យោងតាមមន្ទីរពេទ្យកាល់ម៉ែត - Calmette Hospital បានលើកឡើងថា ក្រដាសត្រចៀកគឺជាបំណែកស្តើងនៃជាលិកាដែលបែងចែករវាងរន្ធត្រចៀកនិងត្រចៀកកណ្តាល វាដើរតួនាទីយ៉ាងសំខាន់ក្នុងការស្តាប់ដោយការបញ្ជូនរំញ័រសំឡេង។ ការរហែកក្រដាសត្រចៀក គឺជាការដាច់ធ្លុះបង្កើតជាប្រហោងលើជាលិកានៃក្រដាសត្រចៀក។
១. មូលហេតុទូទៅនៃការរហែកក្រដាសត្រចៀក៖
- ការឆ្លងមេរោគត្រចៀកកណ្តាលនេះគឺជាមូលហេតុចម្បង។
- ការផ្លាស់ប្តូរសម្ពាធខ្លាំងឬ ហៅថា "barotrauma"។
- របួសត្រចៀក
- ការប៉ះដោយផ្ទាល់លើក្រដាសត្រចៀក ដូចជាប៉ះដោយសារសំឡីត្បារ ឬវត្ថុផ្សេងៗ អាចធ្វើឱ្យធ្លុះក្រដាសត្រចៀក។
២. រោគសញ្ញា៖ ការរហែកត្រចៀក ពេលខ្លះមិនមានរោគសញ្ញាទេ។ ប៉ុន្តែរោគសញ្ញាអាចរួមមាន៖
- ឈឺត្រចៀក ពេលខ្លះអាចធូរស្រាលក្រោយការរហែកឬធ្លុះ ក្រដាសត្រចៀក
- ការបាត់បង់ការស្តាប់ ដែលអាចជាបណ្តោះអាសន្ន ឬជាអចិន្ត្រៃយ៍
- ការហូរទឹកចេញពីត្រចៀក (ទឹកថ្លា ខ្ទុះ ឬមានឈាម)
- សំឡេងរោទ៍ ហឹង (លឺក្នុងត្រចៀក)
- វិលមុខ ជាដើម
ទោះជាយ៉ាងណាក៏ដោយប្រសិនបើការរហែកមានទំហំធំមិនជាសះស្បើយដោយខ្លួនឯងនិងមានការហូរទឹករឺខ្ទុះជាប់ជាប្រចាំបូកផ្សំការស្តាប់ធ្លាក់ចុះសូមអញ្ជើញមកជួបពិភាក្សាជាមួយក្រុមវេជ្ជបណ្ឌិតជំនាញ ផ្នែកឯកទេសត្រចៀក ច្រមុះ និងបំពង់ក នៃមន្ទីរពេទ្យកាល់ម៉ែត ដើម្បីទទួលបានការប្រឹក្សាលំអិតបន្ថែម និងការព្យាបាលទៅតាមស្ថានភាពជំងឺប្រកបដោយជោគជ័យ!" ។