ពេទ្យប្រាប់! មានសញ្ញានេះញឹកញាប់ពេលរដូវ បង្ហាញថាអ្នកកំពុងប្រឈមកើតជំងឺគីសដៃស្បូន
យោងតាមរយៈការចែករំលែករបស់វេជ្ជបណ្ឌិត ទេព សម្ភស្ស ទាក់ទងនឹងវិធីការពារជំងឺគីសដៃស្បូន មូលហេតុដែលបង្កជំងឺនេះ និងមនុស្សស្រីក្នុងវ័យណាខ្លះដែលអាចប្រឈមកើតជំងឺគីសដៃស្បូនត្រូវប្រយ័ត្ន។ អ្វីដែលកាន់តែពិសេស១ទៀត តើរបបអាហារបែបណាខ្លះជួយការពារ និងរបបអាហារណាខ្លះដែលធ្វើឱ្យមនុស្សស្រីប្រឈមកើតជំងឺគីសដៃស្បូន?
អាស្រ័យហេតុនេះហើយសូមបងប្អូនស្រីៗអានអត្ថបទនេះឱ្យចប់ ដើម្បីទទួលបានចំណេះដឹង ទាក់ទងនឹងការការពារជំងឺគីសដៃស្បូន និងរបបអាហារដែលត្រូវតែចៀសវាង។
ក្នុងនោះផងដែរ វេជ្ជបណ្ឌិត ទេព សម្ភស្ស ជាប្រធានផ្នែកសម្ភព និងរោគស្រ្តី នៅមន្ទីរពេទ្យកុមារដំរី បានពន្យល់ថាស្រ្តីគ្រប់វ័យគឺអាចកើតជំងឺគីសដៃស្បូន គ្រាន់តែស្រ្តីក្នុងវ័យបន្តពូជគឺប្រឈមកើតច្រើនជាងគេចាប់ពីគាត់មានអាយុ១៤ឆ្នាំ រហូតដល់៤៧ឆ្នាំ។ ចំពោះកត្តាជាច្រើនដែលអាចបង្កឱ្យមានគីសដៃស្បូន គឺមានកត្តាពីកំណើតការលូតលាស់របស់កោសិកាពីកំណើតមិនធម្មតាខុសពីគេ លូតលាស់មិនល្អ កើតជំងឺមហារីកមកតាំងពីកំណើតជាដើម។ កត្តាមួយទៀតគឺស្រ្តីដែលចូលចិត្តញុំារបបអាហារដែលសម្បូរជាតិផ្អែមខ្លាំង ជាតិខ្លាញ់ កាបូអ៊ីដ្រាត អាហារសម្បូរជាតិអរម៉ូន ជាតិគីមីច្រើន គឺធ្វើឱ្យគាត់ប្រឈមជាមួយជំងឺគីសដៃស្បូនហើយ។
មួយវិញទៀត វេជ្ជបណ្ឌិតក៏បានប្រាប់ពីរោគសញ្ញាដូចជា៖ ជាធម្មតាបើគីសដៃស្បូននៅតូចគឺគាត់មិនអាចដឹងទេ តែបើគីសដុំគឺអាចចេញជារោគសញ្ញាដូចជា ឈឺក្នុងនោះទេ ឈឺពេលមករដូវ អត់មករដូវក៏ឈឺដូចគ្នា ជូនកាលអាចធ្លាក់ឈាមខុសធម្មតា បើខ្លះទៀតអាចធ្វើឱ្យស្រ្តីទល់លាមកបើគីសធំវាសង្កត់ទៅលើពោះវៀនធំ បើវាសង្កត់លើប្លោកនោមអាចធ្វើឱ្យស្រ្តីគាត់ឈឺនោមញឹកញាប់ ជួនកាលក៏អាចស្ទារទឹកនោមទៅក្រលៀនធ្វើឱ្យខូចក្រលៀន ក្នុងករណីគីសដៃស្បូននឹងធំមែនទែន។ មួយវិញទៀតស្ត្រីដែលគាត់គ្មានកូនហើយក៏មកពិនិត្យក៏រកឃើញថាគាត់មានគីសដៃស្បូន អ៊ីចឹងហើយវេជ្ជបណ្ឌិតបានបញ្ជាក់ថា គីសដៃស្បូននេះហើយគឺធ្វើឱ្យមានការរារាំងការមានកូនបាន។លើសពីនេះដើម្បីដឹងថាស្រ្តីមាន ជំងឺគីសដៃស្បូនឬអត់គឺវេជ្ជបណ្ឌិតបានបញ្ជាក់ថាដើម្បីដឹងថាកើតអត់គឺទាមទារការពិនិត្យគឺអាចរកឃើញហើយ។
ជាចុងក្រោយវេជ្ជបណ្ឌិត បានបញ្ជាក់ថា ស្រ្តីដែលមករដូវមាអាការឈឺចុកចាប់ខ្លាំង គឺជាសញ្ញាមួយដែលបញ្ជាក់ថាគាត់គឺប្រឈមជាមួយជំងឺគីសដៃស្បូនភាគច្រើន។ ដូច្នេះប្រសិនណាស្រ្តីមានរោគសញ្ញាទាំងនេះញឹកញាប់គួរប្រញាប់មកជួបពេទ្យជំនាញដើម្បីប្រឹក្សាជាមួយពេទ្យឱ្យបានទាន់ពេល ចៀសវាងគីសដៃស្បូន វិវត្តន៍ទៅជាជំងឺមហារីកប្រឈមគ្រោះថ្នាក់ដល់អាយុជីវិតបាន៕
អត្ថបទដោយ៖ ប៉ែត ធីតា