រឿងពីរអ្នកត្រូវយល់ជាមុនសិនថា ភាពធន់ជាសមត្ថភាពពិសេសក្នុងការទប់ទល់នឹងស្ថានភាពលំបាកៗ ដែលអ្នកអាចស៊ូទ្រាំនឹងបញ្ហាទាំងអស់នោះបាន។ ចំណែកថា កម្លាំងចិត្តជាសមត្ថភាពរបស់បុគ្គលម្នាក់ក្នុងការដោះស្រាយប្រកបដោយប្រសិទ្ធភាពជាមួយនឹងអារម្មណ៍ភាពតានតឹង សម្ពាធ និងបញ្ហាប្រឈម ហើយអនុវត្តឱ្យអស់ពីសមត្ថភាពដោយមិនគិតពីកាលៈទេសៈលំបាកកម្រិតណានោះទេ។ បើអ្នកបាក់ទឹកចិត្ត ៣វិធីទាញចិត្តរបស់អ្នកឱ្យងើបឡើងវិញ។

១. បណ្តុះការគិតវិជ្ជមានដើម្បីបញ្ចូលក្តីស្រឡាញចូលក្នុងជីវិតឱ្យរស់ឡើងវិញ៖ ជំហានដំបូងនៃការគិតវិជ្ជមាន អ្នកត្រូវទទួលស្គាល់ថាអ្នកកំពុងមានភាពអវិជ្ជមានចូលគំនិតហើយ។ រួចហើយកុំ​វាយលើ​ខ្លួនឯង​ តែ​ត្រូវ​ទទួល​ស្គាល់​វា រួច​ធ្វើការ​កែប្រែ​វា​។ វាល្អជាងគិតថា 'ខ្ញុំបរាជ័យហើយ' សូមប្រាប់ខ្លួនឯងថា “អ្នកនឹងជោគជ័យ ខ្ញុំអាចធ្វើបានល្អ...”  ដរាបណាអ្នកព្យាយាមអស់ពីសមត្ថភាពហើយ បញ្ហាក៏រលាយខ្លួនតាមការប្រឹងរបស់អ្នកដែរ។ ការគិតវិជ្ជមានជាថ្នាំប៉ូវផ្លូវចិត្តអ្នកឱ្យងើបមកវិញពិតមែន! ព្រោះអ្វី? ការគិតល្អ អ្នកកំពុងតែបញ្ចូលក្តីស្រឡាញ់ក្នុងបេះដូងរបស់អ្នក។

២. ការធ្វើសមាធិជាការចំណាយពេលសម្រាប់ខ្លួនអ្នកឱ្យមានកម្លាំងចិត្តឡើងវិញ៖ នៅក្នុងពិភពលោកដ៏មមាញឹកមួយនេះ បើអ្នកគ្មានពេលសម្រាកសម្រាប់ផ្លូវចិត្តនោះទេ ចិត្តរបស់អ្នកឈឺ។ វាដូចជាម៉ាស៊ីនដែរ បើគ្មានពេលសម្រាកទេម៉ាស៊ីនរបស់អ្នកនឹងគាំងខូចមិនខាន។ សមាធិជាវិធីរំងាប់ចិត្ត ហើយអនុញ្ញាតឱ្យខ្លួនអ្នកមានវត្តមាននៅក្នុងពេលឥឡូវនេះ គឺឱ្យខ្លួនអ្នកចេះស្រឡាញ់ខ្លួនឯង ហើយមានទស្សនវិជ្ជមានចំពោះជីវិតមួយនេះផងដែរ។

 ៣. ចំណាយពេលធ្វើលំហាត់ប្រាណដើម្បីដាស់អារម្មណ៍ខ្សោយឱ្យមករឹងមាំឡើងវិញ៖ រាងកាយ​របស់​អ្នកមានភាព​សំខាន់​ដូច​ជា​ចិត្ត​របស់​អ្នកដែរ។ ពេលរាងកាយរបស់អ្នករឹងមាំ ចិត្តរបស់អ្នកក៏មាំដែរ។​ សុខភាពផ្លូវកាយ និងផ្លូវចិត្តដើរទន្ទឹមគ្នា បើម្ខាងណាមួយបញ្ហា ម្ខាងទៀតក៏មានបញ្ហាឈឺតាមគ្នាដែរ។ ការធ្វើលំហាត់ប្រាណត្រូវបានបង្ហាញនៅក្នុងការសិក្សាថា វាជួយបង្កើនកម្រិតសារធាតុ serotonin និង dopamine នៅក្នុងខួរក្បាល ជាសារធាតុគីមី 'មានអារម្មណ៍ល្អ' ។ ហើយជួយកាត់បន្ថយការធ្លាក់ទឹកចិត្ត ឱ្យផ្លូវចិត្តរបស់អ្នកមានភាពច្បាស់លាស់ អាចផ្តោតលើគោលដៅបានមុត ហើយខាងក្នុងចិត្តមានភាពស្ងប់ស្ងាត់យ៉ាងត្រជាក់៕ អត្ថបទដោយ៖ ទ្រ សុភាព