មានមនុស្សខ្លះកើតស្រ្តេស និងបាក់ទឹកចិត្តជាខ្លាំង តែគួរឱ្យសោកស្តាយពួកគេមិនអាចងើបរួចចេញពីបញ្ហានេះ។ បើអ្នកមានបញ្ហាបែបនេះ អ្នកគួរធ្វើតាមក្បួនលោក Hal Elrod ទាញជីវិតមកវិញ។ លោក Hal Elrod នៅឆ្នាំ ២០០៨ បានជំពាក់លុយគេរាប់សែនដុល្លារ។ គាត់បាក់ទឹកចិត្តរហូតចង់សម្លាប់ខ្លួនថែមទៀត។ គាត់បានស្តានសម្តីលោក Jim Rohm មួយឃ្លានិយាយថា ជីវិតរីកចម្រើន ត្រូវការវិន័យដើម្បីទាញសមត្ថភាពឱ្យរីកចម្រើន”។ គាត់ លោក Hal ប្រើ ៣ទម្លាប់ពេលព្រឹកពង្រឹងផ្លូវចិត្តដើរចេញពីបញ្ហាផ្លូវចិត្តយ៉ាងអស្ចារ្យ៖
១. រស់ក្នុងភាពស្ងប់ស្ងាត់ ចិត្តកាន់តែមានថាមពល។ លោក Hal ប្រាប់ថា ភាពស្ងប់ស្ងាត់ជាវិធីព្យាបាលផ្លូវចិត្តល្អបំផុតរបស់គាត់។ គាត់បន្តថា ពេលអ្នកភ្ញាក់ពីគេង អ្នកត្រូវរក្សាភាពស្ងប់ស្ងាត់តែឯងរយៈពេល ៥ ទៅ ១០នាទី ដើម្បីសាកថ្មផ្លូវចិត្តរបស់អ្នកកាន់តែមានថាមពលនិងស្រូបក្តីសុខនៅម្នាក់ពេលព្រឹកហ្នឹង។ ការអង្គុយផ្តោតសមាធិពេលព្រឹកជាវិធីការពារបញ្ហាផ្លូវចិត្តបានល្អបំផុត។
២. ចាប់ផ្តើមធ្វើលំហាត់ប្រាណពេលព្រឹក គឺអ្នកចាប់ផ្តើមដើរចេញពីជំងឺបាក់ទឹកចិត្តដូចគ្នាដែរ។ ការធ្វើលំហាត់នេះ ជួយលោក Hal ឱ្យមានការផ្លាស់ប្តូរជីវិត និងសុខភាពល្អ ហើយវិធីនេះជួយឱ្យគាត់ដើរចេញពីបញ្ហាបាក់ចិត្តផងដែរ(ហាត់ប្រាណយូរ ជ្រុះស្រ្តេស អស់ជំងឺផ្លូវចិត្ត)។ ការហាត់ប្រាណនេះមានដូចជា រត់ ហែងទឹក ហាត់យូហ្គា និងទៅកន្លែងហាត់ប្រាណ ធ្វើឱ្យអារម្មណ៍របស់អ្នកស្រស់ថ្លា និងខួរក្បាលកាន់តែមានថាមពលល្អ។
៣. ការអានសៀវភៅពេលព្រឹកដាស់ស្មារតីកុំឱ្យធ្លាក់ចូលជំងឺបាក់ទឹកចិត្ត។ ការអានជួយអ្នកមានវិធីគិតល្អ ដើម្បីជួយអ្នកឱ្យមានថាមពលក្នុងការធ្វើកិច្ចការជាប្រចាំថ្ងៃផងដែរ។ ការអាននេះ ជួយអ្នកលើកទឹកចិត្ត ហើយវិធីលឿនបំផុតដើម្បីសម្រេចបាននូវអ្វីដែលអ្នកចង់បាន គឺយកគំរូតាមមនុស្សជោគជ័យ ដែលបានសម្រេចវារួចហើយ។ ការអាននេះ អ្នកគ្រាន់តែចំណាយពេលមួយថ្ងៃ ៣០នាទី ទៅ ១ម៉ោងបានហើយដើម្បីសំលៀងគំនិតកាន់តែមានសមត្ថភាពពូកែដោះបញ្ហាហើយមានរីករាយជាមួយខ្លួនឯងផងដែរ។ បើអ្នកព្យាយាមអភិវឌ្ឍខ្លួនតាមគោលការទាំងបីនេះ អ្នកនឹងឃើញខ្លួនអ្នកមានប្រសិទ្ធផលក្នុងការរស់នៅគ្មានជំងឺផ្លូវចិត្តនិងគ្មានជំងឺនោះទេ៕ អត្ថបទដោយ៖ ទ្រ សុភាព