អ្នកចិត្តសាស្ត្រ Jean Twenge ដែលជាអ្នកស្រាវជ្រាវអំពីអន្តរបុគ្គលភាពនិងឥទ្ធិពលបច្ចេកវិទ្យាលើយុវវ័យ បានបញ្ជាក់ថា កុមារដែលទទួលបានទូរស័ព្ទឬចូលប្រើបណ្តាញសង្គមទាំងវ័យក្មេងពេក មានហានិភ័យខ្ពស់ក្នុងការបង្កើតបញ្ហាផ្លូវចិត្ត ដូចជា ការថប់បារម្ភ បាក់ទឹកចិត្ត ឬអាចធ្ងន់ធ្ងរដល់ថ្នាក់ធ្វើអត្តឃាតខ្លួនឯង។ ក្នុងសៀវភៅថ្មីរបស់ Jean Twenge ដែលមានចំណងជើងថា “10 Rules for Raising Kids in a High-Tech World” បានណែនាំឪពុកម្តាយឱ្យយកចិត្តទុកដាក់ជាពិសេសមុននឹងផ្តល់ឧបករណ៍បច្ចេកវិទ្យាទាំងនេះឱ្យកូនៗ។

នាងពន្យល់ថា មិនមានន័យថាឪពុកម្តាយត្រូវហាមឃាត់កូនមិនឱ្យប្រើទូរស័ព្ទ ឬបណ្តាញសង្គមទេ។ ប៉ុន្តែត្រូវរៀនបង្រៀនពួកគេឱ្យប្រើវាយ៉ាងសុវត្ថិភាព និងមានស្មារតីទទួលខុសត្រូវ។ ការបណ្តុះទម្លាប់ល្អៗតាំងពីកូននៅក្មេងបែបនេះអាចជួយឱ្យកុមារយល់ដឹងពីគ្រោះថ្នាក់នៃពិភពអនឡាញ ហើយអាចប្រើបច្ចេកវិទ្យាដោយយល់ដឹង និងមានសុខភាពផ្លូវចិត្តល្អ។

Twenge ណែនាំឪពុកម្តាយឱ្យចាប់ផ្តើមសន្ទនាជាមួយកូនតាំងពីពួកគេនៅវ័យក្រោម ១០ ឆ្នាំ ប្រសិនបើពួកគេបានចាប់ផ្តើមប្រើឧបករណ៍អេឡិចត្រូនិកដែលភ្ជាប់អ៊ីនធឺណិត ដូចជា ថេប្លេត ឬកុំព្យូទ័រ។ ការពិភាក្សាពីសុវត្ថិភាពអនឡាញ អាចជួយឱ្យកូនរៀនការពារខ្លួនពីអ្វីៗដែលអាចប៉ះពាល់ដល់ជីវិតផ្ទាល់ខ្លួន។ ឧទាហរណ៍ ឪពុកម្តាយគួរបង្រៀនកូនអំពីអ្វីដែលមិនគួរចែករំលែកតាមអ៊ីនធឺណិត ដូចជា រូបភាពផ្ទាល់ខ្លួន ព័ត៌មានសម្ងាត់ ឬលេខសម្គាល់សង្គម។ ពួកគេគួរយល់ថា អ្វីដែលដាក់បង្ហោះលើអ៊ីនធឺណិតមិនដែលជាឯកជនទេ ហើយអាចត្រូវបានចែករំលែក ឬរកឃើញឡើងវិញគ្រប់ពេល។

ក្រៅពីបង្រៀនអំពីសុវត្ថិភាពអនឡាញ Twenge ក៏បានផ្តោតលើការបង្រៀនកូនឱ្យយល់អំពីតម្លៃនៃពេលវេលាដែរ។ នាងបញ្ជាក់ថា កុមារជាច្រើននៅសម័យបច្ចេកវិទ្យានេះ ចំណាយពេលយូរណាស់នៅមុខអេក្រង់ ជំនួសឱ្យការចំណាយពេលលេង ឬនិយាយជាមួយមិត្តភក្តិ និងគ្រួសារ។ ការអប់រំឱ្យកូនដឹងថា “ពេលវេលាជាធនធានដ៏មានតម្លៃ” នឹងជួយឱ្យពួកគេចេះគ្រប់គ្រងពេលវេលារបស់ខ្លួន យល់ពីសារៈសំខាន់នៃជីវិតពិត និងរកសមាមាត្ររវាងជីវិតលើអនឡាញនិងជីវិតពិត៕

អត្ថបទដោយ៖ សារួ