ជាការពិតណាស់ ភាពចាស់ គឺមិនមាននរណាម្នាក់ចៀសផុតឡើយ។ តែប្រសិនបើមើលទៅមានមុខមាត់ចាស់ជាងអាយុ នោះនឹងក្លាយជាបញ្ហាដ៏ធំមួយរំខានដល់ជីវិត ជាពិសេសសម្រាប់មនុស្សស្រី។ ការដឹកនាំរបៀបរស់នៅដែលមានផាសុខភាព និងមានតុល្យភាព ពិតជាចាំបាច់ក្នុងការទប់ស្កាត់ភាពចាស់។
យោងតាមវេបសាយសុខភាព Everyday Health បានឱ្យដឹងថា ចំពោះទម្លាប់អាក្រក់ដែលធ្វើឱ្យមុខចាស់ជាងអាយុរួមមាន៖
១. ចូលគេងយឺត៖ វាចាំបាច់ក្នុងការគេងយ៉ាងហោចណាស់៧ម៉ោងក្នុងមួយយប់។ ប្រសិនបើអ្នកចូលគេងយឺតញឹកញាប់ ស្បែករបស់អ្នកនឹងស្រអាប់ និងមានរង្វង់ភ្នែកខ្មៅ។
២. មិនស្គាល់ប្រភេទស្បែករបស់ខ្លួន៖ ប្រសិនបើអ្នកមិនស្គាល់ប្រភេទស្បែករបស់អ្នក និងតម្រូវការរបស់វានោះ ទំនងជាអ្នកប្រឈមនឹងបញ្ហាសម្រស់មួយចំនួន ឬប្រើប្រាស់សារធាតុសកម្មមួយចំនួន ដែលមិនស័ក្ដិសមសម្រាប់អ្នក។ ហេតុនេះ អ្នកនឹងចៀសមិនរួច ពីការមានស្បែកកាន់តែស្នាម និងឆាប់ចាស់នោះទេ។
៣. ផឹកទឹកតិចតួច៖ ការខះជាតិទឹក អាចរួមចំណែកដល់ការមើលឃើញនៃសញ្ញាភាពចាស់ដូចជាស្បែកស្ងួត និងជ្រីវជ្រួញ ហើយក៏អាចជះឥទ្ធិលពលអវិជ្ជមានដល់សុខភាពទូទៅផងដែរ ដែលអាចបង្កើនល្បឿននៃភាពចាស់។
៤. មិនប្រើឡេការពារកម្ដៅថ្ងៃ៖ ឡេការពារកម្ដៅថ្ងៃគួរប្រើរាល់ថ្ងៃ និងគ្រប់រដូវ ដើម្បីការពារស្បែកពីកាំរស្មី UV។ វាជាផ្នែកមួយដ៏សំខាន់នៃយុទ្ធសាស្ត្រការពារកម្ដៅថ្ងៃ ដែលរួមបញ្ចូលនូវការស្លៀកពាក់ខោអាវការពារ វ៉ែនតា និងចៀសវាងការត្រូវពន្លឺព្រះអាទិត្យ។
៥. ភាពតានតឹង៖ ស្ត្រេសជម្រុញឱ្យមានការបញ្ចេញ cortisol ឬអ័រម៉ូនស្ត្រេស។ កម្រិត cortisol កើតឡើងរ៉ាំរ៉ៃអាចបណ្តាលឱ្យរលាកពេញរាងកាយ និងរួមចំណែកដល់ភាពចាស់មុនអាយុ៕ អត្ថបទដោយ៖ មាស ចាន់ដារ៉ា