អ្នក​​មាន​ជំងឺ​លើស​ឈាមគួរចំណាយពេលខ្លះ​ធ្វើ​លំហាត់​ប្រាណ​ ១០ទៅ២០នាទីជាប្រចាំថ្ងៃ ដើម្បីបញ្ចុះសម្ពាធឈាមកុំឱ្យឡើងខ្ពស់។ ហើយអ្នកលើសឈាមមិន​គួរ​លើក​ទម្ងន់​ធ្ងន់​ពេក​ទេ ​វា​អាច​ធ្វើ​ឱ្យ​សម្ពាធ​ឈាម​ឡើង​ខ្ពស់ឬគ្រោះថ្នាក់អាយុជីវិតព្រោះឈាមឡើង។ អ្នកអាចធ្វើលំហាត់ប្រាណងាយៗ លើកទម្ងន់ស្រាលៗ ដើរ រត់តិចៗ និងហាត់យូហ្គា ដើម្បី​ឱ្យ​រាងកាយ​ជួសជុល​ផ្នែក​ដែល​ខូចឡើងវិញ។ ការធ្វើលំហាត់ប្រាណជួយកាត់បន្ថយអត្រាកើតជំងឺដាច់សរសៃឈាមខួរក្បាល៣៥ – ៤០% កាត់បន្ថយអត្រាកើតជំងឺសរសៃឈាមបេះដូងបាន ២៥% និងកាត់បន្ថយជំងឺខ្សោយបេះដូងជាង ៥០%។ ពេលអ្នកធ្វើលំហាត់ប្រាណជាប្រចាំថ្ងៃ អ្នកនឹងមានលទ្ធផលបែបនេះ។

បើលើសឈាម អ្នកគួរតែកាត់បន្ថយរសជាតិប្រៃចេញដើម្បីបន្ថយសម្ពាធឈាម។ អ្នកមានទម្លាប់បរិភោគអាហារដែលមានជាតិប្រៃទាប (សូដ្យូម) អាចគ្រប់គ្រងឲ្យសម្ពាធឈាមស្ថិតក្នុងសភាពធម្មតាបានល្អ។ ហើយអ្នកអាចកាត់បន្ថយអាហារកញ្ចប់ ឬអាហារកែច្នៃវាមានផ្ទុករសជាតិប្រៃកម្រិតខ្ពស់ អ្នកនឹងមានអារម្មណ៍ស្រួលខ្លួនមិនងងឹតមុខមិនឈឺក្បាលនោះទេ។ ពពួកអាហារម្ទេស ផ្កាខាត់ណា ស្ពៃក្តោប មើមដំឡូង ផ្លែគីវី ផ្លែស្ត្របឺរី និងពពួកក្រូចដូចជាក្រូចពោធិ៍សាត់ ក្រូចថ្លុង និងក្រូចឆ្មា ជួយកាត់បន្ថយការឡើងសម្ពាធឈាម ព្រោះវាមានសម្បូរវីតាមីន C អាចជួយប្រឆាំងអុកស៊ីតកម្ម និងធ្វើឱ្យមុខងាររបស់សរសៃឈាមកាន់តែល្អប្រសើរឡើង៕ អត្ថបទដោយ៖ ទ្រ សុភាព