ពាក្យពេញនិយមនៅលើបណ្ដាញសង្គមអនឡាញ “ចង់សលឿនត្រូវខំខាត់ស្បែក កាន់តែខាត់កាន់តែស្អាត កាន់តែខាត់កាន់តែសលឿន” បើអ្នកទាំងអស់គ្នាកំពុងតែយល់ឃើញបែបនេះ ឬក៏១សប្ដាហ៍ខាតស្បែក៤ ៥ដង ដើម្បីឱ្យស្បែកស្អាត គួរតែបញ្ឃប់គំនិតនេះទៅ ប្រយ័ត្នតែខ្ទេចរនាំងការពារស្បែកអស់។

ជាការពិត ទទួលស្គាល់ថាការខាត់ស្បែក ឬជម្រុះកោសិកាចាស់ ជាផ្នែកមួយជួយឱ្យស្បែកស្អាត តែក៏មិនមែនមានន័យថា ខាត់ច្រើនពេកទេ។ ជម្រុះកោសិកាចាស់កាន់តែច្រើន រនាំងការពារស្បែកកាន់តែប្រឈមនឹងខូច ស្បែកនឹងកាន់តែខ្សោយ កាន់តែរលាក ងាយកើតមានបញ្ហាស្បែក មិនថាមុន ស្ដើង អាចមរុយ ជាំ ក៏អាចនឹងកើតបន្តបន្ទាប់ដូចគ្នា ព្រោះតែការជម្រុះស្បែកច្រើនជ្រុល ឬហៅថា Over Exfoliate។

ករណីមួយទៀត បើស្ត្រាប់ឬផលិតផលជម្រុះកោសិកាចាស់ ដែលអ្នកទាំងអស់គ្នាប្រើមានជាតិកាត់ ជាតិអាស៊ីតច្រើន មានសារធាតុជម្រុះកោសិកាចាស់ក្នុងកំហាប់ដែលខ្ពស់ ឬក៏អាចស្ត្រាប់រឹង ក្រើមខ្លាំងទៀតនោះ រឹតតែធ្វើឱ្យស្បែកខ្សោយកាន់តែលឿន ទោះជាស្បែកខ្លួនក្រាស់ក៏ដោយក៏ទប់លែងជាប់ដែរ បើយើងគិតតែពីជម្រុះកោសិការហូត។

ជាទូទៅគួរតែជម្រុះកោសិកាចាស់ត្រឹម១ទៅ២ដងក្នុង១សប្ដាហ៍ម្ដង ឬ១០ថ្ងៃម្ដង ឬតិចជាងតិចបើស្បែកខ្សោយ ហើយគួរតែប្រើផលិតផលជម្រុះកោសិកាចាស់ ប្រភេទ Gentle Exfoliate តែបើស្បែកកំពុងតែប្រតិកម្ម រលាក ឬBreakout ហាមជម្រុះកោកសិកាចាស់គួរដោះស្រាយបញ្ហាទាំងអស់នោះសិន។ រឿងសំខាន់មួយទៀត ក្រោយពីជម្រុះកោសិកាចាស់រួច កុំភ្លេចលាបគ្រែមផ្ដល់សំណើមឱ្យស្បែកវិញភ្លាម ព្រោះស្បែកនឹងស្ងួតជាងធម្មតាបន្ទាប់ពីខាត់រួច និងមុនពេលចេញក្រៅដាច់ខាតត្រូវតែលាបឡេការពារកម្ដៅថ្ងៃមានSPF ចាប់ពី៣០+ និងមានPA +++ ផងដែរ៕

អត្ថបទដោយ៖ សេងហុង-Senghong