១. លាងមុខជាប្រចាំ ពេលព្រឹក ល្ងាច និងក្រោយហាត់ប្រាណ៖ ការលាងមុខគឺជាជំហានសំខាន់បំផុតក្នុងការថែរក្សាស្បែក។ ដូចជាពេលយប់ ធូលី បាក់តេរី និងប្រេងអាចកើតឡើងនៅលើមុខ ដូច្នេះការលាងមុខពេលព្រឹកនឹងជួយសម្អាតស្បែកដែលជាប់ធូលីសល់ពីយប់។  ពេលល្ងាច ការលាងមុខជួយយកសារធាតុគីមី ពោលគឺគ្រឿងសម្អាង ឬធូលីចេញ។ ការរលាងមុខក្រោយហាត់ប្រាណរួច ក៏សំខាន់ដែរព្រោះញើសអាចជាប់នៅក្នុងរន្ធញើស ហើយធ្វើឱ្យស្ទះ។ តែចាំថា កុំលាងមុខញឹកញាប់ពេក ឬប្រើសាប៊ូខ្លាំងពេក ព្រោះវាអាចធ្វើឱ្យស្បែកស្ងួត ហើយរាងកាយនឹងផលិតប្រេងច្រើនជាងមុន ធ្វើឱ្យងាយឡើងមុនលើសដើម។

២. ប្រើម៉ាសបកមុន ឬស្ទីមមុខដោយប្រុងប្រយ័ត្ន៖ ម៉ាសបកមុនអាចជួយយកជាតិប្រេង និងស្បែកងាប់លើផ្ទៃមុខចេញបានភ្លាមៗ ប៉ុន្តែវាមិនអាចរារាំងការកើតឡើងវិញនៃមុនក្បាលខ្មៅទេ។ មុននឹងប្រើវា អ្នកអាចសាកល្បងស្ទីមមុខជាមុន ដោយបង្ហាប់មុខជិតទឹកក្តៅឧណ្ហៗ ដើម្បីបើករន្ធញើស។ ប៉ុន្តែត្រូវប្រយ័ត្នកុំឱ្យក្តៅពេក ដើម្បីជៀសវាងការរលាក។ ម៉ាសបកមុនអាចជួយសម្អាតបានបណ្ដោះអាសន្ន ប៉ុន្តែមិនគួរប្រើញឹកញាប់ ព្រោះវាអាចយកប្រេងធម្មជាតិដែលមានប្រយោជន៍ចេញ ហើយធ្វើឱ្យស្បែកស្ងួត និងរលាក។

៣. ប្រើឡេការពារកម្តៅថ្ងៃ (Sunscreen) ដែលមិនមានប្រេង៖ មនុស្សជាច្រើនគិតថា ឡេការពារកម្តៅថ្ងៃនឹងធ្វើឱ្យស្បែកឡើងខ្លាញ់ជាងមុន ប៉ុន្តែនោះជាការយល់ច្រឡំ។ សូម្បីតែស្បែកដែលងាយកើតមុន ក៏ត្រូវការការពារពីកាំរស្មី UVA និង UVB ដែរ។ ពេលស្បែកត្រូវកាំរស្មីព្រះអាទិត្យ វាអាចបង្កជាការរលាក ធ្វើឱ្យស្បែកកាន់តែខ្លាញ់ និងបង្កើតមុនកាន់តែច្រើន។ ត្រូវជ្រើសរើសឡេការពារកម្តៅថ្ងៃដែលមានសរសេរថា “Oil-free” ឬ “Non-comedogenic” ដើម្បីជៀសវាងការស្ទះរន្ធញើស។

៤. ខាត់ស្បែកដោយប្រើអាស៊ីត AHAs និង BHAs៖ ការខាត់ស្បែកជួយយកកោសិកាស្បែកដែលងាប់ចេញ ធ្វើឱ្យស្បែករលោង និងជួយឱ្យផលិតផលផ្សេងៗជ្រាបចូលបានល្អ។ ជំនួសឱ្យការខាត់ស្បែកដោយគ្រឿងរឹងៗ អ្នកអាចប្រើថ្នាំបន្សាបជាតិគីមីដែលមានសារធាតុអាស៊ីតអាល់ហ្វា និងបេតាអ៊ីដ្រូស៊ីត (AHAs និង BHAs)។ អាស៊ីត salicylic ដែលជាប្រភេទ BHA អាចជួយសម្អាតរន្ធញើសពីខាងក្នុង ព្រោះវារលាយក្នុងប្រេង។ ខណៈដែល AHAs ដូចជា glycolic ឬ lactic acid ជួយធ្វើឱ្យស្បែកស្រស់ថ្លា។ តែចាំថា បន្ទាប់ពីប្រើផលិតផលបែបនេះ ត្រូវលាបឡេការពារកម្តៅថ្ងៃឱ្យជាប់ ព្រោះស្បែកនឹងងាយរងប្រតិកម្មពីកាំរស្មីជាងមុន។

ដូច្នេះ មុនក្បាលខ្មៅនៅលើច្រមុះជាបញ្ហាធម្មតា ប្រសិនបើយើងយកចិត្តទុកគឺយើងអាចដោះស្រាយវាបានដោយខ្លួនឯង តាមរយៈការថែរក្សាស្បែកជាប្រចាំ និងជ្រើសរើសផលិតផលដែលត្រូវជាមួយស្បែក។ ការលាងមុខឱ្យបានស្អាតល្អ ការប្រើឡេការពារកម្តៅថ្ងៃដែលមិនមានជាតិប្រេង ការខាត់ស្បែកដោយមានសារធាតុ AHAs/BHAs និងការប្រើ Retinoids ឬអាស៊ីត salicylic អាចជួយសម្អាត ផ្ចិតរន្ធញើស និងធ្វើឱ្យស្បែករលោងស្អាតឡើងវិញ។ ប្រសិនបើអ្នកមានមុនក្បាលខ្មៅច្រើន ឬមិនប្រាកដចំពោះផលិតផលណាមួយ គួរទៅពិគ្រោះជាមួយវេជ្ជបណ្ឌិតជំនាញខាងសើស្បែក ដើម្បីទទួលបានដំណោះស្រាយសុវត្ថិភាព និងមានប្រសិទ្ធភាពបំផុត៕

អត្ថបទដោយ៖ សារួ