មន្ទីរពេទ្យកុមារអង្គរជួយកុមារកម្ពុជាប្រមាណជា ៤០០នាក់ជាងជារៀងរាល់ថ្ងៃ នេះជាគុណដ៏ធំមួយដែលយើងទាំងអស់គ្នាគួរតែចូលរួមខានមិនបានឡើយ។ ការគាំទ្ររបស់អ្នកទាំងអស់គ្នាមានន័យលើសពីការបរិច្ចាគមិនថាថវិកាតិច ឬច្រើនក្តីសុទ្ធតែមានចំណែកទ្រទ្រង់ក្នុងការព្យាបាលកុមារជាច្រើន ជាពិសេសកុមារដែលមានជំងឺមហារីកឱ្យមានឪកាសទទួលការព្យាបាល និងឱ្យមានសុខភាពល្អដូចជាកុមារជាច្រើនទៀត។

តាមលោកស្រី ស៊ិនកេត អរុណ ជាប្រធានការិយាល័យរៃអង្គាសមូលនិធិក្នុងប្រទេសកម្ពុជានៃមន្ទីរពេទ្យកុមារអង្គរលើក​ឡើងថា មន្ទីរពេទ្យកុមារអង្គរបង្កើតឡើងដើម្បីជួយសង្រ្គោះដល់ជីវិតកុមារកម្ពុជាហើយមន្ទីរពេទ្យកុមារអង្គនៅក្នុងមួយឆ្នាំៗ ត្រូវការថវិកាប្រមាណ ៦លានដុល្លារ ដើម្បីទ្រទ្រង់ដល់ប្រតិបត្តិការមន្ទីរពេទ្យ។ ជាពិសេសព្យាបាលជំងឺកាចជាងគេចំពោះកុមារ គឺជំងឺមហារីកនេះតែម្តង។

ហើយលោកស្រីបានបន្តថា មានគ្រូពេទ្យឯកទេសជំងឺមហារីកកុមារនៃមន្ទីរពេទ្យកុមារអង្គរជាច្រើនកំពុងធ្វើការព្យាបាល និងប្រយុទ្ធនឹងជំងឺមហារីកកុមារ មានកុមារខ្លះព្យាបាលជារួចហើយ ហើយក៏បន្តតាមដានបន្ថែមទៀតដែរ។ មានកុមារខ្លះទៀតកំពុងធ្វើការព្យាបាលឱ្យអស់ពីលទ្ធភាពរបស់គ្រូពេទ្យជំនាញ។ ទោះបីបញ្ហានេះជាបញ្ហាធំក៏ដោយ ប៉ុន្តែការខំប្រឹងគ្រូពេទ្យ និងសមាជិកជាច្រើនបានរួមគ្នាជួយកុមារដែលរងការឈឺចាប់ពីជំងឺមហារីក ដើម្បីឱ្យកុមារគ្រប់រូបមានឪកាសទទួលបានការពិនិត្យ ការព្យាបាល ដើម្បីរស់រាន និងលេងកម្សាន្តដូចក្មេងដទៃដែរ”។  

មន្ទីរពេទ្យកុមារអង្គរមានកិត្តិយសដែលឆ្នាំនេះ មូលនិធិម៉ានី The Many Foundation និងមានសប្បុរសជនជាច្រើនបានចូលរួមសហការគាំទ្រព្រឹត្តិការណ៍ដើរ “តោះ! ដើរឡើងភ្នំបូកគោដើម្បីសុខភាពកុមារ” ដែលជាឆ្នាំទី៥ ដើម្បីរៃអង្គាសថវិកាជួយមន្ទីរពេទ្យកុមារអង្គរ។

ហើយនៅព្រឹត្តិការណ៍ឆ្នាំនេះ ដំណើរឡើងភ្នំបូកគោ គឺមានចម្ងាយ ៣១ គីឡូម៉ែត និងប្រើពេលវេលាប្រមាណ៧ម៉ោង ដែលមានរយៈពេល៣ថ្ងៃ គឺថ្ងៃទី១៩ ២០ និង ២១ ខែធ្នូ ឆ្នាំ ២០២៥។  ព្រឹត្តិការណ៍នេះ មិនត្រឹមតែរៃអង្គាសថវិកានោះទេ វាបានជួយលើកកម្ពស់សកម្មភាពកីឡា និងការហាត់ប្រាណ ជំរុញគោលដៅទេសចរណ៍ «ឋានសួគ៌បូកគោ» ទំនាក់ទំនងសង្គមអាជីវកម្ម និងស្មារតីសប្បុរសធម៌ មនុស្សធម៌របស់សង្គមជាតិកម្ពុជា។ចំពោះសប្បុរសជនមានចំណាប់អារម្មណ៍ សូមទាក់ទងទូរស័ព្ទ និងតេលេក្រាមលេខ (086 256585 / 089588808) ឬគេហទំព័រ Climb Bokor Mountain for Children's Health​ ៕ អត្ថបទដោយ៖ ទ្រ សុភាព