តាមលោកវេជ្ជបណ្ឌិត ផាម ក្វាង ខាយ ជាអ្នកឯកទេសផ្នែកប្រព័ន្ធទឹកនោមនៅមន្ទីរពេទ្យវៀតណាម បានឱ្យដឹងថា ពេលអ្នកថែតម្រងនោមបានល្អ តម្រងនោមមានសមត្ថភាពឆ្លើយតបឱ្យរាងកាយអ្នកមានដំណើរការស្រួលដែរ។ មនុស្សជាច្រើនបានបំផ្លាញតម្រងនោមដោយទម្លាប់មួយចំនួនដូចជាការផឹកស្រា និងភេសជ្ជៈផ្អែមៗ… ពេលអ្នករងពីជំងឺតម្រងនោមអស់រយៈពេលយូរ ក៏អ្នកអត់ដឹងខ្លួនដែរ។ ពេលរោគសញ្ញាលេចឡើង ជំងឺនេះស្ថិតក្នុងដំណាក់កាលចុងក្រោយបាត់ទៅហើយ។ ហើយលោកគ្រូពេទ្យចង្អុលបង្ហាញរោគសញ្ញាពីជំងឺតម្រងនោមទាំង ៤នេះ ដែលមនុស្សភាគច្រើនមើលរំលង៖
១. នោមញឹកញាប់ជាងធម្មតានៅពេលយប់៖ ពីមុនអ្នកមិនបានភ្ញាក់ពីដំណេកដើម្បីបត់ជើងតូចទេ ប៉ុន្តែពេលថ្មីៗនេះអ្នកភ្ញាក់ពីដំណេក ២ទៅ៣ដងជារៀងរាល់យប់។ មនុស្សជាច្រើនគិតថាវាបណ្តាលមកពីការផឹកទឹកច្រើនពេក ឬខ្លួនមានអាយុច្រើន ប៉ុន្តែនេះអាចជាសញ្ញាមួយដែលបង្ហាញថាតម្រងនោមរបស់អ្នកចាប់ផ្តើមបាត់បង់សមត្ថភាពក្នុងការប្រមូលផ្តុំទឹកនោមហើយ។
២. ទឹកនោមខុសមិនប្រក្រតី៖ ទឹកនោមរបស់អ្នកមានពពុះស្រដៀងទៅនឹងពពុះស្រាបៀរដែរ។ ទឹកនោមមានឈាមក្នុងទឹកនោម ទឹកនោមពណ៌ផ្កាឈូក ឬពណ៌តែ ហើយបរិមាណទឹកនោមកើនឡើង ឬថយចុះខុសពីធម្មតា។ ទាំងនេះអាចជាសញ្ញានៃការបាត់បង់ប្រូតេអ៊ីនតាមរយៈទឹកនោម ឬការខូចខាតដល់ក្រពេញជាដើម។
៣. ហើមស្រាលៗនៅលើមុខ ឬជើង៖ ត្របកភ្នែកហើមបន្តិចនៅពេលអ្នកភ្ញាក់ពីដំណេក មានការហើមកជើង ឬបាតជើងបន្តិចបន្តួចនៅពេលល្ងាចជាដើម នេះជាសញ្ញាព្រមានពីស្ថានភាពដែលមនុស្សភាគច្រើនមើលរំលង។
៤. ចេះតែអស់កម្លាំង និងកាត់បន្ថយការផ្តោតអារម្មណ៍ខុសពីធម្មតា៖ អ្នកមានអារម្មណ៍អស់កម្លាំងជាងមុន មានការផ្តោតអារម្មណ៍មិនល្អនៅកន្លែងធ្វើការ ហើយជារឿយៗ ចេះតែងងុយគេង។ នេះអាចបណ្តាលមកពីតម្រងនោមកាត់បន្ថយការផលិតអរម៉ូនដែលបង្កើតកោសិកាឈាមក្រហម ដែលនាំឱ្យមានភាពស្លេកស្លាំង៕ អត្ថបទដោយ៖ ទ្រ សុភាព