ស្រ្តីកើតជំងឺមហារីកដៃស្បូនជាបញ្ហាធំក្នុងជីវិត។ ជំងឺមហារីកដៃស្បូនអាចកើតឡើងពេលកោសិកានៃដៃស្បូនបានកកើតទៅជាដុំសាច់មួយដ៏កាចសាហាវ។ ហើយវាអាចសម្លាប់មនុស្សស្រីអស់ជាច្រើននាក់ថែមទៀត។ ហើយក៏ត្រូវបានគេដាក់ឈ្មោះជំងឺនេះថា ជំងឺឃាតករលាក់មុខ។ ហើយវាមិនងាយបង្ហាញពីរោគសញ្ញា និងពិបាកក្នុងការពិនិត្យណាស់។ តាមមន្ទីរពេទ្យកាល់ម៉ែត - Calmette Hospital បានលើកឡើងថា ជំងឺមហារីកដៃស្បូន ( Ovarian cancer) ជាជំងឺមហារីកដែលអាចកើតនៅលើដៃស្បូនរបស់ស្ត្រីនៅផ្នែកខាងឆ្វេងឬខាងស្តាំ ឬទាំងសងខាងដែលមានរោគសញ្ញាដូចជា៖
១. ឈឺពោះ ជាពិសេសនៅផ្នែកខាងក្រោមនៃពោះ
២. ហើមពោះខុសពីធម្មតា
៣. វិបត្តិពោះវៀន ដូចជារាគឬទល់លាមកជាប់មិនបាត់
៤. កើនឡើងទំហំពោះ ដូចជាចង្អៀតចង្កេះខុសពីធម្មតា
៥. ពិបាកបត់ជើងតូច ញឹកញាប់
៦. មានធ្លាក់ឈាម អស់កម្លាំងខុសពីធម្មតាជាប់រយះពេលយូរ
៧. បាត់បង់ចំណង់អាហារ
៨. រលាកសរសៃឈាម
៩. កើនឬចុះទម្ងន់ខុសធម្មតា
១០. ឈឺចង្កេះ
ចំពោះកត្តាប្រឈមនឹងជំងឺមហារីកដៃស្បូននេះ មកពីកត្តាតំណពូជមានប្រហែល 10ទៅ 15%។ តាមអាយុចាស់លើសពី ៦០ឆ្នាំ ប៉ុន្តែក៏អាចកើតលើស្ត្រីវ័យក្មេងផងដែរ។ ការមករដូវនៅអាយុក្មេងមុន12ឆ្នាំ ឬអស់រដូវនៅអាយុលើសពី52ឆ្នាំ...។ អ្នកអាចមកការធ្វើរោគវិនិច្ឆ័យជាមួយការធ្វើអេកូពោះ CT ស្កេន ឬ MRI និងការវិភាគកោសិកាសាច់ដោយការច្រឹប ឬដោយការវះកាត់។ សូមអញ្ជើញមកធ្វើការពិនិត្យពិគ្រោះនិងព្យាបាលជាមួយវេជ្ជបណ្ឌិតឯកទេសដើម្បីទទួលបានប្រសិទ្ធភាពនៃការព្យាបាលយ៉ាងពិតប្រាកដនៅមន្ទីរពេទ្យកាល់ម៉ែត៕ អត្ថបទដោយ៖ ទ្រ សុភាព