អាហារពិតជាសំខាន់ណាស់។ បើអ្នកហូបមិនបានត្រឹមត្រូវដូចជាផឹកស្រាច្រើន ហូបអាហារមានរសជាតិប្រៃផ្អែមលើសកម្រិតនោះ វាបង្កស្បែករបស់អ្នកប្រែទៅជាឆាប់ចាស់។ គ្រាន់តែហូបអាហារត្រឹមត្រូវសម្រស់អ្នកមិនងាយចាស់ទេ។ ខាងក្រោមនេះមានផ្លែឈើ៤ ជួយសម្រស់របស់អ្នកកុំឱ្យឆាប់ចាស់ហើយជួយខួរក្បាលរបស់អ្នកកុំឱ្យស្រ្តេស។
១. ផ្លែផាសិន៖ តាមគេហទំព័រ Healthline បានចុះផ្សាយថា ផ្លែផាសិនជាប្រភពដ៏អស្ចារ្យនៃវីតាមីនអា ដែលជាសារធាតុចិញ្ចឹមមានអត្ថប្រយោជន៍ជាពិសេសសម្រាប់ស្បែក។ វាផ្ទុកដោយសារធាតុប្រឆាំងអុកស៊ីតកម្មផ្សេងទៀតដូចជា Piceatannol វីតាមីនសេ បូហ្វីវីឡាវីន និងខារ៉ូទីន ដែលជួយជម្រុញដល់សុខភាពស្បែកនិងពន្យារភាពចាស់មុនអាយុ។ មិនត្រឹមតែប៉ុណ្ណោះទេ គ្រាន់តែខួរក្បាលរបស់អ្នកទទួលរសជាតិផ្លែផាសិនភ្លាមបាត់ស្រ្តេសហើយអារម្មណ៍រីករាយ។
២.ផ្លែប័រ៖ ខ្លាញ់ monounsaturated នៅក្នុងផ្លែប័រ អាចជួយស្រោចស្រង់ការខូចខាតនៃខួរក្បាលដែលរងការប៉ះពាល់ពីបញ្ហាអារម្មណ័តានតឹងនិងស្រេ្តសជាដើម។ ហើយវាក៏ជាប្រភពដ៏អស្ចារ្យនៃប៉ូតាស្យូមហើយប៉ូតាស្យូមត្រូវបានបង្ហាញដើម្បីជួយបន្ថយសម្ពាធសរសៃឈាមខួរក្បាលបានយ៉ាងល្អ។ ដូច្នេះអ្នកអាចទទួលទានផ្លែប័រមានអត្ថប្រយោជន៍ទាំងសម្រស់និងជួយចិញ្ចឹមខួរក្បាលកុំឱ្យជួបបញ្ហាស្ត្រេសផងដែរ។
៣.ផ្លែឪឡឹក៖ យោងតាមរយៈគេហទំព័រ Tasteofhome បានណែនាំផ្លែឪឡឹកជាផ្លែឈើសម្បូរទៅដោយវីតាមីនអេ និងវិតាមីនស៊ី ទៅប្រឆាំងអុកស៊ីតកម្មក្នុងរាងកាយ ជាពិសេសគឺសម្បូរដោយជាតិទឹក ដែលអាចជួយធ្វើឱ្យត្រជាក់ក្នុង ស្រស់ស្រាយសប្បាយចិត្តនៅពេលញុំារួច។ ផ្លែឪឡឹកអ្នកអាចយកទៅក្រឡុកធ្វើជាភេសជ្ជៈផឹកក៏មានរសជាតិឆ្ងាញ់ប្លែកមាត់ម៉្យាងដែរ។
៤.ផ្លែព្រីញជួយដល់សុខភាពស្បែកនិងភ្នែក៖ នៅក្នុងផ្លែព្រីញជួយបង្កើនចំនួនអេម៉ូក្លូប៊ីននិងជាតិដែក វាបានដើរតួយ៉ាងសំខាន់ដែលជាភ្នាក់ងារបន្សុទ្ធឈាម(លាងឈាម)ជួយដល់ស្បែកអ្នកឱ្យមានភាពភ្លឺរលោង និងស្រស់ថ្លាជាងមុន។ ក្រៅពីជួយដល់ស្បែកហើយវាក៏ជួយដល់ភ្នែករបស់អ្នកឱ្យមានភាពភ្លឺជាងមុនផងដែរ នេះដោយសារមានផ្ទុកដោយសារធាតុរ៉ែ វីតាមីនសេ និងអេជាច្រើន៕ អត្ថបទដោយ៖ ទ្រ សុភាព