១. ស្ករចម្រាញ់៖ ជាតិស្ករចម្រាញ់មាននៅគ្រប់ទីកន្លែងដូចជា នំខេក ទឹកផ្លែឈើ និងភេសជ្ជៈផ្អែមៗ ហើយវាគឺជាសត្រូវដ៏ធំបំផុតរបស់ស្បែក។ នៅពេលស្ករចូលទៅក្នុងរាងកាយ វាបង្កើតប្រតិកម្មជាមួយប្រូតេអ៊ីន  រួមទាំង collagen ធ្វើឱ្យសរសៃទាំងនោះរឹង និងបាត់បង់ភាពបត់បែន។ ជាលទ្ធផលគឺស្បែកកាន់តែជ្រីវជ្រួញ ស្រអាប់ និងខ្វះសំណើម។ មិនត្រឹមតែប៉ុណ្ណោះ ស្ករច្រើនពេកក៏ជំរុញឱ្យមានការរលាកក្នុងរាងកាយ ធ្វើឱ្យកើតមុន និងបាត់បង់ភាពភ្លឺថ្លា។ ការកាត់បន្ថយភេសជ្ជៈផ្អែម និងស្ករតាមអាហារ គឺជាជំហានដ៏សាមញ្ញប៉ុន្តែមានអានុភាពក្នុងការការពារស្បែក។

២. សាច់ក្រក និងសាច់កែច្នៃ៖ ពួកអាហារទាំងនេះត្បិតថាវាឆ្ងាញ់ តែបើអ្នកចង់ឃើញខ្លួនឯងស្អាតមានសុខភាពល្អគួរតែកាត់បន្ថយ ឬបើអាចបញ្ឍប់តែម្ដង។ ដោយសារពពួកអាហារកែច្នៃមានសារធាតុរក្សាទុក និងនីត្រាត ដែលបង្កឱ្យកើតរ៉ាឌីកាល់សេរី។ ហើយវាជាមូលហេតុចម្បងនៃការរលាក និងធ្វើឱ្យការបាត់បង់ collagen។ ស្បែកដែលតែងតែប៉ះពាល់នឹងសារធាតុទាំងនេះ នឹងចាប់ផ្តើមទន់ខ្សោយ រន្ធញើសចាប់ផ្ដើមរីកធំ និងបាត់បង់សភាពទន់រលោង។ 

៣. អាហារបំពង៖ កុំឆ្ងាញ់ភ្លេចខ្លួន អាហារបំពងដូចជាមាន់បំពង ឬដំឡូងបំពង ត្រូវបានចម្អិននៅសិតុណ្ហភាពខ្ពស់ ដែលបង្កើតសមាសធាតុ AGE (Advanced Glycation End Products)។ សមាសធាតុនេះធ្វើឱ្យសរសៃ  collagen និង elastin រឹង និងខូច ធ្វើឱ្យស្បែកបាត់ភាពទន់ ឆាប់ជ្រីវជ្រួញ។ បន្ថែមលើនោះ ប្រេងដែលកំដៅឡើងវិញជារឿយៗនៅតាមហាងបំពង ក៏បង្កសារធាតុអុកស៊ីតកម្មដែលធ្វើឱ្យកោសិកាស្បែកចាស់លឿនដែរ។ 

៤. ជាតិអាល់កុល៖ កុំចង់ស្អាតអីបើអ្នកផ្ដាច់ជាតិអាកុលមិនបាន ការពិតទៅការផឹកស្រាម្ដងម្កាលអាចមិនប៉ះពាល់ច្រើនទេ តែបើអ្នកផឹកវាជារឿយៗ វានឹងធ្វើឱ្យស្បែកខ្សោះជាតិទឹក និងបាត់បង់វីតាមីន C ដែលជាចាំបាច់សម្រាប់ការផលិត collagen។ ជាតិអាល់កុលក៏រំខានដល់តុល្យភាពនៃអ័រម៉ូន បណ្តាលឱ្យស្បែកស្ងួត មានជើងក្អែក និងស្នាមខ្មៅជុំវិញភ្នែក។ សម្រាប់ស្ត្រីវ័យចន្លោះ ៣០ ទៅ ៤០ ឆ្នាំ វាជាបញ្ហាដែលមិនគួរមើលរំលង។

៥. មីកញ្ចប់៖ មីកញ្ចប់ ជាហារងាយចម្អិន ពេញនិយមណាស់ជាពិសេសនៅចុងខែ តែត្រូវដឹងផងថាអាហារប្រភេទនេះគឺជាអវុធសម្ងាត់ចូលទៅបំផ្លាញជាតិទឹកនៅក្នុងស្បែកធ្វើឱ្យស្បែកស្ងួត។ មីកញ្ចប់ ឬ Fast Food ប្រភេទនេះ មានអំបិល និងសារធាតុរក្សាទុកខ្ពស់ វាធ្វើឱ្យរាងកាយរក្សាជាតិទឹកច្រើន កើតអារម្មណ៍ហើម ជាពិសេសនៅតំបន់ភ្នែក។ អំបិលច្រើនក៏បង្កឱ្យស្បែកខ្វះសំណើម ប្រេះ និងស្ងួត។ ការញ៉ាំជាញឹកញាប់នឹងធ្វើឱ្យស្បែកស្រអាប់ និង collagen ថយចុះយ៉ាងឆាប់រហ័ស។ 

ជារួមមក ការរក្សាស្បែកឱ្យក្មេងជាងវ័យ មិនមែនទាំងអស់សុទ្ធតែត្រូវពឹងផ្អែកទៅលើការប្រើប្រាស់ផលិតផលដែលថ្លៃៗទេ តែវាក៏រួមបញ្ចូលពីការផ្លាស់ទម្លាប់តូចៗប្រចាំដូចជារបបអាហារនេះផងដែរ។ ដូច្នេះបើអ្នកអាចបន្ថយការញុំាអាហារទាំងនេះបាន ហើយជំនួសវិញដោយការញុំា បន្លែ ផ្លែឈើ ប្រូតេអ៊ីនស្ដើង និងផឹកទឹកឱ្យបានច្រើនៗ នោះស្បែករបស់អ្នកនឹងត្រឡប់មកមានសភាពភ្លឺថ្លា ទន់រលោង និងមានសំណើមដូចកូនក្មេងជាមិនខាន៕

អត្ថបទដោយ៖ សារួ