ឪពុកម្តាយគ្រប់រូប សុទ្ធតែចង់ធ្វើជាគំរូដ៏ល្អនិងរឹងមាំសម្រាប់កូនៗ ប៉ុន្តែពេលខ្លះសកម្មភាពរបស់យើងផ្ទាល់មិនសមស្របនឹងដំបូន្មាន ដែលយើងបានប្រដៅកូនឱ្យធ្វើនោះទេ។ តាមការសិក្សាស្រាវជ្រាវ បានបង្ហាញថា ឪពុកម្តាយបើចង់ធ្វើជា គំរូល្អដល់កូនៗមែន ត្រូវឈប់ធ្វើសកម្មភាព ទាំង៣នេះជាបន្ទាន់។
១. ចង់បានអ្វីមួយភ្លាមៗ៖ កុំឱ្យកូនរស់នៅក្នុងពិភពនៃការផ្តល់ឱ្យច្រើនជ្រុលពេកជាពិសេស នៅពេលឱពុកម្តាយ ធ្វើទង្វើឬការងារណាដែលបង្ហាញអំពីភាពងាយស្រួល និងការចង់ ហើយទទួលបានអ្វីមួយភ្លាមៗ។ បែបនេះពួកគេនឹងមិនបានឃើញរូបភាពអត់ធ្មត់ ភ្លេចឱ្យតម្លៃលើការលះបង់និងការខិតខំ ។ ឧទាហរណ៍សាមញ្ញដូចជាការចាយលុយស្រួលៗ ក៏អាចធ្វើឱ្យកូនៗគិតថាលុយក៏ជារបស់ស្រួលរកដែរ។
បើផ្អែកតាមការសិក្សាដ៏ល្បីតៗគ្នាមួយ គេធ្វើតេស្តកុមារជាមួយស្ករ Marshmallow កុមារទាំងនោះត្រូវបានផ្តល់ជម្រើសរវាងការញ៉ាំ Marshmallow តែ១បានភ្លាមៗ ឬត្រូវរង់ចាំ ១៥ នាទី សិនដើម្បីទទួលបាន Marshmallow ២ ។ ប្រសិនបើកុមារណាម្នាក់ស័្មគ្រ នៅរង់ចាំ១៥នាទីនោះ គឺបង្ហាញលទ្ធផលថាក្មេងម្នាក់នោះនឹងមានភាពធន់ផ្នែកអារម្មណ៍ខ្ពស់ នៅពេលអនាគត ពួកគេនឹងអាចទទួលបានជោគជ័យខ្ពស់ក្នុងការសិក្សារៀនសូត្រ។
២. ឈប់ភ្លេចលើ ការកំណត់អទិភាពឱ្យខ្លួនឯង៖ ជារឿយៗឪពុកម្តាយដាក់តម្រូវការរបស់កូនៗមុននឹង ឱ្យតម្រូវការទៅខ្លួនឯង ដោយហេតុថាស្រឡាញ់កូន។ ប៉ុន្តែសាកគិតបន្តិចថា បើអ្នកជាពែងទទេ ពុំមានអ្វីទាំងអស់ តើអ្នកអាចចាក់តម្រូវការឱ្យទៅកូនៗបានទេ? ដូច្នេះការថែរក្សាខ្លួនឯង សុខភាពផ្លូវចិត្តនិងកាយឱ្យរឹងមាំ គឺសំខាន់ដូចគ្នានឹងការថែរក្សាកូនៗរបស់អ្នកដែរ។ ឧទាហរណ៍ថាប្រសិនបើអ្នកតែងតែនឿយហត់ តានតឹង ឬមិនសប្បាយចិត្ត មានចិត្តគំនិតអវិជ្ជមាន កូនរបស់អ្នកនឹងទទួលបានឥទ្ធិពលនោះដូចគ្នា ពួកគេនឹងគិតថាវាជារឿងធម្មតាក្នុងការបណ្តាយខ្លួនឱ្យឈឺ បណ្តាយខ្លួនឱ្យមិនសប្បាយចិត្ត។
លើសពីនេះទៅទៀត តាមអ្នកជំនាញនៅ Psych Central ក៏បានបានបញ្ជាក់ថាការដែលឪពុកម្តាយមិនចំណាយពេលសម្រាប់ ការថែទាំខ្លួនឯងនឹងអាចបណ្តាលឱ្យគាត់មាន ការអត់ធ្មត់តិចតួចបំផុតជាមួយកូនៗ។ ដូច្នេះចូរកុំមានអារម្មណ៍ថាខុសចំពោះការផ្តល់អាទិភាពដល់សុខភាព និងសុភមង្គលរបស់អ្នក ព្រោះឪពុកម្តាយដែលមានសុភមង្គល នឹងនាំឱ្យកូនមានសុភមង្គលដែរ។
៣. មិនធ្វើតាម អ្វីដែលបានបង្រៀនកូន៖ ក្មេងៗគឺជាប្រភពអាចស្រូបយកអ្វីៗជុំវិញខ្លួនគេបាន ចាប់តាំងពីពួកគេមានអាយុ៣ឆ្នាំឡើងទៅ រាប់បញ្ចូលទាំងអាកប្បកិរិយានិងសកម្មភាពរបស់មនុស្សធំ ពិសេសឪពុកម្តាយ។ ការប្រៀនប្រដៅនិងនិយាយប្រាប់កូនគឺជារឿងងាយស្រួលទេ ដូចជាប្រាប់កូនឱ្យមានភាពគួរសម ស្មោះត្រង់ និងគោរពចាស់ទុំ។ ប៉ុន្តែប្រសិនបើសកម្មភាពរបស់អ្នកផ្ទាល់ មិនបានឆ្លុះបញ្ចាំងពីសកម្មភាពនៃភាពស្មោះត្រង់ ការគួរសម គោរព ដោយភាពជាក់ស្តែង ឱ្យកូនរបស់អ្នកឃើញនឹងភ្នែកទាំងគូរ ពាល់ដោយដៃទាំងពីររបស់ពួកគេនោះទេ ពាក្យសម្តីប្រៀនប្រដៅរបស់អ្នកទាំងនោះនឹង មានប្រសិទ្ធិភាពតិចតួចបំផុត៕
