១.តែខ្មៅជាតែមានសមត្ថភាពដុតខ្លាញ់បានល្អ។ ព្រោះនៅក្នុងតែខ្មៅមានជាតិកាហ្វេអ៊ីនប្រហែល ៤៨ មីលីក្រាមក្នុងមួយកែវ សារធាតុនេះជួយបង្កើនល្បឿនរំលាយអាហារ និងជំរុញឱ្យរាងកាយដុតកាឡូរីកាន់តែច្រើន។ តាមរយៈការសិក្សាមួយឆ្នាំ ២០១៩ ការទទួលទានតែមានផ្ទុកជាតិកាហ្វេអ៊ីនអាចជួយកាត់បន្ថយជាតិខ្លាញ់ និង BMI (ប៉ុន្តែត្រូវញុំាវាក្នុងបរិមាណដែលសមល្មមប៉ុណ្ណោះ)។ នៅក្នុងតែខ្មៅក៏មានសារធាតុ Polyphenols ដែលជាសារធាតុប្រឆាំងអុកស៊ីតកម្មមានសារសំខាន់ក្នុងការការពារជំងឺទឹកនោមផ្អែមប្រភេទទី 2 និងជំងឺបេះដូងថែមទៀត។

២. តែបៃតងជាតែដែលត្រូវបានគេស្គាល់ថាមានប្រយោជន៍យ៉ាងខ្លាំងសម្រាប់សុខភាព វាគាំទ្រដល់ការសម្រកទម្ងន់យ៉ាងមានប្រសិទ្ធភាព។ ជាពិសេសជនជាតិជប៉ុននិយមផឹកតែនេះ មានរាងស្អាតៗ ខ្លាំង។ ព្រោះតែក្នុងតែបៃតងមានសារធាតុម្យ៉ាងឈ្មោះថា Catechin ជាសារធាតុប្រឆាំងអុកស៊ីតកម្មដែលជួយបង្កើនអុកស៊ីតកម្មខ្លាញ់ និងល្បឿនរំលាយអាហារ។ នៅក្នុងតែបៃតង មានជាតិកាហ្វេអ៊ីន ២៩មីលីក្រាមក្នុងមួយកែវ។ ការសិក្សាច្រើនបានបង្ហាញថា ការផឹកតែបៃតងជាប្រចាំអាចជួយកាត់បន្ថយទម្ងន់ និង BMI ប៉ុន្តែត្រូវប្រើពេលបន្តិច លើសពីនេះ តែបៃតងក៏អាចការពារកោសិកាពីរ៉ាឌីកាល់សេរី ដែលជួយបន្ថយហានិភ័យនៃជំងឺរ៉ាំរ៉ៃដូចជាមហារីក និងជំងឺបេះដូងបានដែរ។

3. តែអ៊ូឡុង (Oolong Tea)ជាការរួមបញ្ចូលគ្នារវាងតែខ្មៅ និងតែបៃតង ព្រោះវាត្រូវបាន fermented តែផ្នែកខ្លះ។ មានសារធាតុចិញ្ចឹមច្រើន តែអ៊ូឡុងមានសារធាតុជាង 100 ប្រភេទ រួមទាំង catechins ដែលជួយបង្កើនការដុតខ្លាញ់។ វាអាចជួយការពារការធាត់ និងបន្ថយហានិភ័យជំងឺទឹកនោមផ្អែម។ សម្រាប់អ្នកដែលចង់បានរសជាតិមិនខ្លាំងពេកដូចជា តែខ្មៅ និងមិនស្រាលពេកដូចជា តែបៃតង តែអ៊ូឡុងគឺជាជម្រើសដ៏សម្រាប់អ្នក។

យ៉ាងណាក៏ដោយ ក្រៅពីតែទាំងនេះ តែរុក្ខជាតិដូចជា ខ្ញី, ម្ទេសប្លោក, cinnamon និង hibiscus ក៏អាចជួយលើសុខភាពទូទៅ ការរំលាយអាហារ និងការគ្រប់គ្រងជាតិស្ករ បានដែរ។ ដូច្នេះ ប្រសិនបើអ្នកចង់សម្រកទម្ងន់ ឬរក្សាទម្ងន់ឱ្យមានសុខភាពល្អ ការផឹកតែជាប្រចាំអាចជួយគាំទ្រដល់ដំណើរការនេះបាន។ ការទទួលទានអាហារមានសុខភាពល្អ ការធ្វើលំហាត់ប្រាណ និងការគេងគ្រប់គ្រាន់ នៅតែជាគន្លឹះសំខាន់ដែលអ្នកគួរតែអនុវត្តឱ្យបានជាប្រចាំ៕

អត្ថបទដោយ៖ សារួ