១. ពិបាកដកដង្ហើម ឬដកដង្ហើមខ្លីៗ៖ បើអ្នកដកដង្ហើមលឿន ឬមានអារម្មណ៍ថាអត់ខ្យល់ វាអាចជាសញ្ញាផ្លូវដង្ហើមមានបញ្ហា ឬសួតកំពុងរងរបួស។ ហើយប្រសិនបើអ្នកមានអាការៈបែបនេះ សូមកុំទិញថ្នាំលេបខ្លួនឯងដោយមិនទាន់ទទួលបានការត្រួតពិនិត្យឱ្យបានច្បាស់លាស់ ត្រូវទៅជួបគ្រូពេទ្យឱ្យបានឆាប់បំផុត ដើម្បីជៀសវាងការខូចខាតកាន់តែធ្ងន់ធ្ងរដល់សួត ដែលអាចនាំទៅដល់ការស្លាប់បាន។

២. ឈឺទ្រូង ឬឈឺពោះប្លែកៗ៖ ការឈឺទ្រូងជាមួយនឹងការដកដង្ហើមពិបាក អាចបង្ហាញថា អ្នកកំពុងរងជំងឺរលាកសួត ឬបញ្ហាសរសៃឈាមបេះដូង។ ប្រសិនបើអ្នកមានរោគសញ្ញាដូចជា កម្ដៅឡើងខ្លាំង ឈឺក្បាល ឈឺសាច់ដុំ ស្រវាំងភ្នែក ឬស្បែកស្លេក នោះអាចជាសញ្ញាដែលត្រូវទៅពិនិត្យបន្ទាន់។ ក្នុងករណីអ្នកមិនបានអើពើឬចេះតែពន្យាពេលមិនទៅទទួលការព្យាបាលទេ អាចបណ្តាលឱ្យសម្ពាធឈាមធ្លាក់ចុះ បេះដូងខ្សោយ ហើយអាចគំរាមកំហែងដល់ជីវិត។

៣. វិលមុខ ច្របូកច្របល់ ឬស្មារតីមិនប្រក្រតី៖ ប្រសិនបើអ្នកមានអាការៈវិលមុខ ឬស្មារតីមិនស្រួល វាអាចបង្ហាញថាមេរោគបានប៉ះពាល់ដល់ប្រព័ន្ធប្រសាទកណ្តាល។ វាអាចជាសញ្ញានៃជំងឺរលាកខួរក្បាលដែលទាក់ទងនឹងជំងឺផ្តាសាយ។ រោគសញ្ញាទាំងនេះគួរឱ្យប្រុងប្រយ័ត្នខ្លាំងណាស់ ព្រោះអាចបណ្តាលឱ្យស្លាប់បាន ប្រសិនបើមិនព្យាបាលទាន់ពេលវេលា។

៤. នោមតិច ឬមិននោមសោះ៖ ខ្វះដជាតិទឹកគឺជារឿងជាប់ទាក់ទងជាមួយជំងឺផ្តាសាយដូចគ្នា។ បើអ្នកមានអាការៈគ្រុនក្តៅ បែកញើស ក្អួត ឬរាគ យូរពេក វាអាចធ្វើឱ្យរាងកាយបាត់បង់ជាតិទឹកយ៉ាងធ្ងន់ធ្ងរ។ ប្រសិនបើអ្នកចាប់ផ្តើមមិននោមសោះ ឬនោមតិចខ្លាំង ត្រូវទៅពិនិត្យបន្ទាន់ ដើម្បីទទួលបានជាតិទឹកឱ្យបានសមស្របសម្រាប់រាងកាយ ហើយក៏អាចដឹងពីមូលហេតុពិតប្រាកដដែលធ្វើឱ្យយើងនោមតិច ឬមិននោមនេះផងដែរ។

៥. ឈឺសាច់ដុំ ឬឈឺសន្លាក់ធ្ងន់ធ្ងរ៖ ជំងឺផ្តាសាយធម្មតាអាចបណ្តាលឱ្យឈឺសាច់ដុំបន្តិច ប៉ុន្តែបើការឈឺកាន់តែខ្លាំង ឬបណ្តាលឱ្យមិនអាចធ្វើសកម្មភាពប្រចាំថ្ងៃបាន វាអាចជាសញ្ញាថាប្រព័ន្ធភាពស៊ាំកំពុងរងការវាយប្រហារ។ ដែលអ្នកត្រូវការទៅពិនិត្យឱ្យបានឆាប់ ដើម្បីទទួលបានការព្យាបាលជាក់លាក់ពីគ្រូពេទ្យ មិនគួររង់ចាំឱ្យវាធ្ងន់ជាងនេះទេ។

ដូច្នេះ ការយកចិត្តទុកដាក់លើរោគសញ្ញាទាំងនេះអាចជួយសង្គ្រោះជីវិតអ្នកបាន។ កុំមើលរំលងជំងឺផ្តាសាយថាជា ជំងឺធម្មតា ព្រោះវាអាចវិវត្តទៅជាបញ្ហាធ្ងន់ធ្ងរដល់សួត និងបេះដូង។ ការទៅជួបគ្រូពេទ្យទាន់ពេលវេលា គឺជារឿងសំខាន់ដែលអ្នកត្រូវតែធ្វើព្រោះគ្រូពេទ្យដែលមានជំនាញអាចជួយសង្គ្រោះជិវិតរបស់អ្នកបានទាន់ពេលវេលា ប្រសិនបើអ្នកមានបញ្ហាណាមួយ៕

អត្ថបទដោយ៖ សារួ