អូទីស្សឹមគឺជាពិការភាពនៃការអភិវឌ្ឍន៍ប្រព័ន្ធប្រសាទខួរក្បាលហើយបុគ្គលអូទីស្សឹមមានបញ្ហាគួរឲ្យកត់សម្គាល់មួយចំនួនដូចជា បញ្ហាសង្គម ការទំនាក់ទំនង និងវិបត្តិអាកប្បកិរិយា។ បុគ្គលអូទីស្សឹមមានរបៀបក្នុងការទំនាក់ទំនង ការប្រាស្រ័យគ្នា ការសម្តែងអាកប្បកិរិយា និងការរៀនសូត្រខុសពីអ្នកដទៃ។ តាមអ្នកគ្រូ ប៊ុត សុខហេង មានបទពិសោធន៍ចិញ្ចឹមកូនអូទីស្សឹម ៩ឆ្នាំ និងធ្វើជាគ្រូបង្រៀនកុមារអូទីហ្សឹម ៣ឆ្នាំបានលើកឡើងថា “កុមារមានបញ្ហាអូទីស្សឹមគួរទទួលបានក្តីអាណិតនិងក្តីស្រឡាញ់ឱ្យច្រើនពីឪពុកម្តាយ ពីមនុស្សជុំវិញខ្លួន និងសង្គមផងដែរ”។
តាមបទពិសោធន៍អ្នកគ្រូ សុខហេង មានកូនអូទីស្សឹម និងជួបអ្នកម្តាយជាច្រើនដែលមានកូនមានបញ្ហាអូទីស្សឹម គឺពួកគាត់ជួបប្រទះការលំបាកផ្លូវចិត្តខ្លាំងណាស់។ ពេលកូនមានបញ្ហាបែបនេះ សួរថា បេះដូងជាឪពុកម្តាយមានអារម្មណ៍ឈឺចាប់ប៉ុណ្ណា? ហើយមិនត្រឹមតែប៉ុណ្ណោះទេ ឪពុកម្តាយត្រូវប្រឈមមុខជាមួយការរើសអើងពីមនុស្សជុំវិញខ្លួនជាមួយក្រខ្សែភ្នែកចំឡែកៗ ការបន្ទោសនិងដាក់សម្ពាធពីមនុស្សនៅជុំវិញខ្លួនដោយសារតែខ្វះការយល់ដឹងពីបញ្ហាអូទីស្សឹមនេះ។ អ្នកគ្រូ សុខហេង បាននិយាយថា ឪពុកម្តាយងាយកើតមានបញ្ហាផ្លូវចិត្តណាស់ ក៏ព្រោះតែកូនដែលមានបញ្ហាអូទីស្សឹមខុសពីក្មេងដទៃ។ បញ្ហាដែលត្រូវប្រឈមជាច្រើន រួមទាំងការសម្រាកមិនបានគ្រប់គ្រាន់កំពុងយាយីសុខភាពពួកគាត់ជាខ្លាំង ដូចជាពេលឪពុកម្តាយ មកពីធ្វើការងារ ហើយពេលយប់កូនពិបាកគេង ឬចូលគេងយប់ជ្រៅ និងមានការរំខានដោយលោតចុះលោកឡើង ឬមានអាកប្បកិរិយាយំខ្លាំងៗ ធ្វើឱ្យអារម្មណ៍ពួកគាត់ស្រ្តេសនិងស្មុគស្មាញ រហូតអស់ជាច្រើនខែ ជាច្រើនឆ្នាំ ផ្លូវចិត្តឪពុកម្តាយកាន់តែចុះខ្សោយ ហើយងាយវិវត្តទៅជាជំងឺផ្លូវចិត្តកម្រិតធ្ងន់ធ្ងរណាស់។
អ្នកគ្រូបន្តបញ្ជាក់បន្ថែមទៀតថា ពេលកុមារមានបញ្ហាអាកប្បកិរិយាកើតឡើង អាចបណ្តាលមកពីគាត់ចង់ទំនាក់ទំនង ឬចង់បានអ្វីមួយ ព្រោះកុមារអូទីស្សឹមកង្វះផ្នែកភាសានិយាយស្តីបញ្ចេញពីអារម្មណ៍របស់ខ្លួន”។ ដូចជាមានករណីអ្នកម្តាយម្នាក់បានចែករំលែកជាមួយអ្នកគ្រូ សុខហេង ប្រាប់ថា៖ យប់មួយកូនខ្លួនអត់ព្រមគេងសោះ ចេះតែយំទទូរភួយ លោតចុះលោតឡើង រករឿងប៉ាម៉ាក់ អូសដៃទៅនេះទៅនោះអស់ពេលជិត២ម៉ោង ដោយហត់នឿយពេកគាត់បានវាយកូន២ដៃ។ បន្តិចក្រោយមកគាត់អូសដៃម៉ាក់ម្តងទៀតរួចក៏រកឃើញប្រអប់ថ្នាំ គាត់បានបើកហើយហុចថ្នាំមួយបន្ទះទៅម៉ាក់ដើម្បីបញ្ចុកគាត់ ពេលនោះទើបប៉ាម៉ាក់បានដឹងថាអាកប្បកិរិយាដែលកើតឡើងនោះគឺចង់ប្រាប់ថាគាត់មិនស្រួលខ្លួន។ នេះជាក្តីលំបាករបស់កុមារអូទីស្សឹមពួកគាត់មានអារម្មណ៍តានតឹង និងឈឺចាប់លើសពីយើងឆ្ងាយ។
អ្នកគ្រូបានប្រាប់ពីដំណោះស្រាយថា កុមារមានបញ្ហាអូទីស្សឹម អត់ត្រូវការថ្នាំព្យាបាលនោះទេ។ មានអ្នកវិទ្យាសាស្ត្រជាច្រើនរូបបាននិងកំពុងធ្វើការស្រាវជ្រាវពាក់ព័ន្ធនឹងបញ្ហាអូទីស្សឹម ប៉ុន្តែពួកគេនៅតែមិនទាន់រកឃើញពីមូលហេតុពិតប្រាកដពីបញ្ហានេះនៅឡើយទេ។ អ្វីដែលយើងអាចជួយកុមារអូទីស្សឹមឱ្យមានភាពល្អប្រសើរបាននោះគឺត្រូវបញ្ជូនពួកគាត់ឲ្យទទួលបានការរៀនសូត្រពីអ្នកជំនាញអប់រំពិសេស រួមទាំងការជួយបន្ថែមពីឪពុកម្តាយនៅផ្ទះ ការចូលរួមលើកទឹកចិត្តនិងផ្តល់ឱកាសពីសហគមន៍ នឹងជួយឲ្យកុមារមានការលូតលាស់ឆាប់រហ័ស ។កុមារអូទីស្សឹមត្រូវការយកចិត្តទុកដាក់ និងការគាំទ្រពីសំណាក់ឪពុកម្ដាយ និងមនុស្សជុំវិញខ្លួនខ្លាំង ជាការផ្តល់ក្តីអាណិតស្រឡាញ់ជាថ្នាំពូកែបំផុត និងជាក្តីសង្ឃឹមថ្មីមួយ ដែលជាឱកាសឱ្យកុមារមួយចំនួនអាចមានសមត្ថភាពក្នុងការរៀនសូត្រ ការគិតពូកែ និងការដោះស្រាយបញ្ហាបានលឿន។ ជាពិសេសឪពុកម្តាយត្រូវព្យាយាមរកទេពកោសល្យកូនឱ្យឃើញ ដើម្បីឱ្យជីវិតកូនប្រសើរឡើងដោយមានអនាគតល្អ៕
នេះជាគេហទំព័រ Facebooks របស់អ្នកគ្រូ ប៊ុត សុខហេង(But Sokheng- អ្នកម៉ាក់) និងលេខទូរស័ព្ទ៖ 078805305
