មនុស្សជាច្រើនគិតថា ការឈឺស្មា គឺជារឿងធម្មតាអាចបណ្ដាលមកពីយើងធ្វើការខ្លាំង គេងឬអង្គុយខុសទម្រងជាដើម។ ប៉ុន្តែការពិតការឈឺស្មាមិនមែនគ្រប់ប្រភេទសុទ្ធតែកើតឡើងដោយសារមូលហេតុនេះទាំងអស់ទេ ព្រោះការឈឺស្មាមួយចំនួនទៀតវាអាចជារោគសញ្ញាព្រមានដំបូងនៃជំងឺមហារីក ដែលកំពុងលូតលាស់ក្នុងរាងកាយដោយយើងមិនដឹងក៏ថាបាន។ យោងតាមគេហទំព័រ Medical News Today ខាងក្រោមនេះជាប្រភេទនៃការឈឺស្មាទាំង ៤ ដែលអ្នកត្រូវប្រយ័ត្ន៖
- ឈឺស្មារិលចុះទៅដៃ ឬក៖ នេះអាចជារោគសញ្ញានៃជំងឺមហារីកសួត ព្រោះបើតាមអ្នកជំងឺមហារីកសួនជាច្រើនបាននិយាយថា អាការៈដំបូងរបស់ពួកគេគឺ ឈឺស្មា ឬស្ពឹកដៃ។ ការឈឺបែបនេះកើតឡើងបន្តិចម្ដងៗដោយមិនដឹងមូលហេតុ រហូតកាន់តែធ្ងន់ទៅៗតាមពេលវេលា។ ហើយមូលហេតុនោះគឺដោយសារដុំសាច់នៅផ្នែកខាងលើនៃសួត (ដែលហៅថា ដុំសាច់ Pancoast) សង្កត់លើសរសៃប្រសាទនៅតំបន់ក និងស្មា បណ្តាលឱ្យស្ពឹកដៃ ខ្សោយសាច់ដុំ។ ប្រសិនបើការឈឺស្មាមានរយៈពេលលើសពី ៣ សប្ដាហ៍ មិនធូរស្រាល ហើយអមដោយរោគសញ្ញាដូចជា ក្អកស្ងួត ស្រកទម្ងន់ ឬដកដង្ហើមខ្លីៗ អ្នកគួរទៅពិនិត្យសួតភ្លាមៗជៀសវាទុកយូរពិបាកព្យាបាល។
- ឈឺស្មាខ្លាំងនៅពេលយប់៖ នេះប្រហែលជារោគសញ្ញានៃមហារីកឆ្អឹង ឬការរាលដាលទៅឆ្អឹង បើដុំសាច់ដុះនៅក្នុងឆ្អឹងស្មា វាអាចធ្វើឱ្យសរសៃប្រសាទរលាក បណ្តាលឱ្យមានការឈឺចាប់ខ្លាំង និងធ្ងន់ធ្ងរជាពិសេសពេលយប់។ ការឈឺនេះមិនទាក់ទងនឹងចលនារបស់ស្មាទេ ហើយបើទោះបីជាអ្នកព្យាយាមសម្រាកមិនធ្វើចលនាក៏វាមិនបានធូរដែរ។ អ្នកជំងឺជាច្រើននិយាយថា ពួកគេមិនដែលបានដេកលក់ស្កប់ស្កល់ទេ ព្រោះពេលយប់ស្មាតែងតែឈឺជាបន្តបន្ទាប់។ នៅដំណាក់កាលចុងក្រោយ ស្មាអាចហើម ឬខូចទ្រង់ទ្រាយ។ ជំងឺមហារីកផ្សេងទៀតដូចជា សួត សុដន់ ឬក្រពេញប្រូស្តាត ក៏អាចរាលដាលទៅឆ្អឹងស្មាបានដែរ។ ប្រសិនបើអ្នកមានរោគសញ្ញាអស់កម្លាំង ស្រកទម្ងន់ ឬហើមកូនកណ្តុរ ត្រូវទៅពិនិត្យជាមួយវេជ្ជបណ្ឌិតឱ្យបានឆាប់ ដើម្បីរកមូលហេតុពិតប្រាកដ។
- ឈឺស្មា ឈឺពោះ ឬខ្នង៖ នេះអាចទាក់ទងនឹងមហារីកថ្លើម និងថង់ទឹកប្រមាត់ ព្រោះមិនមែនការឈឺស្មាទាំងអស់មានប្រភពពីសន្លាក់ ឬសាច់ដុំទេ។ នៅពេលថ្លើម ឬថង់ទឹកប្រមាត់មានដុំសាច់ វាអាចធ្វើឱ្យសរសៃប្រសាទ phrenic រលាក បណ្តាលឱ្យការឈឺចាប់រាលដាលដល់ស្មាខាងស្តាំ។ អ្នកដែលមាន មហារីកថ្លើម ភាគច្រើននឹងមានការឈឺចាប់នៅតំបន់ខាងស្តាំពោះខាងលើ អមដោយរោគសញ្ញាដូចជា ខាន់លឿង អស់កម្លាំង ហើមពោះ និងស្រកទម្ងន់លឿន ដែរ។ ចំណែក មហារីកថង់ទឹកប្រមាត់ ក៏អាចបណ្តាលឱ្យឈឺខ្លាំងបន្ទាប់ពីបរិភោគអាហារដែលមានជាតិខ្លាញ់។ ប្រសិនបើអ្នកមានការឈឺស្មាស្តាំជាប់រហូត អមដោយអាការៈចង្អោរ ឬទឹកនោមមានពណ៍ដិតៗ គួរទៅពិនិត្យជាមួយវេជ្ជបណ្ឌិតឯកទេសខាងក្រពះពោះវៀន ដើម្បីធ្វើរោគវិនិច្ឆ័យឱ្យច្បាស់។
- ឈឺស្មា ឈឺទ្រូង និងបេះដូងលោតញាប់៖ វាប្រហែលជារោគសញ្ញានៃជំងឺមហារីកសុដន់ ឬមហារីកក្នុងទ្រូង ព្រោះស្ត្រីជាច្រើននៅដំណាក់កាលដំបូងនៃ មហារីកសុដន់ អាចមិនឈឺសុដន់ផ្ទាល់ទេ តែអាចមានអារម្មណ៍ថាតឹងណែន ឬឈឺនៅស្មា និងខ្នងផ្នែកខាងលើ។ នៅពេលដុំសាច់លូតលាស់ កោសិកាមហារីកអាចរាលដាលទៅកូនកណ្តុរនៅក្លៀក បណ្តាលឱ្យស្មាឈឺជាប់រហូត។ មនុស្សជាច្រើនយល់ច្រឡំថា វាជាបញ្ហាសាច់ដុំ ឬសន្លាក់ តែប្រសិនបើអមដោយរោគសញ្ញាដូចជា ដុំរឹងនៅសុដន់ ស្បែកសុដន់ប្រែពណ៌ ឬមានអារម្មណ៍តឹងក្នុងទ្រូង ត្រូវទៅពិនិត្យភ្លាមៗ៕
អត្ថបទដោយ៖ សារួ