លោក Zee Ali ឥឡូវនេះ! គាត់ក្លាយជាអ្នកជំនាញសុខភាព និងកាយសម្បទា បានចែករំលែកពីរបៀបដែលគាត់បានស្រកទម្ងន់ ២៥គីឡូក្រាមដោយជោគជ័យក្នុងរយៈពេលត្រឹមតែ 6 ខែប៉ុណ្ណោះ។ នៅក្នុងការបង្ហោះមួយនៅលើ Instagram ផ្ទាល់ខ្លួនរបស់គាត់ថា ការអនុញ្ញាតឱ្យរាងកាយរបស់អ្នកចូលទៅក្នុងស្ថានភាពឃ្លាន ធ្វើឱ្យអ្នកចង់ហូបអាហារលឿនរហ័សៗ ជាពិសេសអាហារកែច្នៃ។​

ទម្លាប់ទី១. គេងឱ្យបានគ្រប់គ្រាន់ និងទម្លាប់ទី២. ផឹកទឹកឱ្យបានគ្រប់ សរុបខ្លីគឺថា”ការគេង និងទឹកជាអាវុធសម្ងាត់ដុតខ្លាញ់ឱ្យគាត់សម្រេចគោលដៅនៃការស្រកគីឡូ”។ គាត់បានសរសេរថា “រៀងរាល់យប់ ខ្ញុំចូលគេងមុនម៉ោង ១០:៣០ យប់ ហើយរក្សាការទទួលទានទឹកឱ្យបាន ៣ ទៅ ៤ លីត្រក្នុងមួយថ្ងៃ។ ការគេងឱ្យបានគ្រប់គ្រាន់ជួយបង្កើនថាមពល ហើយការផឹកទឹកឱ្យបានគ្រប់គ្រាន់ជួយកាត់បន្ថយការឃ្លាន។ វាសាមញ្ញបែបនេះឯង។ ពេលខ្ញុំមានទម្លាប់បែបនេះ ធ្វើឱ្យជាតិខ្លាញ់ក្នុងខ្លួនរបស់ខ្ញុំកាន់តែស្រក ហើយខ្ញុំបានកំណត់ទម្លាប់នេះ ជាគោលការណ៍របស់ខ្ញុំ។​

គាត់មានគោលការណ៍មួយទៀតគឺមានវិន័យលើការហាត់ប្រាណជាប្រចាំថ្ងៃ។ គាត់មានកាលវិភាគហាត់ប្រាណមួយអាទិត្យ ៥ថ្ងៃទៅ៦ថ្ងៃ ដើម្បីដុតខ្លាញ់បានលឿន។ ហើយគាត់មានភាពអត់ធ្មត់ខ្ពស់ គឺហាត់ប្រាណមួយថ្ងៃ ១ទៅ២ម៉ោងឯណោះ។ គោលដៅរបស់គាត់មិនមែនត្រឹមតែស្រកខ្លាញ់ទេ គឺស្រកខ្លាញ់បង្កើនសាច់ដុំ។ ទម្លាប់សំខាន់ចុងក្រោយគេគឺស្ថិតនៅក្នុងរបបអាហារដែលមានប្រូតេអ៊ីនខ្ពស់មានដូចជាត្រី សាច់ទ្រូងមាន់ សាច់គោ និងផ្លែឈើ និងបន្លៃស្រស់ៗ ដើម្បីសម្រកគីឡូបានលឿន។ គាត់បានធានាថាគាត់ទទួលទានប្រូតេអ៊ីនពី 180 ទៅ 200 ក្រាមជារៀងរាល់ថ្ងៃ។ ប្រូតេអ៊ីននេះជួយរក្សាម៉ាសសាច់ដុំ ទប់ស្កាត់ចំណង់អាហារ ជំរុញការរំលាយអាហារ និងជួយដុតបំផ្លាញជាតិខ្លាញ់ក្បាលពោះបានលឿន៕ អត្ថបទដោយ៖ ទ្រ សុភាព