ផ្ទៃមុខរបស់មនុស្សយើងម្នាក់ៗ សំខាន់ណាស់។ បើទម្រង់មុខខូចវៀត កើតមុន និងមុខខ្មៅនោះ អ្នកគ្មានអារម្មណ៍ជឿជាក់លើខ្លួនឯងនោះទេ។ តាមលោកវេជ្ជបណ្ឌិត Huynh Tan Vu សាកលវិទ្យាល័យវេជ្ជសាស្ត្របានប្រាប់ពីទម្លាប់ ៤យ៉ាងនាំឱ្យខូចទម្រង់មុខ។
១.ដេកមួយចំហៀងខ្លួនក៏ខូចទម្រង់មុខដែរ។ ការដេកផ្អៀងមុខលើខ្នើយ ឬលើពូកពេលគេងត្រូវបានគេចាត់ទុកថា វាអាចធ្វើឱ្យខូចទម្រង់មុខរបស់អ្នកប្តូរឱ្យច្រមុះកោង និងជ្រុងមាត់មិនស្មើគ្នា ងាយមានស្នាមជ្រួញនៅម្ខាងមុខ។ ការគេងផ្អៀងម្ខាងជាប្រចាំថ្ងៃនោះ បង្កឱ្យមានស្នាមជ្រួញលើថ្ពាល់ និងចង្កាដោយសារមុខត្រូវសង្កត់នឹងខ្នើយ។ លើសពីនេះ ផ្នែកម្ខាងនៃទម្រង់មុខដែលដេកនៅចំហៀងទំនងជាតូចជាងផ្នែកម្ខាងទៀតដោយសារតែសាច់ដុំមុខត្រូវបានសង្កត់រយៈពេលយូរ។
២. ការប្រើប្រាស់ឧបករណ៍អេឡិចត្រូនិកឬទូរស័ព្ទដៃអស់ជាច្រើនម៉ោងនាំឱ្យប៉ះពាល់ដល់ភ្នែក និងស្បែកមុខ។ ព្រោះពន្លឺពណ៌ខៀវជ្រាបចូលទៅក្នុងស្បែកនាំឱ្យមានប្រតិកម្មខូចDNA ជាបញ្ហាស្បែកកាន់តែធ្ងន់។ ហើយពន្លឺពណ៌ខៀវនេះធ្វើឱ្យអ្នកគេងមិនលក់ អស់កម្លាំង និងស្ត្រេស នេះជាមូលហេតុធ្វើឱ្យអ្នកពិបាកព្យាបាលមុន។ លើសពីនេះ អេក្រង់ទូរស័ព្ទជំរុញការផលិតរ៉ាឌីកាល់សេរីនៅក្នុងស្បែក បំបែកខូឡាជែន ធ្វើឱ្យស្បែកឆាប់ចាស់ និងស្បែកមានស្នាមជ្រួញលឿន។
៣. យកដៃប៉ះមុខច្រើនដងនាំមេរោគឆ្លងលើផ្ទៃមុខមិនខានទេ។ ព្រោះដៃរបស់អ្នកប៉ះវត្ថុជាច្រើននាំមានបាក់តេរីឆ្លងលើផ្ទៃមុខបើអ្នកមិនបានសម្អាតដៃជាមុនទេនោះ។ ទម្លាប់យកដៃប៉ះមុខញឹកញាប់នឹងធ្វើឱ្យស្បែករបស់អ្នកងាយកើតមុន និងកើតមុនកាន់តែច្រើនឡើង។ លើសពីនេះ ការប្រើកន្សែងមិនស្អាតជាកំហុសមួយនាំឱ្យកើតមុន រលាកលើស្បែក ផ្សិតលើស្បែក និងរីករាលដាលដល់ជំងឺស្បែកកាន់តែខ្លាំង។
៤. ទម្លាប់យកដៃច្រត់ចង្កាឡើងលើយូរនាំឱ្យខូចទម្រងមុខ។ វានាំឱ្យផលប៉ះពាល់ដល់ឆ្អឹងចង្ការបស់អ្នក និងចរាចរឈាមហូរមិនស្រួល។ ព្រោះសកម្មភាពនេះអាចបណ្តាលឱ្យចង្ការបស់អ្នកកោង ហើយស្បែកនៅជុំវិញចង្ការបស់អ្នកកាន់តែចាស់។ ហើយវាធ្វើឱ្យមុខរបស់អ្នកខូចទ្រង់ទ្រាយគ្មានតុល្យភាពនឹងគ្នានោះទេ៕ អត្ថបទដោយ៖ ទ្រ សុភាព