ក្រុមបាល់ទាត់ជម្រើសជាតិកម្ពុជានៅអាយុក្រោម ២២ឆ្នាំជាមួយក្រុមជម្រើសជាតិឥណ្ឌូនេស៊ីនៅយប់ទី១០ ម៉ោង៧នេះ ក្នុងព្រឹត្តិការណ៍កីឡាអាស៊ីហ្គេមលើកទី៣២។ លោក ហុងដា ជាគ្រូបង្វឹកបាល់ទាត់ជម្រើសជាតិកម្ពុជាបានព្យាយាមលើកទឹកចិត្តកីឡាករមុនប្រកួតថា “គ្មានការឈឺចាប់ អ្នកក៏មិនអាចរីកចម្រើនទេ”។ ទោះបីកីឡាករជម្រើសជាតិកម្ពុជាឈ្នះមួយប្រកួត ស្មើមួយ និងចាញ់មួយប្រកួត ប៉ុន្តែលោក ហុងដា បានផ្ញើសារនេះមានន័យធំធេងណាស់ដែលសំដៅអត្ថន័យថា យើងមិនឈ្នះទេ បើយើងខ្វះជំនឿចិត្ត ដើម្បីលើកទឹកចិត្តរបស់ខ្លួនក្នុងការប្រកួតនោះ។ លោក ហុងដា មានឈាមជ័រជាជនជាតិជប៉ុន កម្រឮពាក្យថា “ចុះចាញ់ហើយ” ពេលពួកគេធ្វើរឿងអ្វីមួយ។ អត្ថន័យមួយទៀតលោក ហុងដា ចង់បញ្ជាក់អត្ថន័យឃ្លាខាងលើជូនការលើកទឹកចិត្តដល់កីឡាករថា “ចាញ់លុះត្រាតែចប់ទឹក”។
មុនការប្រកួតជាមួយឥណ្ឌូនេស៊ីនេះ លោក ហុងដា បានបោះសារលើទំព័រហ្វេសប៊ុកផ្លូវការរបស់លោកថា “យើងត្រូវតែជឿលើខ្លួនឯង ទោះវាជាលទ្ធផលតូចតាចក៏ដោយ គឺយើងមិនបោះបង់រហូតដល់ទីបញ្ចប់”។ ទោះបីយើងមានសង្ឃឹមតិចតួចក៏ដោយ ទឹកចិត្តកីឡាករមិនត្រូវបោះបង់វាទេ មានតែការព្យាយាមធ្វើរឿងតូចៗ ហ្នឹងហើយជាផ្លូវរស់នៃអនាគតផ្នែកកីឡា និងផ្លូវឈ្នះ។ ហើយលោកព្យាយាមនិយាយបន្តថា “ខ្ញុំជឿថា ជ័យជម្នះជារង្វាន់នៃការរីកចម្រើនល្អបំផុត”។ កីឡាករខ្លាំង ឈ្នះការប្រកួត ព្រោះតែមានទឹកចិត្តប្រយុទ្ធក្នុងទីលានសមរភូមិ។ កម្លាំងចិត្តជាអាវុធបំពាក់ស្មារតីកីឡាករលេងបានល្អបំផុត។ យើងសង្ឃឹមថា កីឡាករខ្មែរយើងមានក្តីសង្ឃឹម មានថាមពល និងមានទិចនិកលេងទម្រង់បានល្អជាមួយឥណ្ឌូនេស៊ីក្នុងយប់នេះ។ ខ្មែរយើងអាចធ្វើបានល្អបំផុតក្នុងយប់នេះ...។
សូមគួរជម្រាបផងដែរថា ការប្រកួតគ្រាប់បាល់លើសមរភូមិវាលស្មៅដ៏ក្តៅគគុករវាងកម្ពុជា និងឥណ្ឌូនេស៊ីនៅថ្ងៃទី ១០ នៅវេលាម៉ោង៧យប់នេះ។ សូមកុំភ្លេចរង់ចាំទស្សនាឲ្យបានគ្រប់គ្នាណា៎ ដើម្បីជាកម្លាំងចិត្តដល់កីឡាករជម្រើសជាតិកម្ពុជាយើង!
អត្ថបទដោយ៖ ទ្រ សុភាព