មនុស្សដែលអាយុវែងមិនមែនមកពីផឹកស្រាទេ មកពីកសាងទម្លាប់ល្អៗ ការពារជំងឺ។ អ្នកផឹកស្រាភាគច្រើនហៅតែជំងឺចូលក្នុងខ្លួនទេ។ បើអ្នកចង់មានអាយុវែងហើយគ្មានជំងឺទេ អ្នកគួរអានអត្ថបទមួយនេះជាក្បួនរបស់ជប៉ុននៅកោះអូគីណាវ៉ាដែលមានទម្លាប់ល្អឱ្យអ្នករស់នៅមានសុខភាពមាំ។ នេះជាក្បួនអាយុវែងរបស់ពួកគេ៖
១. ហ្សែន៖ ជិត ៥០ឆ្នាំមកហើយ លោក Craig Willcox ជាសាស្ត្រាចារ្យផ្នែកសុខភាពសាធារណៈ និងរោគវិទ្យានៅសាកលវិទ្យាល័យ Okinawa International បានធ្វើការស៊ើបអង្កេតលើការរស់នៅបានយូរអ្នករស់នៅកោះអូគីណាវ៉ាបានលើកឡើងថា មានមនុស្សចាស់ជាង ១០០០នាក់ និងអ្នកចាស់ទុំរាប់រយនាក់ក្នុងវ័យ ៧០ឆ្នាំ ៨០ទៅ៩០ឆ្នាំ ដែលបានរកឃើញថា ពួកគាត់មានអាយុវែងព្រោះតែមានរបបអាហារ ទម្លាប់លំហាត់ប្រាណ ហ្សែន ខាងវិញ្ញាណ និងគំរូសង្គម។ ហើយសាស្រ្តាចារ្យ Wilcox បានសន្និដ្ឋានថា "ប្រហែល ២ ភាគ ៣ ក្នុងការរស់នៅមានអាយុវែងមកពីរបបអាហារ របៀបរស់នៅ នៅនៅសល់ពីនេះគឺ “ហ្សែន” នេះឯង"។
២. អាហារបន្តអាយុ៖ ពេលអ្នកហូបអាហារមានជាតិវីតាមីន និងសារធាតុរ៉ែ ដើម្បីប្រឆាំងការពារជំងឺ និងគ្រប់គ្រងការឡើងគីឡូ។ របបអាហារអូគីណាវ៉ាមានការញ៉ាំអាហារដូចជាផ្លែឈើ បន្លែ៥ប្រភេទផ្សេងគ្នា និងសាច់ត្រីដើម្បីផ្តល់ក្តីសុខភាពដល់បេះដូងជាងសាច់។ អាហារមានអាយុវែងមានអង្ករ ដំឡូងជ្វាជាអាហារបំប៉នដែលមានសារធាតុចិញ្ចឹមដែលមានកាឡូរីទាប។ មានអាហារសមុទ្រដែលសម្បូរទៅដោយជាតិ Carotenoid ដូចជាសារ៉ាយសមុទ្រ និងបន្លែស្លឹកបៃតងសម្បូរជាតិដែក រួមបញ្ចូលគ្នាជួយកាត់បន្ថយការរលាក និងស្ត្រេសយ៉ាងល្អបំផុត។
៣. តែ Matcha ៖ ជនជាតិជប៉ុនចូលចិត្តផឹកតែបរិមាណដ៏ច្រើន ជាពិសេសគឺតែ matcha ប៉ូវសុខភាពណាស់។ តែ Matcha មានលក្ខណៈសម្បត្តិប្រឆាំងអុកស៊ីតកម្មព្រោះវាជាតែបុរាណមានសារធាតុក្លរ៉ូហ្វីល និងសារធាតុប្រឆាំងអុកស៊ីតកម្មដែលជនជាតិជប៉ុនមានទម្លាប់ផឹករក្សាអាយុឱ្យវែងជាង ១០០០ឆ្នាំមកហើយ។ នៅខ្មែរយើងក៏មានលក់ដែរ នៅតាមហាងកាហ្វេ។
៤. ជៀសវាងពីជាតិស្ករ៖ ម្ហូបជប៉ុនកម្រមានជាតិស្ករកែច្នៃ ឬមានជាតិផ្អែមណាស់។ ជនជាតិជប៉ុនប្រើប្រាស់ស្ករតិចជាងគេដូចជាតែ matcha គេប្រើលាយបញ្ចូលតែបៃតងច្រើនដោយគ្មានជាតិស្ករ និងទឹកដោះគោទេ។ ព្រោះប្រើជាតិស្ករច្រើននាំជំងឺដូចជាការរលាក លើសសម្ពាធឈាម និងជំងឺទឹកនោមផ្អែម ហើយវាផ្សារភ្ជាប់ទៅនឹងការកើនឡើងហានិភ័យជំងឺគាំងបេះដូង និងជំងឺដាច់សរសៃឈាមខួរក្បាលថែមទៀត។
៥. រស់ក្នុងសតិសម្បជញ្ញៈ ដើម្បីរំសាយស្ត្រេស៖ ជនជាតិជប៉ុនក៏មានក្បួនសម្រាកផ្លូវចិត្តដែរ។ ពួកគេយល់ឃើញថា ការផ្តោតសតិធ្វើលំហាត់ប្រាណជាការព្យាបាលចិត្តឱ្យសម្រាកក្នុងរាងកាយដ៏រឹងមាំ។ ការងូតទឹកក្នុងព្រៃក៏ជាការជួយលាងជាតិស្រ្តេសពីខួរក្បាលឱ្យអារម្មណ៍ស្រស់ថ្លាដែរ។ ហើយពួកគេតែងរក្សាទម្លាប់រស់នៅក្នុងភាពស្ងប់ស្ងាត់ ដើម្បីឱ្យចិត្តគេស្ងប់ចេញពីបណ្តាញសង្គម។ សូម្បីតែរស់ក្នុងធម្មជាតិ និងការដកដង្ហើមយ៉ាងជ្រៅ ដើម្បីកាត់បន្ថយកម្រិតស្ត្រេស និងបង្កើនសុខភាពផ្លូវចិត្តរបស់ពួកគេឱ្យរីករាយតាមបែបធម្មជាតិដែរ៕ អត្ថបទដោយ៖ ទ្រ សុភាព