ការអប់រំកូន អ្នកត្រូវយល់ចិត្ត និងអារម្មណ៍កូនជាមុនសិន ដើម្បីដឹកនាំកូនឱ្យស្តាប់តាមដំបូន្មានរបស់ខ្លួន។ លោក Stephen Covey បានជួបរឿងមួយដែលឪពុក និងកូនស្រីពីរនាក់ ដែលមានទំនាស់ផ្នែកអារម្មណ៍។ លោក Covey បាននិយាយថា មានក្មេងស្រីពីរនាក់ បានរត់មករកគាត់ដោយទឹកភ្នែក ហើយក្មេងស្រីទាំងពីរនាក់នេះ បាននិយាយរៀបរាប់ពីអារម្មណ៍ឈឺចាប់ មានការភ័យខ្លាចឪពុកមិនយល់ពីកូន។ ក្មេងស្រីទាំងពីរមិនហ៊ានបើកចិត្តគំនិត ដើម្បីនិយាយជាមួយឪពុកម្តាយរបស់ខ្លួនទេ ព្រោះខ្លាចឪពុកម្តាយវ៉ៃ និងប្រើសម្តីខ្លាំងៗ ប៉ុន្តែក្នុងចិត្តកូនស្រីទាំងពីរនាក់នេះ ចង់ស្រេកឃ្លានចង់បានក្ដីស្រឡាញ់ ការយល់ចិត្ត និងការណែនាំពីឪពុកម្ដាយដោយក្តីមេត្តាផងដែរ។

បន្ទាប់មកលោក Covey ក៏សម្រេចចិត្តទៅនិយាយជាមួយឪពុកក្មេងស្រីទាំងពីរនាក់ហ្នឹង។ ពេលកំពុងតែអង្គុយគ្នាជាមួយឪពុកក្មេងស្រីនោះ ​ធ្វើឱ្យលោក Covey រកឃើញថា ឪពុកក្មេងស្រី បានដឹងពីរឿងរ៉ាវទាំងអស់ ហើយគាត់ក៏ទទួលស្គាល់ថា ខ្លួនគាត់មានអារម្មណ៍ឆេវឆាវ ពិបាកគ្រប់គ្រងលើខ្លួនឯង មិនព្រមទទួលខុសត្រូវ និងមិនព្រមទទួលស្គាល់ការពិតដោយសុទ្ធចិត្តថា ភាពរីកចម្រើនខាងអារម្មណ៍របស់គេនៅមានកម្រិតទាបខ្លាំងណាស់, ធ្វើឱ្យអារម្មណ៍អាត្មានិយមនេះ ប៉ះពាល់ដល់អារម្មណ៍របស់កូន និងខ្វះក្តីស្រឡាញ់ក្នុងគ្រួសារថែមទៀត។

នេះជាការបញ្ជាក់ថា ដើម្បីធ្វើទំនាក់ទំនងរវាងឪពុកម្តាយ និងកូន ហើយជាមួយមិត្តរួមការងារបានល្អ យើងចាំបាច់ត្រូវចេះស្តាប់ពួកគាត់និយាយជាមុនសិន។ ការស្តាប់របស់មនុស្សម្នាក់ៗ ត្រូវពឹងផ្អែកទៅលើចិត្តដែលរឹងប៉ឹង។ ព្រោះការស្ដាប់ចាំបាច់ ត្រូវមានភាពអត់ធ្មត់ ការបើកចិត្តឱ្យទូលាយ ហើយត្រូវមានចេតនាពិតក្នុងការស្វែងយល់ពីគ្នាទាំងឪពុកម្តាយ និងកូន ហើយប្តី ជាមួយប្រពន្ធ..ជាដើម។ អ្វីទាំងនេះ ជាគុណសម្បត្តិកម្រិតខ្ពស់នៃអត្តចរិតដែលអ្នកត្រូវអភិវឌ្ឍរហូតដល់អារម្មណ៍មានកម្រិតខ្ពស់ ដើម្បីអាចយល់ពីអារម្មណ៍របស់អ្នកដទៃឱ្យបានល្អ៕ អត្ថបទដោយ៖ ទ្រ សុភាព