារសេដ្ឋកិច្ចប្រេស៊ីល” ឡើងវិញ។ លោកមានប្រសាសន៍ថា “ខ្ញុំដឹងថាគ្មាននរណាម្នាក់អាចងើបឡើងវិញពីការស្លាប់នោះទេប៉ុន្តែសេដ្ឋកិច្ចមិនបានដំណើរការនឹងនាំឱ្យមានបុព្វហេតុផ្សេងទៀតនៃការស្លាប់និងការធ្វើអត្តឃាត”។ អត្ថបទដោយ ហៃ សុចិន្តា
រកឃើញករណីកោសិកាម្យ៉ាងស៊ីខួរក្បាលមនុស្សដែលអាចបង្កគ្រោះថ្នាក់ដល់ជីវិត
នាយកដ្ឋានសុខាភិបាលរដ្ឋ Florida បានរាយការណ៍ពីករណីកោសិកានៃសារពាង្គកាយមួយ (Naegleria fowleri) ស៊ីខួរក្បាលត្រូវបានគេរកឃើញនៅក្នុងតំបន់ Tampa រដ្ឋ Florida នេះបើយោងតាមការចុះផ្សាយក្នុងអត្ថបទមួយនៅលើទំព័រហ្វេសប៊ុករបស់ WebMD កាលពីថ្ងៃច័ន្ទនេះ។ ផងដែរ សារព័ត៌មាន CBS ក៏បានរាយការណ៍ថាមនុស្សម្នាក់នៅក្នុងតំបន់ Hillsborough County បានរាយការណ៍ពីករណី Naegleria fowleri ដែលជាកោសិកាមួយដែលវាយប្រហារនិងស៊ីកោសិកាខួរក្បាល ដែលអាចបង្កគ្រោះថ្នាក់ដល់ជីវិត។ យោងតាម CDC Naegleria fowleri ដែលត្រូវបានគេស្គាល់ជាទូទៅថា “អាមីបេបាដែលស៊ីកោសិកាខួរក្បាល (brain-eating amoeba or brain-eating ameba) គឺជាសារពាង្គកាយដែលមានកោសិកាតែមួយគត់ (free-living microscopic ameba (single-celled living organism)) បណ្តាលឱ្យមានការឆ្លងមេរោគដ៏កម្រនិងធ្ងន់ធ្ងរនៃខួរក្បាល ដែលបង្កជំងឺ (PAM) (primary amebic meningoencephalitis)។ Naegleria fowleri មានប្រភពទាក់ទងនៅពេលដែលទឹកកខ្វក់ដូចជាទឹកសាបក្តៅ ទឹកទន្លេនិងប្រភពទឹកក្តៅ អាងហែលទឹកដែលមិនមានជាតិក្លរត្រឹមត្រូវ ទឹកក្នុងម៉ាស៊ីនកម្តៅ ទឹកដែលមានជាតិកខ្វក់ និងនៅក្នុងផើងសំណាបដែលមានជាតិកខ្វក់។ Naegleria fowleri ជាធម្មតាឆ្លងទៅមនុស្សនៅពេលទឹកកខ្វក់ចូលក្នុងខ្លួនតាមរយៈច្រមុះ។ នៅពេលដែល amoeba ចូលទៅក្នុងច្រមុះវាធ្វើដំណើរទៅកាន់ខួរក្បាលដែលវាបណ្តាលអោយមានជំងឺ PAM ដែលជាធម្មតាមានគ្រោះថ្នាក់ដល់ជីវិត។ ជាធម្មតា ការបង្ករោគកើតឡើងនៅពេលមនុស្សទៅហែលទឹក ឬមុជទឹកនៅកន្លែងដែលមានទឹកសាបក្តៅដូចជាបឹងនិងទន្លេ។ មជ្ឈមណ្ឌលគ្រប់គ្រងនិងបង្ការជំងឺ (CDC) បាននិយាយថាជំងឺនេះកម្រកើតមានណាស់ ប៉ុន្តែមានគ្រោះថ្នាក់ដល់អាយុជីវិត។ គិតមកដល់បច្ចុប្បន្ន មានតែមនុស្ស ៤ នាក់ទេក្នុងចំណោម ១៤៥ នាក់នៃអ្នកឆ្លងមេរោគដែលត្រូវបានគេស្គាល់នៅក្នុងសហរដ្ឋអាមេរិកបានរស់រានមានជីវិត នេះបើយោងតាម CDC។អត្ថបទដោយ ហៃ សុចិន្តា
ឥណ្ឌានាំមុខរុស្ស៊ីក្លាយជាប្រទេសមានករណីឆ្លងនិងស្លាប់ដោយកូវីដ១៩ ខ្ពស់បំផុតលំដាប់ទី ៣ ទូទាំងពិភពលោក
ការរាតត្បាតនៃជំងឺឆ្លងកូវីដ១៩ នៅប្រទេសឥណ្ឌាបានក្លាយជាប្រទេសមានករណីឆ្លងនិងស្លាប់ខ្ពស់បំផុតលំដាប់ទី ៣ នៅលើពិភពលោក បន្ទាប់ពីសហរដ្ឋអាមេរិកនិងប្រេស៊ីល ក្រោយឥណ្ឌាបានបន្ធូរបន្ថយនូវវិធានការណ៍ទប់ស្កាត់ការដួលរលំនៃសេដ្ឋកិច្ចដែលបានធ្វើឱ្យមនុស្សរាប់លាននាក់រស់នៅក្រោមបន្ទាត់នៃភាពក្រីក្រ។ ក្រុមអ្នកវិទ្យាសាស្ត្រផ្នែកទិន្នន័យនៅសាកលវិទ្យាល័យ Michigan បានព្យាករណ៍ថាអាចនឹងឈានដល់ ៨០០.០០០ ករណីសម្រាប់ខែនេះ នេះបើយោងតាមសេចក្តីរាយការណ៍របស់កាសែត Bloomberg នាព្រឹកថ្ងៃអង្គារនេះ។ គិតត្រឹមរសៀលម៉ោង ១ ថ្ងៃអង្គារ ទី៧ ខែកក្កដានេះ យោងតាមទិន្នន័យកូវីដ១៩ របស់ Worldometers ឥណ្ឌាមានករណីឆ្លងកូវីដ១៩ សរុប ៧២០,៧០៧ ករណី និងស្លាប់ ២០,១៧៨ ករណី បើធៀបនឹងប្រេស៊ីល លេខ២ មានករណីឆ្លងសរុប ១,៦២៦,០៧១ ករណី និងស្លាប់ ៦៥,៥៥៦ ករណី និងលេខ ១ សហរដ្ឋអាមេរិកដែលមានករណីឆ្លងកូវីដ១៩ សរុប ៣,០៤០,៨៣៣ ករណី និងស្លាប់ ១៣២,៩៧៩។គួរបញ្ជាក់ថា ឥណ្ឌាបានបរាជ័យក្នុងការបង្ក្រាបករណីថ្មី បើទោះបីជាបានអនុវត្តនូវការចាក់សោរនៅចុងខែមីនានិងមានករណីតិចជាង ១.០០០ ករណីក៏ដោយ។ នាយករដ្ឋមន្រ្តី Narendra Modi ត្រូវបានគេបង្ខំឱ្យបន្ធូរបន្ថយវិធានការនៅក្នុងខែមិថុនាដើម្បីជួយសង្គ្រោះសេដ្ឋកិច្ចដែលកំពុងធ្លាក់ចុះយ៉ាងខ្លាំងជាលើកដំបូងក្នុងរយៈពេលជាងបួនទសវត្សរ៍នេះ។ ការផ្លាស់ប្តូរទៅជាចំណុចកណ្តាលនៃការរាតត្បាតនេះ បានធ្វើឱ្យឥណ្ឌាក្លាយជាប្រទេសមួយក្នុងចំណោមប្រទេសដែលរងគ្រោះធ្ងន់ធ្ងរជាងគេខណៈដោយជំងឺរាតត្បាត។ ទាក់ទិននឹងបញ្ហានេះ Abdul Ghafur អ្នកឯកទេសខាងជំងឺឆ្លងនៅទីក្រុង Chennai ភាគខាងត្បូងប្រទេសឥណ្ឌាមានប្រសាសន៍ថា“ ឥណ្ឌាជាប្រទេសដែលមានប្រជាជនច្រើនជាងគេលំដាប់លេខ ២ នៅលើពិភពលោក ដូច្នេះវាមិនគួរឱ្យភ្ញាក់ផ្អើលទេ”។ “បណ្តាប្រទេសនៅអ៊ឺរ៉ុបមានចំនួនប្រជាជនតិច ដូច្នេះពួកគេអាចបិទទ្វារបញ្ឈប់ជំងឺហើយបន្ទាប់មកបើកឡើងវិញ”។ “ម្យ៉ាងវិញទៀត នៅប្រទេសឥណ្ឌា សូម្បីតែនៅក្នុងការចាក់សោក៏ដោយ ក៏វានៅតែបន្តរីករាលដាលដែរ”។សូមជម្រាបថា ការរាតត្បាតនេះបានធ្វើឱ្យប្រទេសឥណ្ឌាដែលមានប្រជាជនចំនួន ១,៣ កោដិនាក់រងសម្ពាធពីហេដ្ឋារចនាសម្ព័ន្ធថែទាំសុខភាពដែលខ្វះខាត គឺជាប់ចំណាត់ថ្នាក់លេខ ១៥៤ ក្នុងចំណោម ១៩៥ ប្រទេសក្នុងការទទួលបានការថែរក្សាសុខភាព និងគុណភាពពិភពលោក តាំងតែពីមុនពេលមានជំងឺឆ្លងមកម្ល៉េះ។ លើសពីនេះ បន្ទាប់ពីបានដណ្តើមកាន់កាប់រដ្ឋធានីញូវដេលីនិងមជ្ឈមណ្ឌលហិរញ្ញវត្ថុទីក្រុងបុមបៃ ឥឡូវនេះមេរោគឆ្លងកំពុងឆ្លងកាត់តំបន់ខ្ពង់រាបដ៏ធំរបស់ប្រទេស ដែលធ្វើឱ្យពលករចំណាកស្រុករាប់លាននាក់ដែលបាត់បង់ប្រាក់ឈ្នួលប្រចាំថ្ងៃរបស់ពួកគេនៅទីក្រុងក្នុងការចាក់សោនេះ ហើយត្រឡប់ទៅភូមិកំណើតវិញ។ ដែលនេះបានបង្កើតផ្លូវថ្មីនៃការបញ្ជូនវីរុសទៅតំបន់ជនបទ ជាកន្លែងវេជ្ជសាស្ត្រកាន់តែមានភាពច្របូកច្របល់និងទន់ខ្សោយ។ លោក Ghafur បានបង្ហាញក្តីបារម្ភអំពីអត្រាមរណភាពរបស់ប្រជាជននិងបាននិយាយថាប្រទេសឥណ្ឌាត្រូវតែព្យាយាមកំណត់អត្តសញ្ញាណអ្នកឈឺឱ្យបានឆាប់និងបង្កើនសមត្ថភាពមន្ទីរពេទ្យ។ ទន្ទឹមនឹងនេះ សូចនាករដំបូងបង្ហាញថាពីកំណើនសេដ្ឋកិច្ចពីការបន្ធូរបន្ថយដំបូងនៃវិធានការបិទទ្វារដែលអនុញ្ញាតឱ្យហាងទាំងអស់បើកឡើងវិញ ហើយចាប់ផ្តើមដំណើរការការធ្វើដំណើរតាមផ្លូវអាកាសក្នុងស្រុកវិញ នេះបើយោងតាមរបាយការណ៍ទី ១ ខែកក្កដារបស់សេដ្ឋវិទូនៅ Bloomberg ។ ប្រភព Bloomberg & Worldometersប្រែសម្រួលដោយ ហៃ សុចិន្តា
ក្លឹបកម្សាន្ត និងខារ៉ាអូខេ(KTV) នៅភ្នំពេញ អនុញ្ញាតឱ្យបើកឡើងវិញ តែត្រូវអនុវត្តចំណុច០២ជាចាំបាច់
យោងតាមសេចក្តីប្រកាសព័ត៌មានរបស់រដ្ឋបាលរាជធានីភ្នំពេញព្រឹកមិញនេះ បានឱ្យដឹងថា កម្ពុជា អនុញ្ញាតឱ្យម្ចាស់អាជីវកម្មក្លឹបកម្សាន្ត និងខារ៉ាអូខេ (KTV) ទាំងអស់ នៅរាជធានីភ្នំពេញ បើកដំណើរការ ដោយប្រែក្លាយទៅជាភោជនីយដ្ឋាន។ការប្រកាសបើកដំណើរការឡើងវិញនេះ ក្នុងគោលបំណង ដើម្បីចូលរួមសកម្មភាពសេដ្ឋកិច្ច និងផ្តល់ការងារឡើងវិញ។ប៉ុន្តែម្ចាស់សហគ្រាសខាងលើ ត្រូវអនុវត្តដូចខាងក្រោម៖1-ស្នើលិខិតអនុញ្ញាតអាជីវកម្ម តាមច្រកចេញចូលតែមួយ រាជធានីភ្នំពេញ2-គោរពយ៉ាងម៉ឺងម៉ាត់នូវគោលការណ៍ក្រសួងសុខាភិបាល ក្នុងការទប់ស្កាត់ការនៃការរីករាលដាលនៃជំងឺកូវីដ១៩ និងវិធានសុវត្ថិភាពក្រសួងទេសចរណ៍។លម្អិតសេចក្តីប្រកាសព័ត៌មាន៖
ប្រធានាធិបតីប្រេស៊ីល Jair Bolsonaro ធ្វើតេស្តកូវីដ១៩ ថ្មីម្តងទៀត
លោកប្រធានាធិបតី Jair Bolsonaro នៃប្រទេសប្រេស៊ីលកាលពីយប់ថ្ងៃច័ន្ទបានទៅមន្ទីរពេទ្យដើម្បីធ្វើការពិនិត្យសួតនិងធ្វើតេស្តរកវីរុសកូរ៉ូណាថ្មីម្តងទៀត បន្ទាប់ពីមានការរាយការណ៍ព័ត៌មានថាលោកមានរោគសញ្ញាកូវីដ១៩ ក្រោយចូលរួមអាហារថ្ងៃត្រង់ថ្ងៃសៅរ៍ជាមួយឯកអគ្គរដ្ឋទូតអាមេរិកនៅប្រេស៊ីលដើម្បីអបអរទិវាឯករាជ្យជាតិរបស់អាមេរិកដោយមិនមានពាក់ម៉ាស នេះបើយោងតាមការចុះផ្សាយរបស់កាសែត New York Times នាព្រឹកថ្ងៃអង្គារនេះ។ សូមជម្រាបថា ជំនួយការរបស់លោក Bolsonaro មួយចំនួនបានធ្វើតេស្តិ៍វិជ្ជមានវីរុសក្នុងប៉ុន្មានខែថ្មីៗនេះ។ ផងដែរ មន្ត្រីជាន់ខ្ពស់ជាច្រើននាក់នៅក្នុងរដ្ឋបាល Bolsonaro បានធ្វើតេស្ត៍វិជ្ជមានវីរុស បន្ទាប់ពីវិលត្រឡប់ពីការធ្វើដំណើរទៅកាន់រដ្ឋផ្លរីដាកាលពីដើមខែមីនាជាកន្លែងដែលលោក Bolsonaro បានណាត់ជួបជាមួយលោកប្រធានាធិបតី Trump នៅ Mar-a-Lago។ ចាប់តាំងពីពេលនោះមកលោក Bolsonaro បានធ្វើតេស្តរកវីរុសជាច្រើនដង ហើយបានអះអាងថាលទ្ធផលតេស្តគឺអវិជ្ជមានទាំងអស់។ ក្នុងសេចក្តីថ្លែងការណ៍មួយកាលពីថ្ងៃច័ន្ទ លោក Bolsonaro បានប្រាប់ក្រុមអ្នកគាំទ្រថា “ការស្កេនសួតរបស់គាត់ស្អាត ហើយអ្វីៗគឺមិនអីទេ”។ យ៉ាងណាក៏ដោយ គាត់បានលើកឡើងថាការឆ្លងវីរុសនឹងមិនបង្កការគំរាមកំហែងធ្ងន់ធ្ងរទេពីព្រោះគាត់មាន“ ប្រវត្តិរបស់អត្តពលិក”។ទន្ទឹមគ្នានេះដែរ ទូរទស្សន៍ CNN ក៏បានរាយការណ៍ថាលោក Bolsonaro អាយុ ៦៥ ឆ្នាំមានគ្រុនក្តៅលើសពី ១០០ អង្សារហើយបានចាប់ផ្តើមលេប hydroxychloroquine ដែលជាថ្នាំប្រឆាំងនឹងជំងឺគ្រុនចាញ់ដែលលោកបានផ្សព្វផ្សាយថាមានប្រសិទ្ធភាពក្នុងការព្យាបាលវីរុសនេះ។ ចំណែកឯខាងស្ថានទូតអាមេរិកវិញ កាលពីយប់ថ្ងៃច័ន្ទក៏បានបង្ហាញការព្រួយបារម្ភថាឯកអគ្គរដ្ឋទូតអាមេរិកអាចនឹងប្រឈមនឹងវីរុសនេះ បើទោះបីជាលោក Chapman មិនមានរោគសញ្ញាអ្វី ប៉ុន្តែលោកចង់ធ្វើតេស្តនិងមានការប្រុងប្រយ័ត្នខ្ពស់។គួរបញ្ជាក់ថា លោក Bolsonaro បានរងការរិះគន់ខ្លាំងៗចំពោះការគ្រប់គ្រងរបស់គាត់លើការរាតត្បាតនៃជំងឺរាតត្បាតសូម្បីតែចំនួនអ្នកផ្ទុកមេរោគនិងចំនួនអ្នកស្លាប់នៅប្រទេសប្រេស៊ីលបានកើនឡើងខ្លាំងនៅក្នុងប៉ុន្មានខែថ្មីៗនេះ។ ករណីប្រទេសប្រេស៊ីលជាង ១,៦ លានករណីនិងមនុស្សស្លាប់ជាង ៦៥.០០០ នាក់ធ្វើឱ្យប្រទេសនេះក្លាយជាប្រទេសដែលរងគ្រោះខ្លាំងជាងគេទី ២ ដោយសារជំងឺរាតត្បាត បន្ទាប់ពីសហរដ្ឋអាមេរិក។ ទោះជាយ៉ាងនេះក្តី លោក Bolsonaro បានហៅការដាក់ឱ្យនៅឆ្ងាយពីសង្គមថាជាការធ្វើឱ្យខូចខាតដល់សេដ្ឋកិច្ច ហើយគាត់តែងតែចេញមុខជាសាធារណៈដោយមិនពាក់ម៉ាស់។ ចៅក្រមនៃតុលាកំពូលរបស់ប្រេស៊ីលកាលពីខែមុនបានចេញបទបញ្ជាអំពាវនាវឱ្យប្រធានាធិបតីពាក់រម៉ាសក្នុងទីសាធារណៈ។ ប្រភព New York Timesប្រែសម្រួលដោយ ហៃ សុចិន្តា
វ៉ាក់ស៊ាំងកូវីដ១៩ របស់ចិនឈានដល់ដំណាក់កាលទី ៣ នៃការសាកល្បងព្យាបាលគ្លីនិកលើមនុស្ស
ក្រុមហ៊ុន Sinovac Life Sciences ដែលមានមូលដ្ឋាននៅទីក្រុងប៉េកាំងបានប្រកាសកាលពីថ្ងៃច័ន្ទថាការសហការចាក់វ៉ាក់ស៊ាំងការពារកូវីដ១៩ ជាមួយក្រុមហ៊ុនផលិតប្រពន្ធ័ជីវសាស្ត្រវិទ្យាសាស្ត្រប្រេស៊ីល Instituto Butantan បានទទួលការយល់ព្រមពីនិយតករប្រេស៊ីលសម្រាប់ការសាកល្បងព្យាបាលដំណាក់កាលទី ៣ នេះបើយោងតាមការចុះផ្សាយរបស់ Global Times នៅព្រឹកថ្ងៃអង្គារនេះ។ គួរបញ្ជាក់ថា Sinovac បានទទួលលទ្ធផលនៃដំណាក់កាលទី ២ ដែលបង្ហាញថាវ៉ាក់ស៊ាំងនេះបង្កើតអង់ទីករបន្សាបវីរុសក្នុងរយៈពេល ១៤ ថ្ងៃ ជាមួយអត្រា seroconversion អង្គទីករខ្ពស់ជាង ៩០ ភាគរយ។ ទីភ្នាក់ងារនិយតកម្មជាតិប្រេស៊ីលនោះមានឈ្មោះថា Anvisa បានផ្តល់ការយល់ព្រមលើការសាកល្បងគ្លីនិកដំណាក់កាលទី ៣ ដែលឧបត្ថម្ភដោយ Instituto Butantan កាលពីថ្ងៃសុក្រ ដើម្បីធ្វើតេស្តប្រសិទ្ធភាពនិងសុវត្ថិភាពនៃវ៉ាក់ស៊ាំងកូវីដ១៩ បង្កើតឡើងដោយក្រុមហ៊ុន Sinovac Life Science Co នៅប្រេស៊ីល។ យោងតាមសេចក្តីថ្លែងការណ៍ជាផ្លូវការមួយដែលក្រុមហ៊ុនបានផ្ញើទៅ Global Times បានអោយដឹងថា ការសាកល្បងនេះមានគោលបំណងដើម្បីសិក្សាជាមូលដ្ឋានគាំទ្រដល់ការផ្តល់អាជ្ញាប័ណ្ណផលិតផល អាជ្ញាប័ណ្ណបច្ចេកវិទ្យា និងការអនុញ្ញាតទីផ្សារនិងពាណិជ្ជកម្មវ៉ាក់ស៊ាំង។បន្ថែមទៀតនោះ យោងតាមសេចក្តីប្រកាសរបស់វិទ្យាស្ថាន Instituto Butantan កាលពីថ្ងៃព្រហស្បតិ៍បានឱ្យដឹងថាការសិក្សានេះនឹងក្លាយជាការសាកល្បងត្រួតពិនិត្យដោយប្រើ placebo ទ្វេដងទៅលើអ្នកចូលរួមដែលបែងចែកសមាមាត្រ ១: ១ ដោយចៃដន្យនៃថ្នាំ placebo និងវ៉ាក់ស៊ាំង និងមានរៀបចំកាលវិភាគចាក់ថ្នាំបង្ការរោគគឺចាក់ថ្នាំ intramuscular ចំនួន ២ ដងក្នុងចន្លោះពេល ១៤ ថ្ងៃ។ ផងដែរ ការពិនិត្យឡើងវិញត្រូវបានធ្វើឡើងតាមស្តង់ដារខ្ពស់បំផុតនិងស្របតាមវិធានអន្តរជាតិដើម្បីធានាឱ្យមានលក្ខណៈសម្បត្តិគ្រប់គ្រាន់ដែលមានមុខងារពេញលេញសម្រាប់ដំណើរការបុព្វសិទ្ធិរបស់អង្គការសុខភាពពិភពលោក។ លោកវេជ្ជបណ្ឌិត Dimas Covas នាយកវិទ្យាស្ថាន Instituto Butantan បានមានប្រសាសន៍ថា“ ការអនុម័តការសាកល្បងព្យាបាលដំណាក់កាលទី ៣ គឺជាការបង្ហាញថាភាពជាដៃគូរបស់ Sinovac និង Instituto Butantan ដែលជាការសហការគ្នាប្រកបដោយប្រសិទ្ធភាពផ្តល់ក្តីសង្ឃឹមក្នុងការជួយសង្គ្រោះជីវិតមនុស្សទូទាំងពិភពលោក”។ជាមួយគ្នានេះដែរ លោក Weidong Yin ជា chairman, president និង CEO នៃ Sinovac បានមានប្រសាសន៍នៅក្នុងសេចក្តីថ្លែងការណ៍មួយថា “យើងរីករាយនឹងឈានដល់ដំណាក់កាលទី ៣ នៃការសាកល្បងជាមួយ Instituto Butantan ដែលនឹងនាំយើងមួយជំហានទៀតក្នុងការប្តេជ្ញាចិត្តដើម្បីអភិវឌ្ឍវ៉ាក់ស៊ាំងសម្រាប់ការប្រើប្រាស់ជាសកល និងបេសកកម្មរបស់យើងក្នុងការផ្គត់ផ្គង់វ៉ាក់ស៊ាំងដើម្បីទប់ស្កាត់ការរាលដាលនៃជំងឺរាតត្បាត”។ អភិបាលខេត្តបាននិយាយថាវិទ្យាស្ថាន Instituto Butantan នឹងចំណាយទឹកប្រាក់ចំនួន ១៧.១ លានដុល្លារ ដើម្បីធ្វើការសាកល្បងលើអ្នកស្ម័គ្រចិត្តប្រេស៊ីលចំនួន ៩,០០០ នាក់ ដើម្បីទទួលបានការផ្គត់ផ្គង់វ៉ាក់ស៊ាំងឱ្យប្រជាជនប្រេស៊ីលរាប់លាននាក់ដោយឥតគិតថ្លៃ។ប្រភព Global Timesប្រែសម្រួលដោយ ហៃ សុចិន្តា
