បើអ្នកហូបអាហារមិនគិតពីសុខភាពទេ អនាគតអ្នកនឹងប្រមូលជំងឺចូលក្នុងខ្លួនមិនខានទេ។ មានអ្នកខ្លះល្ងាចមិនទាន់ទេផឹកស្រារហូត ហើយពួកគាត់និយាយថា មុនស្លាប់ត្រូវសប្បាយឱ្យអស់ចិត្ត ប៉ុន្តែជីវិតជាក់ស្តែងមិនទាន់ស្លាប់ផង វេទនារស់ក្នុងជំងឺខូចថ្លើម ជំងឺបេះដូង និងជំងឺក្រពះ ខ្លួនដេកនៅផ្ទះទេ តែលំបាកដល់គ្រួសារ...(អ្នកផឹកជាមួយគ្នា ពេលអ្នកមានជំងឺ តើនរណាជួយចេញលុយថ្លៃព្យាបាល?)។ គិតពីគ្រួសារ គិតពីលុយ និងសុខភាព អ្នកឈប់ផឹកស្រា ហើយកុំរំលងផ្លែឈើខ្មែរ ១នេះឱ្យសោះ។ តាមគេហទំព័រ Healthline និងWebMD ថាផ្លែចេកជួយសុខភាពរបស់អ្នកច្រើនមុន។
ចាស់ៗ ខ្មែរយើងតែងប្រាប់ថា ហូបបាយរួច កុំឱ្យឈឺក្រពះនិងសុខភាពល្អ ហូបចេកមួយឬពីរផ្លែ។ ព្រោះផ្លែចេកមានគុណប្រយោជន៍ជួយពង្រឹងប្រព័ន្ធរំលាយអាហារ ដើម្បីកម្ចាត់បាក់តេរីចេញពីក្នុងក្រពះ ព្រមទាំងកាត់បន្ថយជាតិអាស៊ីតថែមទៀត។ ហើយផ្លែចេកសម្បូរជាតិសរសៃដើម្បីជួយសម្រួលដល់ការបន្ទោរបង់ និងកុំឱ្យទល់លាមក។
ហើយផ្លែចេកក៏មានសារជាតិ pectin ជួយកាត់បន្ថយជាតិខ្លាញ់ ឱ្យអ្នកសម្រកគីឡូ និងគ្រប់គ្រងកម្រិតជាតិស្ករក្នុងឈាមបន្ទាប់ពីអ្នកហូបអាហាររួច។ នៅក្នុងផ្លែចេកមានសារធាតុរ៉ែល្អដូចជាប៉ូតាស្យូមជួយបន្ថយសម្ពាធឈាម និងផ្តល់អត្ថប្រយោជន៍ដល់សុខភាពបេះដូង។ សម្រាប់ម៉ាញ៉េស្យូមជាសារធាតុរ៉ែគ្រប់គ្រងសម្ពាធឈាម និងកម្រិតជាតិស្ករក្នុងឈាមបង្កើតឆ្អឹងឱ្យរឹងមាំ។
ផ្លែចេកមានជាតិវីតាមីនB6 ដែលជួយរាងកាយអ្នកមានថាមពលពេញមួយថ្ងៃ។ មកពីវីតាមីន B6 ជួយដល់ប្រព័ន្ធរំលាយអាហារ មានដើរតួនាទីយ៉ាងសំខាន់ក្នុងការអភិវឌ្ឍខួរក្បាល ជួយសម្រួលអារម្មណ៍ឱ្យស្ងប់មុនចូលគេង និងសម្រកគីឡូបានលឿន។ សម្រាប់អ្នកមានជំងឺទឹកនោមផ្អែមគួរជៀសវាងការហូបចេកទុំច្រើនពេក។ វាកើនកម្រិតជាតិស្ករក្នុងឈាម៕ យោងតាមគេហទំព័រ Healthline, WebMD