ជីវិតយើងរីកអន្តរាយឬរីកចម្រើន គេឱ្យុមើលទៅលើការសេពគប់មិត្ត បើគប់ត្រូវដើរផ្លូវត្រូវ គប់ខុសនាំក្តីក្រហាយដាក់ខ្លួន។ ទន្ទឹមនឹងនេះបើតាមចិត្តវិទ្យារបស់ស្ថាប័ន Expert editor បានឱ្យដឹងថាសំណាង៣យ៉ាងដែលបញ្ជាក់ថា អ្នកកំពុងមាន មិត្តល្អបំផុតនៅក្បែរខ្លួន ខណៈមនុស្សខ្លះមិនមែនបានជួបមិត្តប្រភេទទាំងនេះទេក្នុងជីវិត។
១. តែងស្តាប់និងផ្តល់យោបល់៖ ជាមិត្តដែលតែងស្តាប់និងផ្តល់យោបល់ ព្រមទាំងជួយរកវិធីដោះស្រាយទៀត នៅពេលដែលអ្នកហាមាត់សុំជំនួយអំពីបញ្ហាអ្វីមួយ។ មិត្តប្រភេទនេះតែងធ្វើឱ្យអ្នកមានអារម្មណ៍ល្អចំពោះខ្លួនឯង ព្រមទាំងជួយលើកទឹកចិត្តនិង រំលឹកអ្នកពីភាពខ្លាំង និងតម្លៃរបស់អ្នក ជាពិសេសក្នុងអំឡុងពេលដែលអ្នកសង្ស័យខ្លួនឯងថាគ្មានសមត្ថភាពធ្វើកិច្ចការអ្វីមួយ។
២. តែងប្រាប់នូវប្រយោជន៍៖ ប្រសិនបើមិត្តរបស់អ្នក ជាមិត្តដែលចេះដឹកនាំមិត្តឲ្យធ្វើនូវអំពើល្អ ធ្វើអំពើជាប្រយោជន៍ ចេះណែនាំមិត្តឲ្យបានស្ដាប់នូវពាក្យដែលមិនធ្លាប់បានស្ដាប់ ណែនាំឱ្យដើររកផ្លូវត្រូវ ការពារអ្នកពីរឿងអាក្រក់នោះពួកគេជាមិត្តដែលល្អបំផុត ពីព្រោះគ្មាននរណាម្នាក់ ងាយនឹងចំណាយពេលវេលានៅក្នុងជីវិតរបស់គេមកណែនាំឬខ្វល់ខ្វាយពីជីវិតអ្នកឡើយ។
៣. តែងត្រេកអរចេញពីចិត្ត៖ ពួកគេជាមិត្តដែលត្រេកអរនឹងរីករាយចេញពីចិត្តពិតៗនៅពេលដែលឃើញអ្នករីកចម្រើនរុងរឿង មានមោទនភាពពេលឃើញអ្នកជោគជ័យ។ ព្រោះជាការពិតមនុស្សជាច្រើនចង់ឱ្យយើងល្អ ប៉ុន្តែមិនមែនចង់ឱ្យយើងល្អជាងគេទេ តែប្រសិនបើមិត្តអ្នកមិនគិតរឿងល្អជាង ឬលើសខ្វះ គេជាមិត្តល្អបំផុតហើយដែលអ្នកមានសំណាងបានជួប។
ដូចសម្តេចសង្ឃរបស់កម្ពុជាគឺ សម្តេចព្រះសង្ឃរាជ ជោតញ្ញាណោ ជួន ណាត សម្តេចតែងមានសង្ឃដីកាយ៉ាងដូច្នេះថា៖ “គប់ពាលរែងរាលទៅរកខុស គប់ប្រាជ្ញស្រីប្រុសរែងបានត្រូវ គប់មិត្តអបលក្ខណ៍រែងអាស្រូវ ខុសត្រូវកើតពីការសេពគប់”។