សហគមន៍នៃសាលាអន្តរជាតិ ស៊ី អាយ អេ ហ្វឺសត៍ មានមោទនភាពក្រៃលែងដែលបានចូលរួមវគ្គសិក្ខាសាលាចែករំលែកចំណេះដឹងសុខភាព ទៅកាន់សិស្សានុសិស្សកម្រិតបឋមសិក្សា មាតាបិតា និងអ្នកអាណាព្យាបាលរបស់ពួកគាត់ ស្តីពីសារសំខាន់នៃការថែទាំសុខភាពមាត់ធ្មេញរបស់កុមារ ដែលប្រព្រឹត្តទៅនៅសាលាអន្តរជាតិ ស៊ី អាយ អេ ហ្វឺសត៍ សាខាសែនសុខ។ វគ្គសិក្ខាសាលាសុខភាពនេះបានចែករំលែកដោយលោកស្រីទន្តបណ្ឌិត ឃាម ស្រីហ៊ុច អគ្គនាយិកានៃមន្ទីរព្យាបាលធ្មេញសន្តិភាព។
លោកស្រីវេជ្ជបណ្ឌិត ឃាម ស្រីហ៊ុច បានធ្វើការចែកចាយទៅកាន់អ្នកចូលរួមនូវគន្លឹះចំណេះដឹងជាច្រើនស្តីពីសារៈប្រយោជន៍នៃអនាម័យសុខភាពមាត់ធ្មេញ រាប់បញ្ចូលទាំងការការពារកុំឱ្យពុកធ្មេញ ការអភិវឌ្ឍនូវទម្លាប់ល្អក្នុងការរស់នៅ ការលើកកម្ពស់សុខភាពទូទៅ ការលើកទឹកចិត្តនិងភាពមានទំនុកចិត្ត ការកាត់បន្ថយការឈឺធ្មេញ ការការពារបញ្ហាសិរីរាង្គ ការលើកកម្ពស់ទម្លាប់ល្អក្នុងការទទួលទានអាហារ ការអង្កេតនិងការពារឱ្យទាន់ពេលវេលា និងការបង្រៀនកុមារឱ្យមានទំនួលខុសត្រូវ និងការដាក់ពិន័យ។ លោកស្រីវេជ្ជបណ្ឌិត ឃាម ស្រីហ៊ុច ក៏បានចែករំលែកនូវគន្លឹះសម្រាប់ការថែទាំសុខភាពមាត់ធ្មេញកុមារ ដែលមានសារៈប្រយោជន៍សម្រាប់សុខភាពរបស់ពួកគាត់។
សហគមន៍សាលាអន្តរជាតិ ស៊ី អាយ អេ ហ្វឺសត៍ សូមថ្លែងអំណរគុណយ៉ាងជ្រាលជ្រៅដល់លោកស្រីវេជ្ជបណ្ឌិត ឃាម ស្រីហ៊ុច ដែលបានចំណាយពេលវេលាដ៏មានតម្លៃ ការលះបង់ និងការប្តេជ្ញាចិត្តយ៉ាងមុតមាំក្នុងការចែករំលែកនូវចំណេះដឹង និងជំនាញ ដែលបានជួយលើកកម្ពស់ដល់ការយល់ដឹងស្តីពីសុខភាពមាត់ធ្មេញសម្រាប់កុមារ ដើម្បីចូលរួមការពារសុខភាពផ្លូវកាយ សុខុមាលភាពផ្លូវចិត្ត និងជ័យជម្នះក្នុងថ្ងៃអនាគត។ មាតាបិតា និងអ្នកអាណាព្យាបាលដែលបានចូលរួមក៏ទទួលបានគ្រឹះចំណេះដឹងដ៏មានសារៈប្រយោជន៍ ដើម្បីចូលរួមលើកកម្ពស់សេចក្តីសុខសុភមង្គល និងសុខភាពរបស់កុមារ៕
