ថ្លើមមានមុខងារសំខាន់ៗ មួយចំនួនដូចជា ការបន្សាបជាតិពុល គ្រប់គ្រងកម្រិតជាតិស្ករក្នុងឈាម និងផលិតទឹកប្រមាត់ដើម្បីជួយដល់ការរំលាយអាហារ។ បើមុខងារថ្លើមត្រូវបានចុះខ្សោយ បណ្តាលឱ្យមានប្រតិកម្មប៉ះពាល់ដល់សរីរាង្គជាពិសេសជាតិពុល និងខ្លាញ់កើនឡើងក្នុងខ្លួនរបស់អ្នក។ ហើយពេលថ្លើមខ្លាញ់បង្កើនមានហានិភ័យនៃគ្រួសក្នុងថង់ទឹកប្រមាត់។ យោងតាមគេហទំព័រ The Times of India នេះជាទម្លាប់ទាំង ៣នេះថែថ្លើមបណ្តេញជាតិពុល និងជាតិខ្លាញ់ចេញេពីរាងកាយ៖
១. វិធីសាមញ្ញមួយថែរក្សាថ្លើមរបស់អ្នកឱ្យមានសុខភាពល្អ និងដំណើរការល្អ គឺការធ្វើលំហាត់ប្រាណ។ ពេលអ្នកចាប់ផ្តើមធ្វើលំហាត់ប្រាណជាមួយលំហាត់សាមញ្ញដូចជាការដើរ ការត់តិច និងហាត់ Gym រយៈពេល 20នាទីនាំឱ្យថ្លើមរបស់អ្នកប្រសើរឡើង។ ព្រោះលំហាត់ប្រាណទៀងទាត់ជួយកាត់បន្ថយខ្លាញ់ក្នុងថ្លើមយ៉ាងល្អបំផុត។
២. ផឹកកាហ្វេដាក់ស្ករតិច(ស្ករ៤០% ២០% និង០%) ជួយឱ្យថ្លើមមានជាតិខ្លាញ់ល្អកើន ធ្វើឱ្យសរសៃឈាមមានការដំណើរការស្រួលទៅកាន់ខួរក្បាល ជួយកាត់បន្ថយជំងឺក្រិនថ្លើម និងការពារហានិភ័យជំងឺមហារីកថ្លើមយ៉ាងពិសេសទៀត។ អ្នកគួរផឹកកាហ្វេ ១ទៅ៣កែវក្នុងមួយថ្ងៃដើម្បីទទួលបានអត្ថប្រយោជន៍ពីជាតិកាហ្វេអ៊ីន។ កាហ្វេល្អសម្រាប់ថ្លើមអ្នកគួរផ្តល់អាទិភាពដល់កាហ្វេខ្មៅដោយគ្មានជាតិស្ករ ហើយជៀសវាងការបន្ថែមជាតិស្ករ ឬទឹកដោះគោច្រើនលើសកម្រិតព្រោះវាអាចផ្តល់ផលអាក្រក់ដល់ថ្លើមទៅវិញទេគឺស្ករច្រើនកើនជាតិខ្លាញ់ក្នុងថ្លើម។
៣. ទម្លាប់ដើរចេញពីស្រា ដូចជាដើរចេញពីជំងឺឱ្យថ្លើមមានសុខភាពល្អដែរ។ ព្រោះស្រាជាមិត្តនឹងជំងឺមហារីក ខូចសតិខួរក្បាល និងខូចថ្លើមជាដើម។ បើយោងតាមរយៈការចែករំលែករបស់វេជ្ជបណ្ឌិត ម៉ក់ សុភក្តិ បានចែករំលែកខ្លះៗមកថា មូលហេតុដែលអ្នកជំងឺអាចកើតមានបញ្ហាជំងឺក្រិនថ្លើមដោយមិនដឹង មកពីការទទួលទានគ្រឿងស្រវឹងច្រើនជាប្រចាំ។ មូលហេតុចម្បងផ្សេងទៀត គឺការឆ្លងមេរោគថ្លើមប្រភេទB និងប្រភេទC ហើយបើមិនមានមេរោគទាំង២នេះក្នុងខ្លួនរួចហើយបូករួមទាំងផឹកគ្រឿងស្រវឹងច្រើនទៀតគឺនឹងក្រិនថ្លើមកាន់តែលឿនបំផុត។ ប្តូរពីការផឹកស្រា មកផឹកកាហ្វេ និងទឹកវិញ ល្អដល់សុខភាពថ្លើម៕ អត្ថបទដោយ៖ ទ្រ សុភាព