មនុស្សជាច្រើននិយមផឹកកាហ្វេដែលមានរសជាតិឈ្ងុយឆ្ងាញ់ ជាពិសេសផ្តល់អត្ថប្រយោជន៍ដល់សុខភាព។ តើអ្នកចង់បានរសជាតិលើសពីកាហ្វេទេ? ច្បាស់ណាស់! អ្នកពិតជាត្រូវការ បើយកកាហ្វេលាយជាមួយត្រប៉ែដែលជាបង្អែមរបស់ខ្មែរតាំងពីបូរាណកាលមក តើវានឹងមានរសជាតិបែបណាទៅ? អ្នកខ្លះប្រហែលគិតថា ផឹកមិនកើតទេមើលទៅ ព្រោះផឹកកាហ្វេត្រប៉ែទៅធំក្លិនស្រា ខ្លាចឈឺពោះ ឬខ្លាចស្រវឹងត្រប៉ែក៏មាន។ ថាផឹកកាហ្វេដើម្បីឲ្យស្វាងស្មារតី ធ្វើការងារមុតមាំជាងមុន តែបើសាកកាហ្វេត្រប៉ែខ្លាចតែ ងងុយគេ ចាវឹងធីងធោងក្នុងកន្លែងការងារ។
ខ្ញុំបានភ្លក់កាហ្វេត្រប៉ែនៅហាង Mindfulness Coffee ដែលបង្កើតឡើងដោយបងស្រី ថាវ វរលក្ខណ៍ និងលោក ខិន ហន រួចហើយ។ ចំពោះកាហ្វេត្រប៉ែនេះគឺមានរសជាតិលើសពីកាហ្វេ ហើយមានក្លិនឈ្ងុយ កាន់តែពិសេសគឺមានប្លែកអារម្មណ៍ជាងការំពឹងទុកទៅទៀត។
បងស្រី ថាវ វរលក្ខណ៍ បានលើកឡើងថា សម្រាប់ត្រប៉ែនេះជាឈ្មោះបង្អែមមួយប្រភេទរបស់ខ្មែរយើង។ កាលពីមុនបងប្អូនខ្មែរយើងចូលចិត្តហូបត្រប៉ែលាយជាមួយដូង ហើយគ្រួសារខ្ញុំជាអ្នកធ្វើត្រប៉ែជាច្រើនឆ្នាំ មកហើយ។ ខ្ញុំចាំបានថា កាលនៅធ្វើការក្នុងក្រុមហ៊ុន មេរបស់ខ្ញុំម្នាក់បាននិយាយលេងថា បើយកត្រប៉ែលាយជាមួយកាហ្វេជាការបន្ថែមរសជាតិបែបថ្មីមួយទៀត។ ម្តេចមិនសាកល្បងធ្វើទៅ!
ពេលក្រោយមក ខ្ញុំក៏បានឈប់ធ្វើការងារក្រុមហ៊ុននោះ ហើយមកលក់កាហ្វេដើរតាមក្តីស្រមៃ ពេលនោះហើយដែលធ្វើឲ្យខ្ញុំនឹកឃើញដល់ពាក្យណែនាំរបស់មេខ្ញុំអំពីការលាយត្រប៉ែជាមួយកាហ្វេដើម្បីបង្កើតរសជាតិថ្មីមួយប្រចាំហាង។ ពួកខ្ញុំបានសាកល្បង។ ឃើញថាឆ្ងាញ់ និងផ្ទុះការគាំទ្រទូទាំងប្រទេសកម្ពុជា។ ជាពិសេសអ្នកលេងបណ្តាញសង្គមបាន Troll និយាយលេងថា តិចញាំហើយនិយាយច្រើន តស់ទៅតាប៉ែហី តិចចាវឹងទៅ មិនដឹងថាអ្នកលក់ឬអ្នកទិញតាប៉ែ ។ល។ មកទល់នឹងពេលបច្ចុប្បន្ន ពុំទាន់មានហាងកាហ្វេ ឬភោជនីយដ្ឋានណា មានមុខមីនុយកាហ្វេដូចនៅ Mindfulness Coffee យើងទេ។ យើងពិតជាមានមោទនភាព និងងចង់ឲ្យខ្មែរគ្រប់រូបបានភ្លក់រសជាតិកាហ្វេត្រប៉ែនេះ។
ចំពោះដំណើរការនៃការធ្វើត្រប៉ែវិញគឺយើងត្រូវតាមក្បួនខ្នាតពីបូរាណ ត្រូវធ្វើការសាកល្បងពីគុណភាពសាច់អង្ក រសជាតិ កម្រិតកាច់របស់ត្រប៉ែ ហើយត្រូវមានអនាម័យខ្ពស់ និងគិតសុខភាពជាចម្បង។ អ្វីដែលកាន់តែពិសេសនោះគឺ បរិមាណនៃការធ្វើរបស់ុយើងគឺបែបគ្រួសារ និងមិនលោភលន់ចង់តែបានប្រាក់ចំណេញឡើយ។ ការធ្វើត្រប៉ែដោយមានកំណត់ចំនួនគីឡូក៏ជាកត្តាធ្វើឲ្យរសជាតិ និងគុណភាពត្រប៉ែរបស់គ្រួសារយើងមានស្ថេរភាព និងរក្សារសជាតបានល្អ។
បងស្រី វរលក្ខណ៍៍ បានបន្តថា ពេលចេញលក់ដំបូង មានអ្នកខ្លះនិយាយលេងថាផឹកកាហ្វេត្រប៉ែតិចត្រប៉ែតាមហ្នឹងដែរ...ហើយមានអ្នកខ្លះក៏មិនសូវជាទុកចិត្តដែរ ប៉ុន្តែបន្ទាប់ពីសាកល្បងមានអ្នកផឹកកាហ្វេត្រប៉ែមានរសជាតិបែបថ្មីនេះ មានរឿងមួយបានកើតឡើងគឺផ្ទុះមានអ្នកគាំទ្រកាហ្វេត្រប៉ែនេះខ្លាំង។ អ្នកបានផឹកកាហ្វេត្រប៉ែនេះតែងនិយាយថា រសជាតិឆ្ងាញ់។ រហូតធ្វើត្រប៉ែនេះមិនទាន់ដើម្បីលក់ទេ ព្រោះយើងចំណាយពេលកន្លះថ្ងៃធ្វើវា រួចហើយត្រូវរក្សាទុកត្រប៉ែចំនួនបីថ្ងៃបន្ថែមទៀត ទើបត្រប៉ែនេះមានគុណភាព និងកាច់បានល្អទៅតាមស្តង់ដារ។ សម្រាប់ត្រប៉ែដែលយើងលក់នេះគឺយើងធ្វើវាដោយខ្លួនឯង យើងមានទំនុកចិត្ត។ ពួកយើងលក់ត្រប៉ែនេះរាប់ឆ្នាំមកហើយ។
ហើយគាត់បានបន្តថា ចាស់ៗ តែងនិយាយថា អ្នកស្អកក ឬឈឺក ពេលហូបត្រប៉ែនេះហើយ ស្រាប់តែជាសះស្បើយលឿន។ តែត្រូវចាំថាលុះត្រាត្រប៉ែហ្នឹង ធ្វើតាមធម្មជាតិ អត់ប្រើមេស្កនិងទឹកស្កនោះទើបមានគុណភាព និងអាចដើរតួនាទីជាឳសថបាន។ បងប្អូនខ្លះប្រហែលជាមានចម្ងល់ថាទិញកាហ្វេត្រប៉ែអត់ស្ករហើយនៅតែមានរសជាតិផ្អែមទៀត។ ចម្លើយត្រប៉ែមានរសជាតិផ្អែមស្រាប់ទោះមិនដាក់ស្ករថែមក៏ដោយ។ ជាតិផ្អែមមាននៅក្នុងបាយដំណើបខ្មៅរួចទៅហើយ។ អង្ករដំណើបខ្មៅមានអត្ថប្រយោជន៍ខ្ពស់ដល់សុខភាពណាស់ដូចជាវាមានផ្ទុកជាតិសរសៃ មានជាតិវីតាមីន សារធាតុរ៉ែ និងសម្បូរទៅដោយ Fiber ខ្ពស់ គឺជួយដល់ប្រព័ន្ធរំលាយអាហារ ជួយខួរក្បាល សម្រួលតុល្យភាពរបស់អ័រម៉ូន និងស្បែកកុំឱ្យមានបញ្ហាផ្សេងៗ ផងដែរ។ ហើយជាពិសេសនៅក្នុងអង្ករដំណើបខ្មៅនេះមានសារធាតុប្រឆាំងអុកស៊ីតកម្ម Anthocyanin ដែលមានសមត្ថភាពប្រឆាំងនឹងជំងឺមហារីក និងជំងឺបេះដូងយ៉ាងល្អបំផុត។ ពេលយើងបូកកាហ្វេជាមួយត្រប៉ែ បានជាកាហ្វេត្រប៉ែដែលមានគុណភាពជួយសុខភាពរបស់អ្នករឹងមាំ៕
កាហ្វេត្រប៉ែធានាថាឆ្ងាញ់ និងមិនស្រវឹង! ជាចុងក្រោយ យើងខ្ញុំសូមលើកទឹកចិត្តដល់បងប្អូនខ្មែរគ្រប់រូប ជាពិសេសបងប្អូនដែលកំពុងមានអាជីវកម្មកាហ្វេ សូមកុំគ្រាន់តែចង់បើកកាហ្វេដើម្បីបង្កើនចំណូលតែមួយមុខ ត្រូវព្យាយាមរកអ្វីដែលជាលក្ខណពិសេសប្រចាំហាង របស់ខ្លួន។ ត្រូវចាំថាខ្មែរយើងវត្ថុ របស់ និងចំណុចល្អៗជាច្រើនណាស់ដែលយើងអាចយកមកច្នៃ និងដាក់ឲ្យប្រើប្រាស់ជាមួយមុខជំនួញ ឬការងារប្រចាំថ្ងៃរបស់យើងដូចជាពាក្យរបស់លោកសាស្ត្រចារ្យ សំបូរ ម៉ាណ្ណារ៉ាថា “អភិរក្សចាស់ អភិវឌ្ឍថ្មីបន្ថែម។” ខ្មែររឹងមាំព្រោះខ្មែរមានការច្នៃប្រឌិតខ្ពស់!នេះជាផេកហាងកាហ្វេ Mindfulness Coffee Tuol Tompoung និងលេខទូរស័ព្ទ៖ 093 616 989៕ អត្ថបទដោយ៖ ទ្រ សុភាព
