អ្នកគ្រូបន្តថា កុមារអូទីស្សឹមវិញចំពោះការរៀនសូត្រ ឬមានទេពកោសល្យជំនាញអ្វីមួយពូកែ គឺពួកគេពូកែអស្ចារ្យណាស់ នេះជាសង្ឃឹមដល់ពួកគេជាថ្មី។ មានអ្នកមួយចំនួនតូច​ខ្វះការយល់ដឹងពីបញ្ហាអូទីស្សឹមនេះ មានការរើសអើង មានក្រខ្សែភ្នែកចំឡែកៗ បន្ទោសផ្នែកអាកប្បកិរិយា នេះជាការដាក់សម្ពាធបញ្ហាផ្លូវអារម្មណ៍ទៅលើកុមារអូទីស្សឹម។ ការពិតទៅ! យើងគួរនាំគ្នាលើកទឹកចិត្ត និងគួរចាត់កុមារអូទីស្សឹមជាកុមារម្នាក់ នេះជាការផ្តល់តម្លៃឱ្យគេ រស់នៅដោយមានតម្លៃ មានក្តីភាពកក់ក្តៅផងដែរ។

ពេលខ្លះកុមារអូទីស្សឹមគ្នាមានតែការលាក់អារម្មណ៍ ព្រោះគ្នាមានបញ្ហាផ្នែកទំនាក់ទំនង និងកង្វះផ្នែកភាសានិយាយស្តីមិនអាចបញ្ចេញពីអារម្មណ៍របស់ខ្លួនបានទៅកាន់អ្នកដទៃនោះទេ។ តាមអ្នកគ្រូ ប៊ុត សុខហេង ជាគ្រូបង្រៀនកុមារអូទីហ្សឹមជាច្រើនឆ្នាំបានលើកឡើងថា “កុមារមានបញ្ហាអូទីស្សឹមគួរទទួលបានក្តីអាណិតនិងក្តីស្រឡាញ់ឱ្យច្រើនពីឪពុកម្តាយ ពីមនុស្សជុំវិញខ្លួន និងសង្គមជាតិផងដែរ”។ ព្រោះក្តីស្រឡាញ់ធ្វើឱ្យកុមារអូទីស្សឹមគ្នាមានកម្លាំងចិត្ត និងមានស្នាមញញឹម មានអនាគតល្អ។

តាមអ្នកគ្រូ សុជា បាននិយាយថា តាមការសិក្សាកុមារអូទីស្សឹមកម្ពុជាបានឱ្យដឹងថា កុមារមានបញ្ហាអូទីស្សឹមនៅក្នុងប្រទេសកម្ពុជានាពេលបច្ចុប្បន្ន មានចំនួនប្រមាណ ៣ម៉ឺននាក់ជាង។ ហើយកុមារទាំងនោះ ត្រូវការការអប់រំឥរិយាបថក្នុងការរស់នៅឱ្យមានទំនាក់ទំនងនឹងសង្គម និងអប់រំបំណិនជីវិតម្តងបន្តិចៗ ព្រោះការកែប្រែអត្តចរិតកុមារមានបញ្ហានេះ មិនងាយនោះទេ វាត្រូវការពេលវេលាបង្រៀនគេឱ្យចេះទំនាក់ទំនងជាមួយមនុស្សជុំវិញខ្លួនឡើង។ ហើយកុមារអូទីស្សឹមត្រូវការយកចិត្តទុកដាក់ និង​ការ​គាំទ្រពី​​សំណាក់​ឪពុកម្ដាយ ​និង​មនុស្សជុំវិញខ្លួនខ្លាំង ព្រោះការផ្តល់ក្តីអាណិតស្រឡាញ់ជាថ្នាំពូកែបំផុត ឱ្យពួកគេចេះតស៊ូ បង្កើតក្តីសង្ឃឹមថ្មីដល់អនាគត់។

តាមអ្នកគ្រូ សុជា បានបន្តថា អ្វីដែលយើងអាចជួយកុមារអូទីស្សឹមឱ្យមានភាពល្អប្រសើរបាននោះ យើងត្រូវបញ្ជូនកុមារអូទីស្សឹមឱ្យមានការរៀនសូត្រពីអ្នកជំនាញអប់រំ ដើម្បីធ្វើការបង្រៀនកុមារអូទីស្សឹមឱ្យកាន់តែប្រសើរឡើងម្តងបន្តិចៗ ជាប្រចាំថ្ងៃ ដែលត្រូវសហការឪពុកម្តាយជាមួយផង។ ហើយពេលកុមារអូទីស្សឹមនៅជាមួយឪពុកម្តាយអាចជួយពួកគេបានល្អ ជាការជួយក្នុងការផ្លាស់ប្តូរអាកប្បកិរិយារបស់កុមារតាមវិធីសាស្ត្រវិជ្ជមាន ការលើកទឹកចិត្ត ការប្រើសម្តីល្អៗ និងសង្គេតពីអារម្មណ៍របស់ពួកគេ ហើយឪពុកម្តាយត្រូវតែជៀសវាងការប្រើទណ្ឌកម្មឫ ស្តីបន្ទោសជាដើម។ ការធ្វើទាំងអស់នេះឪពុកម្តាយត្រូវការភាពអត់ធ្មត់ខ្ពស់ ដើម្បីជួយកូនឱ្យប្រសើរឡើង។ កុមារអូទីស្សឹម ពិតជាត្រូវការក្តីស្រឡាញ់ខ្លាំងណាស់ទាំងឪពុកម្តាយ និងអ្នកជុំវិញខ្លួនរបស់ពួកគេ៕ អត្ថបទដោយ៖ ទ្រ សុភាព