១. ផឹកទឹកក្តៅឧណ្ហៗភ្លាមៗបន្ទាប់ពីភ្ញាក់ពីគេង៖ ក្រោយពីគេងយូរ រាងកាយរបស់យើងប្រាកដជាបាត់បង់ជាតិទឹក ដូច្នេះ ការផឹកទឹកក្តៅឧណ្ហៗមួយកែវភ្លាមៗបន្ទាប់ពីភ្ញាក់ពីគេង គឺជាវិធីល្អបំផុតក្នុងការស្ដាជាតិទឹកឡើងវិញ ធ្វើឱ្យប្រព័ន្ធរំលាយអាហារធ្វើការបានល្អ សម្រួលដល់ចរាចរឈាម និងជួយឱ្យស្បែកភ្លឺស្រស់ថ្លាពីខាងក្នុង។ ទឹកក្តៅឧណ្ហៗជួយបណ្ដេញជាតិពុលពីរាងកាយ និងបង្កើនជាតិសំណើមដល់ស្បែក។ ប្រសិនបើអ្នកចង់បានលទ្ធផលល្អជាងមុន អ្នកអាចបន្ថែមក្រូចឆ្មាស្រស់ពីរបីចំណិត ឬទឹកឃ្មុំបន្តិច ដើម្បីជួយបន្សាបជាតិពុល និងបន្ថែមភាពធន់របស់រាងកាយ។

២. សម្អាតមុខ និងផ្តល់សំណើមឱ្យបានត្រឹមត្រូវ៖ ការលាងមុខពេលព្រឹកពិតជាសំខាន់ បន្ទាប់ពីយើងគេងពេញមួយយប់ ស្បែករបស់យើងនឹងបញ្ចេញជាតិប្រេង និងញើស ដូច្នេះប្រសិនបើមិនបានសម្អាតទេ វាអាចនាំឱ្យស្ទះរន្ធញើស និងកើតមុន។ ដើម្បីលាងមុខឱ្យទទួលបានផល អ្នកត្រូវជ្រើសរើសផលិតផលដែលត្រូវជាមួយប្រភេទស្បែកដែរ ជាពិសេសផលិតផលដែលមានភាពទន់ មិនមានជាតិអាល់កុល ឬសារធាតុលាងសម្អាតខ្លាំង ដើម្បីរក្សាស្រទាប់ប្រេងធម្មជាតិ។

បន្ទាប់ពីលាងមុខរួច ការលាបក្រែមផ្តល់សំណើមគឺជាជំហានដែលមិនអាចរំលងបាន ព្រោះវាជួយទប់ជាតិសំណើមនៅក្នុងស្បែក ការពារស្បែកមិនឱ្យស្ងួត និងបន្ថយស្នាមជ្រួញមុនអាយុ។ ហើយអ្វីដែលសំខាន់បំផុតនោះគឺកុំភ្លេចឱ្យសោះឡេការពារកម្ដៅថ្ងៃ បើទោះបីជាអ្នកនៅក្នុងផ្ទះក៏ដោយ។ ហើយឡេការពារកម្ដៅដែលល្អអ្នកត្រូវជ្រើសរើសឡេដែលមានរបាំងការពារ SPF 30 ឬខ្ពស់ជាងនេះ ដើម្បីការពារស្បែកពីភាពចាស់ និងស្នាមអុជខ្មៅ។

៣. ត្រូវញុំាអាហារដែលសម្បូរវីតាមីន និងសារធាតុប្រឆាំងអុកស៊ីតកម្ម៖ ស្បែកស្អាតមិនស្ថិតលើការថែទាំពីខាងក្រៅតែមួយមុខទេ តែអ្នកត្រូវថែវាពីខាងក្នុងដែរ។ ដោយអ្នកអាចចាប់ផ្ដើមពីការផ្លាស់ប្ដូររបបអាហារ ព្រោះពេលព្រឹកគឺជាពេលល្អបំផុតក្នុងការផ្តល់សារធាតុចិញ្ចឹមដល់រាងកាយ។ អាហារដែលសម្បូរវីតាមីន C, E, A និងសារធាតុប្រឆាំងអុកស៊ីតកម្មដូចជា polyphenols និង flavonoids ភាគច្រើនមាននៅក្នុងផ្លែឈើស្រស់ បន្លែបៃតង គ្រាប់ធញ្ញជាតិ និងគ្រាប់អាល់ម៉ុន។

វីតាមីន C ជួយបង្កើនការផលិតកូឡាជែន ធ្វើឱ្យស្បែកភ្លឺថ្លា។ វីតាមីន E ការពារកោសិកាពីរ៉ាឌីកាល់សេរី ខណៈសារធាតុប្រឆាំងអុកស៊ីតកម្មផ្សេងទៀតជួយបន្ថយការរលាក និងភាពចាស់មុនវ័យ។ អាហារពេលព្រឹកដែលមានសុខភាពល្អមិនត្រឹមតែជួយឱ្យស្បែករលោងស្អាតទេ ប៉ុន្តែថែមទាំងជួយបង្កើនថាមពល និងសុខភាពទូទៅផងដែរ៕ 

អត្ថបទដោយ៖ សារួ