នៅប្រាសាទក្នុងប្រទេសថៃចំនួនពីរកន្លែងបានធ្វើឱ្យបណ្ដាញសង្គមមានការភ្ញាក់ផ្អើលយ៉ាងខ្លាំង បន្ទាប់ពីគេចាប់បានថា មានលាក់សាកសពយ៉ាងហោចណាស់ ៧៣នាក់។ តែព្រះចៅអធិការអះអាងថា សាកសពនេះគេប្រើដើម្បីបង្ហាត់សមាធិរបស់ព្រះសង្ឃតែប៉ុណ្ណោះ។ បន្ថែមលើសពីនេះ គេបានរកឃើញសត្វក្រពើ ៦០០ក្បាលនៅក្នុងស្រះទឹកមួយនៅលើបរិវេណប្រាសាទថែមទៀត។
នៅថ្ងៃទី ២២ ខែវិច្ឆិកា ប៉ូលីសថៃបានធ្វើការវាយឆ្មក់នៅប្រាសាទ Thiphaksong Pa Sangnayatham ដ៏ល្បីល្បាញនៅ Pho Thale ស្ថិតនៅភាគនិរតីនៃខេត្ត Phichit នៃប្រទេសថៃ ពួកគេបានរកឃើញសាកសពចំនួន ៤១នាក់។ បើយោងតាមរបាយការណ៍អ្នកស្រុកបានប្រាប់ថា ប្រាសាទស្ថិតនៅក្នុងព្រៃដ៏ស្ងប់ស្ងាត់បានលាតសន្ធឹងលើផ្ទៃដីប្រហែល ១៦.០០០ម៉ែត្រការ៉េ ជាប្រាសាទមានភាពល្បីល្បាញដោយសារការប្រតិបត្តិខាងវិញ្ញាណហើយមានការគាំទ្រដោយអ្នកកាន់សាសនាជាច្រើន។
នៅក្នុងប្រាសាទនោះប៉ូលិសបានរកឃើញមឈូសចំនួន ៥ថែមទៀត។ លើសពីនេះ ទីធ្លាប្រាសាទមានស្រះចិញ្ចឹមក្រពើដ៏ធំសម្បើមជាង៦០០ក្បាល។ អាងទឹកក្រពើហ៊ុមព័ទ្ធដោយរបងខ្ពស់មិនឱ្យភ្ញៀវទេសចរចូលទស្សនាទេ។ សម្រាប់ព្រះសង្ឃនៅព្រះវិហារបានពន្យល់ថា សាកសពបានរកឃើញនេះជាការតម្កល់ទុក ព្រោះនេះជាសាកសពសិស្សនៃព្រះវិហារឬសមាជិកគ្រួសារនៃសិស្សតែប៉ុណ្ណោះ។ ដើម្បីបញ្ជាក់ការអះអាងរបស់ខ្លួន ព្រះសង្ឃបានប្រគល់សំបុត្រមរណៈភាព និងកិច្ចព្រមព្រៀងជូនប៉ូលិសផងដែរ។
ហើយនៅថ្ងៃទី២៦ ខែវិច្ឆិកា អាជ្ញាធរបានរកឃើញសាកសពចំនួន ៣២នាក់បន្ថែមទៀតនៅប្រាសាទមួយផ្សេងទៀតនៅក្នុងស្រុក Bang Mun Nak ភាគខាងត្បូងនៃខេត្ត Phichit ។ ព្រោះប្រាសាទទាំងពីរនេះមានទំនាក់ទំនងគ្នាជាមួយព្រះចៅអធិការ Phra Ajahn Sai Fon Pandito ជាអ្នកបង្ហាត់បង្រៀននៅទីនេះ។
ព្រះចៅអធិការបានការពារខ្លួនប្រឆាំងនឹងការចោទប្រកាន់ពីសកម្មភាពខុសច្បាប់នេះដោយសំអះអាងថា សាកសពនៅទីនេះ ជាការបណ្តុះបណ្តាល “ការយល់ដឹងអំពីសេចក្តីស្លាប់” ក្នុងសមាធិជួយព្រះសង្ឃប្រឈមមុខ ហើយឱ្យយកឈ្នះលើសេចក្តីភ័យខ្លាចនៃការស្លាប់របស់ពួកគេ ដូច្នេះការប្រតិបត្តិបែបនេះជួយឱ្យវិញ្ញាណយល់ស៊ីជម្រៅ។
បច្ចុប្បន្ននេះ សមត្ថកិច្ចកំពុងតែធ្វើកោសល្យវិច័យសាកសព ហើយបញ្ជាឱ្យវត្តបញ្ឈប់រាល់សកម្មភាពពាក់ព័ន្ធ និងបើកការស៊ើបអង្កេតរកអត្តសញ្ញាណ និងប្រភពដើមនៃសាកសព។ ជាមួយគ្នានេះដែរ ខាងការិយាល័យព្រះពុទ្ធសាសនានៅប្រទេសថៃ ក៏បានបើកការស៊ើបអង្កេតលើបញ្ហានេះដែរ។ នេះជាយោងតាមគេហទំព័រ South China Morning Post ៕ អត្ថបទដោយ៖ ទ្រ សុភាព