តាមទិន្នន័យពីមនុស្សពេញវ័យ ១៨២.៧៧០នាក់ ដែលបានចុះឈ្មោះនៅក្នុង UK Biobank រួចហើយបានបំពេញកម្រងសំណួររំលឹកអំពីរបបអាហាររយៈពេល ២៤ម៉ោងតាមទម្លាប់រាប់សិនឆ្នាំរបស់ពួកគេ។ ក្រុមអ្នកស្រាវជ្រាវបានធ្វើការស្វែងយល់ពីអ្នកផឹកកាហ្វេ តែក្តៅ និងទឹកធម្មតាពេលព្រឹកជាប្រចាំថ្ងៃ ដែលអស់ពេល ១៣ឆ្នាំ។ លទ្ធផលបានបញ្ជាក់ថា អ្នកផឹកភេសជ្ជៈចាប់ពី ៧ទៅ៨កែវក្នុង១ថ្ងៃរួមគ្នាមានទឹកធម្មតា ១កែវភ្ញាក់ពីគេង ផឹកតែក្តៅ និងកាហ្វេថែម(ផឹកកាហ្វេកុំដាក់ស្ករច្រើន ត្រឹមតែ១០% ឬ២០%បានហើយ) ជួយសុខភាពយើងបានរហូត ២៨% ឯណោះ គឺជួយកាត់បន្ថយការស្លាប់តិចជាងអ្នកផឹកភេសជ្ជៈ ៤កែវក្នុង១ថ្ងៃ។

សូម្បីតែលោក Thomas M. Holland ជាគ្រូពេទ្យ ជាអ្នកវិទ្យាសាស្ត្រ និងជាគ្រូបង្រៀននៅវិទ្យាស្ថាន RUSH បានលើកឡើងថា អ្នកផឹកកាហ្វេ តែក្តៅ និងទឹកមួយកែវធំនៅពេលព្រឹក រួមបញ្ចូលគ្នា ៧ទៅ៨កែវក្នុងមួយថ្ងៃថែមទៀតនោះ ជួយកាត់បន្ថយការស្លាប់មុនអាយុ។ ព្រោះវាជួយការពារជំងឺសំខាន់ៗ ដូចជាជំងឺបេះដូង ជំងឺលើសឈាម ជំងឺមហារីក ជំងឺទឹកនោមផ្អែមប្រភេទទី២ កាត់បន្ថយជាតិខ្លាញ់ ពង្រឹងប្រព័ន្ធរំលាយអាហារ។ ទម្លាប់ពេលព្រឹកផឹកភេសជ្ជៈល្អទាំងបីនេះរួមបញ្ចូលគ្នាធ្វើឱ្យសុខភាពរាងកាយមានតុល្យភាពមានអាយុវែង”។

អ្នកអាចផឹកកាហ្វេ ១កែវឬពីរកែវក្នុងមួយថ្ងៃ កុំដាក់ស្ករច្រើន ឬអត់ស្ករក៏កាន់តែល្អសុខភាព។ ផឹកតែ ក្តៅនិងទឹកធម្មតា ៦ទៅ៧កែវក្នុងមួយថ្ងៃ(៣លីត្រឡើង) ល្អដល់សុខភាពរាងកាយ និងផ្លូវចិត្ត។ ព្រោះកាហ្វេមានសមាសធាតុដូចជា flavonoids, chlorogenic acids និង trigonelline ប្រឆាំងជំងឺមហារីក។ តែក៏មានសមាសធាតុ catechins និង flavonoids កាត់ជាតិខ្លាញ់កាត់ជំងឺលើសឈាម សម្ពាធឈាម។ ចំណែកទឹកធម្មតាជួយថែតម្រងនោម លាងជាតិពុលធ្វើឱ្យរាងកាយមានតុល្យភាព។ នេះជាអត្ថប្រយោជន៍ដ៏អស្ចារ្យរបស់កាហ្វេ តែ និងទឹកធម្មតា ជួយឱ្យអ្នករស់នៅមានអាយុវែងកម្រមានជំងឺកាចៗ ក្នុងខ្លួនថែមទៀត៕ អត្ថបទដោយ៖ ទ្រ សុភាព