នៅប្រទេសវៀតណាមមានស្រ្តីម្នាក់បានកើតជំងឺដំបៅក្នុងក្រពះពោះវៀន។ អ្នកនាង ង៉ុក លីញ មានអាយុ ៣៣ឆ្នាំរស់នៅក្នុងទីក្រុងហាណូយហើយធ្វើការពីព្រឹកដល់យប់ជ្រៅ។ នាងមានទម្លាប់ហូបអាហារជាប្រចាំថ្ងៃលឿន រហ័ស ឆ្ងាញ់ មានដូចជាមីកញ្ចប់ នំបុ័ង នំសាំងវិច និងកាហ្វេឬភេសជ្ជៈប៉ូវកម្លាំងផ្អែមៗនៅពេលយប់បន្ថែមទៀត។ នាង លីញ បាននិយាយថា នេះជាទម្លាប់ប្រចាំថ្ងៃរបស់ខ្ញុំ ការហូបបែបនេះវាងាយស្រួលនិងជួយសន្សំសំចៃលុយសម្រាប់ខ្ញុំ។
មុនពិនិត្យឃើញជំងឺរបស់នាង នាងចាប់ផ្តើមមានរោគសញ្ញាគួរឱ្យព្រួយបារម្ភគឺថា ចេះតែអស់កម្លាំងឥតឈប់ឈរ ប្រព័ន្ធរំលាយអាហាររាងខ្សោយ នាងឡើងគីឡូយ៉ាងលឿន។ ហើយនាងរងសម្ពាធការងារថែមទៀត ធ្វើឱ្យនាងគេងមិនលក់ ស្ត្រេសច្រើន និងក្រហាយពោះ(ភាពតានតឹងរ៉ាំរ៉ៃជាការរួមចំណែកដល់ការលូតលាស់នៃកោសិកាមហារីកក្រពះ និងពោះវៀនធំ)។ ពេលនាងទៅពិនិត្យក៏រកឃើញថា នាងមានដំបៅក្រពះពោះវៀនធំ។ ហើយលទ្ធផលនេះអាចឈានដល់ការកើតជំងឺមហារីកពោះវៀនថែមទៀត។
តាមគេហទំព័រ Vnexpress បានចុះផ្សាយថា អ្នកមានជំងឺរលាកក្រពះអាចបណ្តាលមកពីរបបអាហារមិនហូបទៀងទាត់ និងភាពតានតឹងរយៈយូរ។ យោងតាមអ្នកជំនាញថា ជីវិតសម័យទំនើបមានភាពមមាញឹកខ្លាំង ដែលធ្វើឱ្យយុវវ័យចូលចិត្តហូបអាហាររហ័ស អាហារកែច្នៃ... ព្រោះវា "លឿន ងាយស្រួល ថោក"។ មិនត្រឹមតែប៉ុណ្ណោះទេ! វាមានរសជាតិឆ្ងាញ់ ហើយសម្បូរលក់ថែមទៀត។
យោងតាមលោកវេជ្ជបណ្ឌិត Nguyen Anh Tuan ប្រធាននាយកដ្ឋានវះកាត់រំលាយអាហារបានលើកឡើងថា របបអាហារគ្មានសុខភាពល្អជាមូលហេតុនៃការកើនជំងឺមហារីកប្រហែល ៣០%ទូទាំងពិភពលោក។ ព្រោះតែហូបអាហារកែច្នៃ អាហាររហ័ស និងភេសជ្ជៈមានជាតិផ្អែមៗ លើសកម្រិតជាកត្តាប្រឈមហានិភ័យក្រពះពោះវៀន។ មកពីអាហារកែច្នៃមានសារធាតុ nitrites និង nitrates ជាសារធាតុដែលអាចបំប្លែងទៅជាសមាសធាតុបង្កជំងឺមហារីកលឿនខុសពីធម្មតា។ ដូច្នេះ! អ្នកគួរយែប្តូរទម្លាប់មកហូបអាហារត្រី បន្លែស្រស់ៗ និងផ្លែឈើវិញ ទើបសុខភាពរឹងមាំការពារអ្នកពីកើតជំងឺមហារីកពោះវៀនផងដែរ៕ អត្ថបទដោយ៖ ទ្រ សុភាព