លោកវេជ្ជបណ្ឌិត ថេង យូដាលីន អ្នកឯកទេសជំងឺបេះដូង និងសរសៃឈាមនៅមន្ទីរពេទ្យកាល់ម៉ែត បានលើកឡើងថា ជំងឺលើសជាតិខ្លាញ់អាចកើតឡើងចំពោះមនុស្សគ្រប់វ័យ។ បើមិនយកចិត្តទុកដាក់ទេ វាអាចនាំឱ្យមានផលវិបាកធ្ងន់ធ្ងរ ដូចជាប៉ះពាល់ដល់សរសៃឈាមក្បាល បេះដូង អាចធ្វើឱ្យបេះដូងស្ទះឈប់ដំណើរការ។ លើសពីនេះ ការលើសជាតិខ្លាញ់នៅក្នុងខ្លួនក៏ អាចបណ្ដាលឱ្យឈឺសន្លាក់ ឈឺជើង។ ជាពិសេស សន្លាក់ជង្គង់ជាផ្នែកដែលទទួលផលប៉ះពាល់ជាងគេនៅពេលរាងកាយយើងឡើងគីឡូខ្លាំង។ ខ្លាញ់នៅក្នុងរាងកាយក៏អាចបង្កឱ្យមានជាតិអាស៊ីតក្នុងឈាមខ្ពស់ បណ្ដាលឱ្យសន្លាក់រងការរលាក ឬឈឺសន្លាក់ជាញឹកញាប់ដែរ។

យ៉ាងណាមិញ ដើម្បីជៀសវាងបញ្ហាទាំងនេះ លោកវេជ្ជបណ្ឌិត ថេង យូដាលីន បានណែនាំ ៣ វីធីធំៗដូចជា៖

១. រៀបចំរបបអាហារឱ្យបានត្រឹមត្រូវ៖ អ្នកគួរជៀសវាងអាហារដែលសម្បូរទៅដោយជាតិខ្លាញ់ និងស្ករ ដូចជាអាហារកំប៉ុង អាហារបែប Fast food ឬអាហារពេលយប់។ អាហារទាំងនេះគឺជាមូលហេតុធ្វើឱ្យឡើងគីឡូលឿន។ ត្រូវជ្រើសរើសអាហារដែលមានប្រយោជន៍ ដូចជា បន្លែ ផ្លែឈើ ត្រី ហើយត្រូវគ្រប់គ្រងបរិមាណអាហារឱ្យបានត្រឹមត្រូវ។

២. ផ្លាស់ប្ដូរទម្លាប់រស់នៅ៖ វាជាចំណែកដ៏សំខាន់មួយដូចជាការ ឈប់ជក់បារី កាត់បន្ថយការផឹកស្រា ហើយសំខាន់ជាងគេគឺ ត្រូវធ្វើលំហាត់ប្រាណឱ្យបានជាប្រចាំ។ ការរត់លេង ហែលទឹក ឬដើរលេងប្រចាំថ្ងៃក៏អាចជួយដុតខ្លាញ់ និងធ្វើឱ្យបេះដូងរបស់យើងដំណើរការបានល្អដែរ។ ប្រសិនបើអ្នកមានជំងឺប្រចាំកាយដូចជាលើសឈាម ឬទឹកនោមផ្អែម ត្រូវញុំាថ្នាំតាមការណែនាំរបស់វេជ្ជបណ្ឌិតឱ្យទៀងទាត់។

៣. ជៀសវាងការប្រើថ្នាំសម្រកគីឡូដោយគ្មានការត្រួតពិនិត្យ៖ ថ្នាំសម្រកគីឡូ ឬថ្នាំចាក់ដែលគេផ្សាយតាមបណ្តាញសង្គម មិនមែនគ្រប់ប្រភេទមានសុវត្ថិភាពទេ។ ការសម្រកគីឡូដោយវិធីធម្មជាតិ ដូចជា ការគ្រប់គ្រងអាហារ ការហាត់ប្រាណ និងការរស់នៅដោយមានទម្លាប់ល្អ គឺជាវិធីដ៏មានប្រសិទ្ធភាព និងសុវត្ថិភាពបំផុត។ វាមិនត្រឹមតែជួយឱ្យអ្នកស្រកទម្ងន់ទេ ថែមទាំងជួយឱ្យអ្នកមានសុខភាពល្អដែរ។

កាលដែលមានសុខភាពល្អមិនមែនជាអ្វីដែលយើងអាចរកទិញបាននៅតាមផ្សារ ប៉ុន្តែជាអ្វីដែលយើងអាចបង្កើតនិងថែរក្សាបានដោយខ្លួនឯង ប្រសិនបើយើងចាប់ផ្ដើមថែទាំខ្លួនឯងចាប់ពីថ្ងៃនេះទៅតាមរយៈការផ្លាស់ប្ដូររបបអាហារ ផ្លាស់ប្ដូរទម្លាប់រស់នៅ និងការធ្វើលំហាត់ប្រាណឱ្យបានទៀងទាត់។ ហើយសំខាន់ជាងគេនោះគឺត្រូវតែឧស្សាហ៍ទៅពិនិត្យសុខភាពនៅមន្ទីរពេទ្យឱ្យបានញឹកញាប់ផងដែរ ដើម្បីឱ្យប្រាដកថាសុខភាពរបស់យើងគឺល្អ៕

អត្ថបទដោយ៖ សារួ