ពេលថ្មីៗ នេះកាលពីថ្ងៃពុធ លោកប្រធានាធិបតី Donald Trump បានចុះហត្ថលេខាលើបទបញ្ជាប្រតិបត្តិបិទចន្លោះប្រហោងពាណិជ្ជកម្មឱ្យមានប្រសិទ្ធភាពដល់អាមេរិកចាប់ពីថ្ងៃទី២ ខែឧសភា។ ជាការដាក់សម្ពាធពន្ធនាំចូលទំនិញទៅកាន់អាមេរិកហើយនៅក្នុងនោះមានប្រទេសកម្ពុជាយើងដែរបានជាប់ពន្ធរហូត ៤៩%ឯណោះ។
យោងតាមសារព័ត៌មាន CNBC បានចុះផ្សាយថា ចំពោះផលិតផលឱសថ ឬថ្នាំពេទ្យ ស្ថិតក្នុងចំណោមទំនិញដែលមិនជាប់ពន្ធនាំចូលទៅកាន់អាមេរិកនោះទេ។ នេះយោងតាមសេចក្តីប្រកាសរបស់សេតវិមាន។ សម្រាប់ពេលនេះ ផលិតផលថ្នាំពេទ្យមិនត្រូវបានបង់ពន្ធឱ្យគ្នាទៅវិញទៅមកក៏ដោយ ប៉ុន្តែលោក Trump មិនបានច្រានចោលផែនការរបស់គាត់ក្នុងការដាក់ពន្ធចំពោះថ្នាំពេទ្យនៅក្នុងពេលឆាប់ៗ នោះទេ។ ព្រោះថា ថ្នាំពេទ្យសំខាន់សម្រាប់អាយុជីវិតមនុស្សណាស់។ បើតម្លើងពន្ធវាអាចប៉ះពាល់ដល់មនុស្សឬអ្នកជំងឺច្រើន។ ដូច្នេះហើយ! ថ្នាំពេទ្យជាទំនិញគេលើកលែងពន្ធសិន។
លោក ត្រាំ បានដាក់តាមរយៈបទបញ្ជាប្រតិបត្តិ ត្រូវបានគេរំពឹងថានឹងបង្កឱ្យមានរលកនៃការប៉ះទង្គិចសេដ្ឋកិច្ចជុំវិញពិភពលោក។ សេតវិមានបានចេញបញ្ជីប្រទេសប្រហែល ១០០ និងអត្រាពន្ធគយដែលសហរដ្ឋអាមេរិកនឹងដាក់ជាការឆ្លើយតប ក្នុងនោះក៏មានប្រទេសចិនដែលជាមហាអំណាចសេដ្ឋកិច្ចផងដែរ៕ អត្ថបទដោយ៖ ទ្រ សុភាព