ខួរក្បាលជាសរីរាង្គដែលគ្រប់គ្រងសកម្មភាពរបស់មនុស្សទាំងអស់។ ពេលដំណើរការមេតាបូលីសខ្លាំងនៅក្នុងខួរក្បាលធ្វើឱ្យរាងកាយផលិតរ៉ាឌីកាល់សេរីកាន់តែច្រើនហួសប្រមាណ ក្លាយជាការវាយប្រហារភ្នាសកោសិកាសរសៃប្រសាទ និងប៉ះពាល់ដល់ការបញ្ជូនសញ្ញាសរសៃប្រសាទទៅកាន់ខួរក្បាល។ លោកវេជ្ជបណ្ឌិត Hoang Quyet Tien មកពីមជ្ឈមណ្ឌលព័ត៌មានវេជ្ជសាស្ត្រនៅមន្ទីរពេទ្យទូទៅ Tam Anh ក្នុងទីក្រុងហូជីមិញ បានបញ្ជាក់ពីទម្លាប់ចំនួន ៥នេះបំផ្លាញសុខភាពខួរក្បាលដោយភាពស្ងៀមស្ងាត់៖
១. ទម្លាប់គេងមិនលក់៖ អំឡុងពេលអ្នកគេងលក់ស្កប់ស្កល់ ខួរក្បាលនឹងសម្អាតជាតិពុលតាមសរសៃប្រសាទដែលបានប្រមូលផ្តុំបន្ទាប់ពីអ្នកបានបញ្ចេញសកម្មភាពពេញមួយថ្ងៃ។ វាធ្វើឱ្យខួរក្បាលឱ្យប្រមូលផ្តុំការចងចាំបានរយៈពេលវែង។ ការគេងមិនគ្រប់គ្រាន់រយៈពេលយូរនាំឱ្យមុខងារខួរក្បាលខ្សោយការចងចាំ ខ្វះការផ្តោតអារម្មណ៍ និងឆាប់ភ្លេចភ្លាំងដូចជាមនុស្សចាស់ផងដែរ។
២. ការផឹកស្រាជាប្រចាំថ្ងៃ៖ ជាតិអាល់កុលក្នុងស្រាមានសមត្ថភាពជ្រាបចូលទៅក្នុងកោសិកាខួរក្បាលយ៉ាងលឿន ធ្វើឱ្យសរសៃប្រសាទថយចុះខ្សោយ បាត់បង់តុល្យភាពការគិត ហើយខួរក្បាលខ្សោយការវិនិច្ឆ័យទៀត។ លើសពីនេះ គ្រឿងស្រវឹងរំខានដល់ការគេង ទម្លាប់បែបនេះ យូរៗ ទៅ ខួរក្បាលនឹងស៊ីកោសិកាក៏បង្កឱ្យមានហានិភ័យនៃជំងឺធ្លាក់ទឹកចិត្ត និងដាច់សរសៃឈាមខួរក្បាលលឿនជាងពេលធម្មតា។
៣. ភាពតានតឹងញឹកញាប់៖ បើអ្នកមានអារម្មណ៍ភាពតានតឹងរយៈពេលយូរជំរុញឱ្យរាងកាយរបស់អ្នកបញ្ចេញអរម៉ូន cortisol ជាអរម៉ូនស្ត្រេស ធ្វើឱ្យសរសៃឈាមរួមតូច និងប៉ះពាល់ដល់លំហូរឈាមទៅកាន់ខួរក្បាល។
៤. កង្វះសកម្មភាពរាងកាយ៖ ការអង្គុយយូរ និងកង្វះលំហាត់ប្រាណធ្វើឱ្យលំហូរឈាមទៅកាន់ខួរក្បាលថយចុះ ដែលប៉ះពាល់ដល់ការផ្គត់ផ្គង់អុកស៊ីសែន។ បើអ្នកបន្តក្នុងស្ថានភាពបែបនេះ សរសៃឈាមរួមតូចៗ នៅក្នុងខួរក្បាលកាន់តែងាយរងគ្រោះ ហើយបង្កើនល្បឿនខួរក្បាលកាន់តែឆាប់ភ្លេចដូចជាមនុស្សចាស់អាយុ ៧០ឆ្នាំអ៊ីចឹង។ ហៅថា ជំងឺវង្វេងទាំងក្មេង។
៥. ការញ៉ាំស្ករ និងខ្លាញ់មិនល្អលើសកម្រិត៖ របបអាហារសម្បូរជាតិស្ករ និងខ្លាញ់មិនល្អអាចជំរុញឱ្យមានប្រតិកម្មរលាកនៅក្នុងរាងកាយ ហើយវាប៉ះពាល់ដល់មុខងាររបស់កោសិកាសរសៃប្រសាទរបស់ខួរក្បាលខ្លាំងដែរ។
តាមលោកវេជ្ជបណ្ឌិត Tien បានណែនាំថា មនុស្សគ្រប់គ្នាគួរតែរក្សារបៀបរស់នៅដែលមានសុខភាពល្អ ញ៉ាំអាហារមានតុល្យភាព គេងឱ្យបានគ្រប់គ្រាន់ ឆ្លៀតធ្វើលំហាត់ប្រាណជាប្រចាំ គ្រប់គ្រងភាពតានតឹងដោយការសម្រាក និងកាត់បន្ថយគ្រឿងស្រវឹង ដើម្បីការពារខួរក្បាលរបស់អ្នកតាំងពីវ័យក្មេងនេះទៅ៕ អត្ថបទដោយ៖ ទ្រ សុភាព