មុននឹងនិយាយទៅដល់ប្រភេទវ៉ាក់សាំង Admin សុំសួរទៅកាន់បងប្អូនស្រីៗ ១សំណួរ ២សំណួរសិនថា តើរាល់ថ្ងៃនឹងក្នុងខ្លួនបានទទួលវ៉ាក់សាំងអ្វីខ្លះហើយ? តើវ៉ាក់សាំងដែលចាក់នោះ គ្រប់ចំនួនទៅតាមក្រុមគ្រូពេទ្យកំណត់ដែរទេ?
សម្រាប់មនុស្សស្រីប្រសិនបើនិយាយពីវ៉ាក់សាំងចាក់ អាចនឹងត្រូវការច្រើនប្រភេទខុសពីបុរសៗ ហើយប្រសិនជាវ៉ាក់សាំងទាំងនោះ ត្រូវតែចាក់ទៅតាមកាលកំណត់ត្រឹមត្រូវជាមួយនឹងក្រុមគ្រូពេទ្យឯកទេសថែមទៀត បើមិនដូច្នេះទេ អាចនឹងត្រូវចាក់សារដើមឡើងវិញ ដើម្បីបានប្រសិទ្ធិភាពពីវ៉ាក់សាំងទាំងនោះ។ ខាងក្រោមនេះ ជាប្រភេទវ៉ាក់សាំង ៣សំខាន់ៗដែលស្ត្រីគ្រប់រូបគួរតែមាននៅក្នុងខ្លួន និងចាក់ឱ្យគ្រប់ចំនួនផងដែរ៖
១. វ៉ាក់សាំងតេតាណូស៖ វ៉ាក់សាំងតេតាណូស (Td vaccine) ជាប្រភេទវ៉ាក់សាំងដែលមានមុខងារវ៉ាក់សាំង Td អាចការពារជំងឺតេតាណូស (តេតាណូសតាមរយៈការវះកាត់ ឬមុតរបួសផ្សេងៗ) និងការពាររោគខាន់ស្លាក់ផងដែរ។
វ៉ាក់សាំងប្រភេទនេះ គេចាក់ទៅលើស្ត្រីមានអាយុចន្លោះពី១៥-៤៤ឆ្នាំ ចាក់៥ដង ទៅតាមការកំណត់របស់ក្រុមគ្រូពេទ្យបង្អែក និងត្រូវចាក់បន្ថែមនាក្នុងអំឡុងពេលមានផ្ទៃពោះ។
២. វ៉ាក់សាំងការពារមហារីកមាត់ស្បូន (HPV)៖ វ៉ាក់សាំង HPV ជាប្រភេទវ៉ាក់សាំងដែលមានសមត្ថភាពការពារមហារីប្រព័ន្ធបន្តពូជ និងជំងឺសិរមាន់ ប្រសិទ្ធិភាពរបស់វាអាចការពារបានរហូតទៅដល់ 90% ឯណោះ។ សម្រាប់ដំណាក់នៃការចាក់វ៉ាក់សាំង HPV ត្រូវបានគេគិតទៅតាមអាយុ និងមានប្រសិទ្ធិភាពកាន់តែខ្ពស់នៅពេលបានចាក់គ្រប់នៅក្នុងវ័យក្មេង៖
- អាយុ ៩-១៤ ឆ្នាំ ចាក់២ដង (០,៦-១២ ខែ) បានន័យថា ចាក់លើកទី២ គឺចន្លោះពេល ៦ទៅ ១២ខែ ក្រោយពីចាក់លើកទី១។
- អាយុលើសពី ១៤ឆ្នាំ ត្រូវចាក់៣ដង (0, ១-២, ៦ខែ) បានន័យថា លើកទី២ គឺចាក់ចន្លោះ១ទៅ ២ខែ ក្រោយចាក់លើកទី១ ចំណែកលើកទី៣ គឺចាក់៦ខែក្រោយពីលើកទី ១។
៣. វ៉ាក់សាំងការពាររលាកថ្លើមប្រភេទB៖ ប្រភេទវ៉ាក់សាំងនេះ សម្រាប់មនុស្សស្រីក៏ចាំបាច់ត្រូវចាក់ឱ្យបានគ្រប់ផងដែរ ដើម្បីហានិភ័យប្រឈមនឹងការកើតជំងឺរលាកថ្លើមB ទៅពេលខាងមុខ និងក្នុងលក្ខខណ្ឌធ្វេសប្រហែសណាមួយ។ វ៉ាក់សាំងប្រភេទតម្រូវឱ្យចាក់៣ដង ទៅតាមរយៈពេលដែលក្រុមគ្រូពេទ្យកំណត់ដូចគ្នា។
យ៉ាងណាមិញ ទាក់ទិនទៅនឹងប្រធានបទវ៉ាក់សាំង ចង់បញ្ជាក់បន្ថែមទៅកាន់បងប្អូនដែរ សម្រាប់សុខភាពមនុស្សស្រីមិនមានតែវ៉ាក់សាំងទាំង៣ខាងលើនេះទេ នៅមានវ៉ាក់សាំងផ្សេងៗទៀតដែលត្រូវចាក់បន្ថែមដើម្បីការពារកោសិការាងកាយតាមផ្នែកផងដែរ។ ប្រសិនបជាបងប្អូនចង់ដឹងកាន់តែច្បាស់ពីអំពីប្រភេទវ៉ាក់សាំងបន្ថែម អាចសួរនាំបានជាមួយនឹងក្រុមគ្រូពេទ្យបង្អែក មន្ទីរពេទ្យតូច ធំ ឬនៅតាមគ្លីនិកក៏បានដូចគ្នា៕