ម៉ាក់ៗកំពុងពពោះក្ដី កំពុងត្រៀ​មនឹងយកកូនក្ដី ជឿជាក់ថាក្ដីបារម្ភមួយគឺការបែកសង្វារមានដៃ ជើង ពិសេសលើពោះជាដើម ព្រោះសង្វារកើតហើយគឺពិបាកក្នុងការបំបាត់ទៅវិញណាស់។ ផ្អែកតាមការសម្ភាសន៍ជាមួយចាបបៃតង វេជ្ជបណ្ឌិត សាយ លីដា ឯកទេសផ្នែកសើស្បែកនៅ Camderma Clinic -ខេមឌែរម៉ា គ្លីនិក បានបញ្ជាក់ឱ្យដឹងថា ស្នាមសង្វារមិនមែនកើតតែចំពោះស្រ្តីមានផ្ទៃពោះនោះទេ នៅពេលមនុស្សគ្រប់វ័យអរម៉ូននៅក្នុងរាងកាយរបស់ចាប់ផ្ដើមមានការប្រែប្រួលធ្វើឱ្យមានសន្ទុះនៃការលូតលាស់នៃរូបរាងលឿន ធ្វើឱ្យស្បែកបត់បែនមិនទាន់អាចនឹងកើតមានសង្វារក្នុងកំឡុងពេលនោះក៏មាន។

វេជ្ជបណ្ឌិតបានពន្យល់បន្ថែមថា ស្បែកប្រៀបដូចជាថង់ ឬ ក៏ក្រដាសអញ្ចឹងដែរ ដូច្នេះ ប្រសិនបើស្បែកតឹងខ្លាំងវានឹងឱ្យរហែក​ ការប្រេះរហែកនៃស្បែកនេះ គឺដំបូងមានលក្ខណៈជាពណ៌ក្រហមព្រៀងៗនៃសរសៃឈាម ក្រោយមកវានឹងចាប់ផ្ដើមប្រែណ៌ទៅជាពណ៌ស និងមានការរីករាលដាលកាន់តែច្រើនប្រសិនអ្នកមិនធ្វើការព្យាបាលឱ្យបានទាន់ពេលវេលា។

សម្រាប់ស្ត្រីពពោះ ធ្វើឱ្យឡើងគីឡូ កូនកាន់តែធំពោះរបស់គាត់ក៏កាន់តែធំ ហេតុនេះទើបងាយកើតមានសង្វារ។ ហេតុនេះ ផ្អែកតាមការចែករំលែកពី វេជ្ជបណ្ឌិត ខ ហុក​ស៊ុន ឯកទេសសម្ពធ រោគស្ត្រី និងបញ្ហាពិបាកមានកូន បានចែករំលែកពីគន្លឹះថែរក្សាស្បែក កុំឱ្យបែកសង្វារដែលម៉ាក់គ្រប់រូបគួរដឹងនិងអនុវត្ត៖

១ រក្សាកុំឱ្យលើកគីឡូច្រើនពេក៖ វេជ្ជបណ្ឌិត បានបញ្ជាក់ថាស្ត្រីគ្រប់រូបពេលមានផ្ទៃពោះត្រូវចាំថា ធ្វើយ៉ាងណាកុំឱ្យខ្លួនឯងឡើងគីឡូច្រើនពេក ជាពិសេសចាប់ពីមានផ្ទៃពោះ៥ខែឡើងទៅ ជាពេលវេលាដែលកូនកាន់តែធំ ពោះម្ដាយក៏កាន់តែធំដែរ។

២ ទទួលទានទឹកឱ្យបានគ្រប់គ្រាន់៖ ការទទួលទានទឹកបានគ្រប់ដើម្បីរក្សាសំណើមឱ្យស្បែក មិនស្ងួត មិនរមាស់ មិនបែកសង្វារ និងធ្វើឱ្យស្បែកទន់។ នៅពេលដែលស្បែកទន់ មិនស្ងួត នោះស្បែកមិនងាយបែបសង្វារឡើង វេជ្ជបណ្ឌិតបានផ្ដាំថាស្ត្រីមានផ្ទៃពោះហាមខ្ចិលផឹកទឹកដាច់ខាត។

៣ រើសរបបអាហារ៖ អាហារដែលស្ត្រីមានផ្ទៃពោះគួរញ៉ាំមានដូចជា អាហារសម្បូរវីតាមីនស៊ី វីតាមីនដេ វីតាមីនអឺ និងសង្ក័សី ដូចជាផ្លែឈើចម្រុះ ក្រូច ចេក ប៉ោម សារី គ្រាប់ធញ្ញជាតិ បន្លែបៃតង ត្រីសាច់ ស៊ុតជាដើម។ វេជ្ជបណ្ឌិត ខ ហុក​ស៊ុន បានឱ្យដឹងថា តាមការសិក្សាគេបានរកឃើញថា អាហារដែលសម្បូរវីតាមីនទាំងអស់អាចជួយការពារស្បែកមិនឱ្យបែកសង្វារបាន។  

៤ ប្រឹក្សាជាមួយគ្រូពេទ្យ៖ ជារឿងចាំបាច់បំផុត ស្ត្រីមានផ្ទៃពោះដាច់ខាតត្រូវជួបក្រុមគ្រូពេទ្យប្រឹក្សាពីរបបអាហារគួរញ៉ាំ ការធ្វើលំហាត់ប្រាណ របៀបការពារការឡើងគីឡូ ជាដើម។

៥ ជ្រើសរើសក្រែមលាបសង្វារថ្មីៗ៖ ករណីស្ត្រីមានផ្ទៃពោះទើបបែកសង្វារថ្មីៗ ការបំបាត់មានប្រសិទ្ធភាពបំផុតគឺគួរតែ ប្រឹក្សាជាមួយគ្រូពេទ្យឱ្យបានលឿន ដើម្បីជ្រើសរើសប្រភេទប្រេងលាបបំបាត់សង្វារឱ្យបានកាន់តែឆាប់កាន់តែល្អ។ ព្រោះសង្វារថ្មីៗងាយសស្រួលបំបាត់ទៅវិញ៕

អត្ថបទដោយ៖ Senghong