នរណាខ្លះកំពុងមានបញ្ហានោមញឹក មួយថ្ងៃៗស្ទើរតែអង្គុយធ្វើការមិនកើតរវល់តែទៅបន្ទប់ទឹក អាការបែបនេះសូមប្រញាប់ទៅពិនិត្យជាបន្ទាន់ ព្រោះវាជាសញ្ញាបញ្ជាក់ថាសុខភាពរបស់អ្នកកំពុងតែទ្រុឌទ្រោម និងមានជំងឺហើយ។

យ៉ាងណាមិញយោងតាមប្រសាសន៍របស់ អ្នកឧកញ៉ាវេជ្ជបណ្ឌិត គួច ម៉េងលី បានឱ្យដឹងថា មនុស្សគ្រប់រូបមិនថាបុរសឬស្រ្តីនោះទេ បើក្នុងមួយថ្ងៃនោមចន្លោះពី ៤ ទៅ ៨ដងជារឿងធម្មតា ប៉ុន្តែបើលើសពី ៨ ដងគេហៅថាមនុស្សនោមញឹក។ ហើយអ្នកដែលនោមញឹកខុសធម្មតានេះជាសញ្ញា រលាកប្លោកនោម។ មួយវិញទៀតប្រសិនជាអ្នកមិនប្រញាប់ព្យាបាលឱ្យទាន់ពេលវេលាទេនោះ ជំងឺរលាកប្លោកនោម វានឹងបង្កទៅជាជំងឺ Interstitial Cystitis (IC) ជំងឺនេះធ្វើឱ្យយើងចុកអួលៗនៅថ្ងាសក្រោម នោមញឹកញាប់ និងធ្វើឱ្យបុគ្គលនោះខូចប្លោកនោមមិនខាន។

បន្ថែមពីលើនេះទៀត បើតាមការបញ្ជាក់ពី medicalnewstoday បានឱ្យដឹងថាចំពោះអ្នកដែលកំពុងមានបញ្ហានោមញឹកខុសធម្មតា ដើម្បីការពារប្លោកនោមរបស់អ្នកកុំឱ្យខូច ឬរលាកអ្នកគួរធ្វើលំហាត់ប្រាណ ២របៀបនេះឱ្យបានជារៀងរាល់ថ្ងៃ៖

១. លំហាត់ប្រាណរបៀប Kegel៖ អ្នកដែលមានបញ្ហានោមញឹកគឺមកពីកត្តាផឹកទឹកច្រើនលើសចំនួន និងកត្តាសាច់ដុំអាងត្រគាកចុះខ្សោយ។ លំហាត់ប្រាណបែប Kegel គឺយើងអាចធ្វើ២ដងក្នុងមួយថ្ងៃ ដើម្បីជួយពង្រឹងសាច់ដុំអាងត្រគាកដែលចុះខ្សោយឱ្យត្រឡប់មករឹងមាំឡើងវិញ។ ក្នុងលំហាត់ប្រាណបែប Kegel នេះអ្នកអាចអនុវត្តដូចជា៖

· គេងនៅលើឥដ្ឋរាបស្មើ ដាក់ដៃឱ្យត្រង់ បញ្ឈរជង្គង់ រួចពើងផ្នែកត្រគាងឡើងទៅលើរយៈពេល៣វិនាទីម្តងរួចទម្លាក់ចុះមកវិញ។ ធ្វើសកម្មភាពបែបនេះដដែលៗចំនួន ២០ ទៅ ២៥ដង។ អ្នកអាចហាត់ប្រាណរបៀប Kegel នេះចំនួន ២ដងក្នុងមួយថ្ងៃគឺពេលព្រឹកនិងពេលល្ងាចវាជួយឱ្យសាច់ដុំអាងត្រគាករបស់អ្នកឆាប់រឹងមាំ និងការពារប្លោកនោមរបស់អ្នកកុំឱ្យខូចឬរលាកផងដែរ។

២. លំហាត់ប្រាណអាងត្រគាក៖ ក្រៅពីហាត់បែប Kegel អ្នកគួរតែហាត់ប្រាណអាងត្រគាកមួយរបៀបទៀតគឺ ដំបូងឈរឱ្យត្រង់ខ្លួន កន្ធាចជើងចេញពីគ្នាចំនួន៣សង់ទីម៉ែត្រ រួចធ្វើសកម្មភាពបន្ទន់ជង្គង់ចុះឡើងៗចំនួន២០ដងរួចសម្រាក។ អ្នកអាចធ្វើលំហាត់ប្រាណបែបនេះមួយថ្ងៃ២ដងដូចគ្នា។ 

គូសបញ្ជាក់ផងដែរថា សកម្មភាពហាត់ប្រាណ២របៀបខាងលើគឺសំខាន់ណាស់សម្រាក់សាច់ដុំអាងត្រគាក និងជួយការពារប្លោកនោមរបស់អ្នក។ ដូច្នេះហើយសម្រាប់អ្នកដែលកំពុងមានបញ្ហានោមញឹក សូមប្រញាប់អនុវត្តលំហាត់ប្រាណនេះឱ្យបានរាល់ថ្ងៃដើម្បីព្យាបាលកុំទុកឱ្យហួសពេល។ មួយវិញទៀតប្រសិនជាអ្នកមិនចង់ហាត់ប្រាណទេអ្នកគួរតែប្រញាប់ទៅពិភាក្សាបញ្ហានោមញឹករបស់អ្នកជាមួយវេជ្ជបណ្ឌិតជំនាញផ្នែកប្លោកនោមដើម្បីរកដំណោះស្រាយឱ្យបានទាន់ពេល៕

អត្ថបទដោយ៖ មឿន គន្ធា