ប្រព័ន្ធរំលាយអាហាររបស់អ្នកចុះខ្សោយ បង្កជាបញ្ហាបត់ជើងមិនទៀងទាត់ ពិបាកបត់ជើង បត់ជើងម្ដងៗចំណាយពេលរាប់ម៉ោង ក្តៀន បត់ជើងមិនអស់ ឈឺចាប់ រមាស់ អាចមានឈាម ប្រឹងខ្លាំងនៅពេលបត់ជើងយូរៗ ធ្វើឱ្យសរសៃវែនហើមប៉ោង ឬអាចដាច់រលាត់ រហែករន្ធគូថ អាចបង្កឱ្យក្លាយជាជំងឺឫសដូងបាត នេះយោងតាម វេជ្ជបណ្ឌិត ម៉ៅ ម៉េងលន់ ឯកទេសឫសដូងបាតនិងជំងឺទូទៅ។

មានបងប្អូនជាច្រើនដែលជួបបញ្ហានេះ ភាគច្រើនពួកគាត់ជ្រើសរើសយកការញ៉ាំផលិតផលហ្វាយប័រ ជំនួយដើម្បីឱ្យបត់ជើងស្រួល។ លោកវេជ្ជបណ្ឌិត ម៉ៅ ម៉េងលន់ បានពន្យល់ថា អាហារបំប៉ន និងហ្វាយប័រទាំងនោះ គេច្រើនផលិតចេញពីពពួកកាកសរសៃ ហ្វាយប័រ ឬពីគ្រាប់ធញ្ញជាតិ និងវត្ថុធាតុដើមមួយចំនួនទៀត។ បើសួរថាអាចព្យាយាលឫសដូងបាត ជាដាច់ឬទេ សុំឆ្លើយថាការព្យាបាលរបស់វាគឺមិនច្បាស់លាស់នោះទេ។ ដោយសារអាហារបំប៉នមានសកម្មភាពតិចតួចបំផុត ដែលអាចឱ្យសរសៃវែនឫសដូងបាតរួមតូច និងងាយស្រួលបត់ជើង។

ការប្រើអាហារបំប៉ន ភាគច្រើនត្រូវប្រើជាប់រហូត នៅពេលញ៉ាំធូរ ពេលឈប់ញ៉ាំ ហើយអាការពិបាកបត់ជើងងាយត្រឡប់មកវិញដដែល។ ខុសពីការព្យាបាលឫសដូងបាតតាមបែបវេជ្ជសាស្ត្រ ដូចជាការចងឱ្យជ្រុះឫសដូងបាត និងការចាក់ឱ្យជ្រុះជាដើម ដែលវាអាចព្យាបាលជា។ នៅពេលដែលពិបាកបត់ជើង បងប្អូនគួរតែមើលលើរបបអាហារប្រចាំថ្ងៃរបស់ខ្លួនឯងឡើងវិញ។ ព្យាយាមទទួលទានជាតិកាកសរសៃឱ្យបានច្រើន កាត់បន្ថយសាច់ អាហារផ្អាប់ អាហាកែច្នៃ គ្រឿងស្រវឹង ភេសជ្ជៈជាតិហ្គាស ជំនួសមកវិញឱ្យការញ៉ាំម្ហូបអាហារដែលមានបន្លែ ផ្លែឈើ និងត្រី និងត្រីឱ្យបានច្រើន។ 

គួរទទួលទានទឹកហោចណាស់ពី៨ទៅ១០កែវ ឬ២លីត្រក្នុងមួយថ្ងៃ ព្រមទាំងចៀសវាងការទទួលទានជាតិកាហ្វេអ៊ីន។ ក្នុងនោះប្រភពverywellhealth បានឱ្យដឹងផងដែរ សម្រាប់បន្លែផ្លែឈើដែលសម្បូរជាតិកាកសរសៃពីធម្មជាតិមានដូចជា សាឡាត ត្រពាំងបារាំង ឆៃថែវក្រហម ផ្សិត ល្ពៅ ពងបារាំង ស្ពៃក្ដោប និងបន្លែបៃតងជាច្រើនទៀត។ ចំណែកឯងពពួកផ្លែឈើវិញមានដូចជា ប៉ោម ចេក ផ្លែប័រ ផ្លែប៉េស គីវី សារី ជាដើម។ អ្នកក៏អាចយកបន្លែ និងផ្លែឈើមួយចំនួនក្រឡុកបញ្ចូលគ្នា ធ្វើការហ្វាប័រធម្មជាតិទទួលទានរាល់ថ្ងៃបានផងដែរ ប៉ុន្តែកុំបន្ថែមស្ករឬទឹកដោះគោខាប់ពីលើ។ មួយវិញទៀត ការធ្វើលំហាត់ប្រាណ ក៏អាចជួយបង្កើនរំញ័រក្នុងក្រពះ ជំរុញការរំលាយអាហារឱ្យលឿនជាងមុន បានផងដែរ ហេតុនេះគួរឆ្លៀតហាត់៣០នាទីជារៀងរាល់ថ្ងៃ។

ការផ្លាស់ប្តូរអារម្មណ៍អាហារ ជាផ្នែកធំមួយជួយសម្រួលប្រព័ន្ធរំលាយអាហារឡើងវិញបានល្អ។ ផ្លាស់ប្តូរត្រឹម១សប្ដាហ៍ អ្នកនឹងឃើញថាដំណើរការបត់ជើងចាប់ផ្ដើមល្អជាងមុន ធ្វើឱ្យអារម្មណ៍ស្រស់ស្រាយ មិនអាប់អួរដូចមុននោះទេ។ លោកវេជ្ជបណ្ឌិត ម៉ៅ ម៉េងលន់ បានលើកឡើងផងដែរថា ប្រសិនបើអ្នកកើតឫសដូងបាតក្នុងដំណាក់កាលដំបូង ការផ្លាស់ប្តូររបបអាហារនេះ អាចជួយការពារមិនឱ្យវិវត្តទៅកាន់តែធ្ងន់ធ្ងរ និងអាចធ្វើឱ្យសុខភាពប្រសើរឡើងវិញបានដោយមិនប្រើបាច់ប្រើថ្នាំ ឬព្យាបាលគ្រាន់តែទទួលទានអាហារឱ្យបានត្រឹមត្រូវ។

ជាមួយគ្នានេះ ប្រសិនបើអ្នកផ្លាស់ប្តូររបបអាហារហើយ សង្កេតឃើញថានៅតែមិនប្រសើរឡើង មានលៀនសាច់នៅទ្វារលាមក មានឈាម សូមលើកទឹកចិត្តឱ្យទៅពិនិត្យជាមួយពេទ្យជំនាញ ព្រោះបញ្ហានេះមិនបណ្ដាលមកពីជំងឺឫសដូងបាតតែ១មុខទេ អាចមកពីជំងឺផ្សេងៗទៀតបញ្ហាក្រពះ ឬអាចជាមហារីករន្ធគូថបាន៕

អត្ថបទដោយ៖ Senghong