ការពិនិត្យសុខភាព គឺជាវិធីការពារខ្លួនពីជំងឺធ្ងន់ធ្ងរណាមួយដែលអាចកើតឡើងដោយមិនដឹងខ្លួន។ អ្នកស្រីវេជ្ជបណ្ឌិត Dr. Keri Peterson ជាវេជ្ជបណ្ឌិតឯកទេសវេជ្ជសាស្ត្រផ្ទៃក្នុងល្បីម្នាក់នៅក្នុងទីក្រុងNew York បានលើកឡើងថាការពិនិត្យសុខភាពជាប្រចាំអាចជួយសង្រ្គោះជីវិតរបស់អ្នកបាន។ កាលណាមានបញ្ហាសុខភាពណាមួយ ឆាប់ដឹងយើងនឹងងាយស្រួលទប់ស្កាត់ផលវិបាក និងឆាប់ព្យាបាលឱ្យប្រសើរឡើងវិញបាន ទោះបីជាជំងឺមហារីក បើយើងដឹងក្នុងដំណាក់កាលដំបូង ក៏អាចមានឱកាសច្រើនក្នុងការជាសះស្បើយឡើងវិញបាន។

ជាទូទៅវេជ្ជបណ្ឌិតនែណាំឱ្យ ធ្វើការពិនិត្យសុខភាពហោចណាស់១ឬ២ដងក្នុង១ឆ្នាំ ប៉ុន្តែប្រហែលជាមានបងប្អូនជាច្រើននៅមិនដឹងថាគួរពិនិត្យផ្នែកណាខ្លះ។ ខាងក្រោមនេះ ជាផ្នែកសំខាន់ៗដែលអ្នកត្រូវធ្វើការពិនិត្យជាចាំបាច់ ដែលចែករំលែកដោយគេហទំព័រ everydayhealth ៖

១ ពិនិត្យសម្ពាធឈាម៖ សមាគមន៍បេះដូងអាមេរិក (AHA) និយាយថា ប្រសិនបើសម្ពាធឈាមរបស់អ្នកទាបជាង 120/80 (mm Hg) គឺវាស្ថិតនៅក្នុងកម្រិតល្អ ប្រសិនបើឃើញលើសនេះមានន័យថាអ្នកមានខ្លាញ់កកច្រើននៅក្នុងសរសៃឈាម ឬហៅថាលើសសម្ពាធឈាមនេះឯង។ ចាប់ពីអាយុ២០ឆ្នាំឡើងទៅ គួរតែធ្វើការពិនិត្យសុខភាពឱ្យបាន១ឬ២ដងក្នុង១ឆ្នាំ។ ជំងឺលើសសម្ពាធឈាម វាក៏បង្កជាផលវិបាក អាចធ្វើឱ្យមានបញ្ហាជំងឺបេះដូង ទឹកនោមផ្អែម ដាច់សរសៃឈាមខួរក្បាល និងផ្សេងៗទៀតបានយ៉ាងងាយ។

២ ពិនិត្យកូឡេស្តេរ៉ុល៖ កម្រិតកូឡេស្តេរ៉ុលលកើនឡើង នាំហានិភ័យខ្ពស់បង្កជាជំងឺបេះដូង និងដាច់សរសៃឈាមខួរក្បាលផងដែរ។ មនុស្សក្នុងវ័យ២០ឆ្នាំឡើងទៅ កូឡេស្តេរ៉ុល គួរតែតិចជាង 200 (mg/dl) ឬអាចចន្លោះពី 200 ទៅ 239 mg/dl ។ ហេតុនេះអ្នកចាំបាច់ត្រូវតែពិនិត្យកម្រិតកូឡេស្តេរ៉ុល ជាចាំបាច់ ចៀសវាងឡើងខ្ពស់ខ្លាំង គ្រោះថ្នាក់ដល់សុខភាព។

៣ ពិនិត្យរកកោសិកាមហារីកស្បូន (Pap Smears)៖ ស្ត្រីវ័យចន្លោះពី២១ដល់៦៥ឆ្នាំ​ ត្រូវធ្វើការតេស្តពិនិត្យរកកោសិកាមហារីកស្បូនរៀងរាល់៣ឆ្នាំម្ដង។ ដោយសារជំងឺមហារីកដែលកើតលើប្រព័ន្ធបន្តពូជ មិនមានបង្ហាញចេញពីអាការឱ្យដឹងជាមុនក្នុងដំណាក់កាលដំបូងនោះទេ នៅពេលដែលចេញជារោគសញ្ញាតែងតែវិវត្តទៅជាមហារីកទៅហើយ។ ហេតុទាមទារឱ្យស្ត្រីយកចិត្តទុកដាក់ខ្ពស់ក្នុងការពិនិត្យសុខភាព និងចាក់វ៉ាក់សាំងការពារ។

៤ ពិនិត្យរកមហារីកសុដន់៖ មហារីកសុដន់ជាជំងឺមួយដែលសម្លាប់មនុស្សជាច្រើនជារៀងរាល់ឆ្នាំទូទាំងពិភពលោក។ សមាគមន៍ជំងឺមហារីកអាមេរិកនិយាយថា សម្រាប់ស្ត្រីគួរតែពិនិត្យរកមហារីកសុដន់ជាប្រចាំឆ្នាំ ចំពោះអាយុ៥០ឆ្នាំឡើង គេណែនាំឱ្យពិនិត្យMammograms រៀងរាល់២ឆ្នាំម្ដង។

៥ ពិនិត្យកម្រិតជាតិស្ករនៅក្នុងឈាម៖ ជាតិស្ករក្នុងឈាមកើតឡើង ជាធាតុបង្កនៃជំងឺទឹកនោមផ្អែម។ មនុស្សសម័យថ្មីច្រើនរស់នៅស្រណុក មិនសូវមានសកម្មភាពបញ្ចេញញើស ទទួលទានអាហារផ្អែម គ្រឿងកំប៉ុង អាហារកែច្នៃជាប្រចាំ ងាយនឹងមានហានិភ័យកើតជំងឺទឹកនោមផ្អែមទាំងវ័យក្មេង។

៦ ពិនិត្យដង់ស៊ីតេឆ្អឹង៖ ជំងឺពុកឆ្អឹងក៏ជាជំងឺមួយដែលគួរឱ្យព្រួយបារម្ភ ហេតុនេះអ្នកមិនគួររំលងក្នុងការពិនិត្យសុខភាពឆ្អឹងរបស់អ្នកឡើយ។

៧ ពិនិត្យសុខភាពមាត់ធ្មេញ៖ ធ្មេញក៏អាចបង្កមេរោគ ជាជំងឺកាចបង្កគ្រោះថ្នាក់សល់ជីវិតផងដែរ។ ចំពោះមនុស្សពេញវ័យឡើងទៅ គួរធ្វើការពិនិត្យសុខភាពមាត់ធ្មេញឱ្យបាន១ឆ្នាំ២ដង ក្នុងនោះរួមបញ្ជូលទាំងការសម្អាតធ្មេញផងដែរ៕

អត្ថបទដោយ៖ Senghong