ការរួមភេទមានគុណសម្បត្តិ និងគុណវិបត្តិដែរ។ បើអ្នករួមភេទលើសកម្រិតរាល់ថ្ងៃពេកនោះ វានាំឱ្យប៉ះពាល់សុខភាព និងប៉ះពាល់ដល់ដៃគូ។ ជាពិសេសរាល់ថ្ងៃ ធ្វើឱ្យអ្នកបាក់កម្លាំង និងថែមទាំងជម្រុញឱ្យសម្រស់របស់អ្នកចាស់ជាងវ័យខុសពីធម្មតា។ តើអ្នកគួររួមភេទមួយសប្តាហ៍ប៉ុន្មានដងទើបល្អដល់សម្រស់និងគេងលក់ស្រួល?
តាមលោកវេជ្ជបណ្ឌិត David Weeks នៃមន្ទីពេទ្យ Royal Edinburgh បានឱ្យដឹងថា បើដៃគូត្រូវតែរួមភេទឱ្យបាន៣ទៅ៤ដងក្នុងមួយសប្ដាហ៍ គឺជួយអស់ស្រ្តេស អស់ពីភាពតានតឹង ដើម្បីលើកសម្រស់របស់អ្នកក្មេងជាងមុន១០ឆ្នាំឯណោះ។ លោកវេជ្ជបណ្ឌិតបានបន្តថា ការឡើងឋានសួគ៌បែបនេះ ជម្រុញឱ្យកោសិកាស្បែកមានសំណើម ផលិតកូឡាជែន និងជួយការពារកុំឱ្យស្បែករបស់អ្នកមានភាពជ្រាវជ្រួញ និងជួយឱ្យអ្នកគេងលក់យ៉ាងមានប្រសិទ្ធបំផុត។
តាមសិក្សាមួយទៀតដែលបានចេញផ្សាយនៅក្នុងខែមករា ឆ្នាំ ២០១៥ នៅក្នុង American Journal of Cardiology បានរកឃើញថា ស្រ្តេសនេះជាមូលហេតុនាំសម្រស់ចាស់ជាងវ័យលឿន និងបញ្ហាគេងមិនលក់។ ហើយសម្រាប់បុរសគួររួមភេទ ២ទៅ ៤ដងក្នុងមួយសប្តាហ៍កុំឱ្យបាក់កម្លាំង និងជួយគាត់គ្មានស្រ្តេសហើយនាំឱ្យមានហានិភ័យតិចចំពោះជំងឺសរសៃឈាមបេះដូង ជំងឺដាច់សរសៃឈាមខួរក្បាល ល្អជាងអ្នករួមភេទម្តងក្នុងមួយខែ ឬតិចជាងនេះ។
ហើយតាមលោកវេជ្ជបណ្ឌិត Xenos Mason ជាអ្នកឯកទេសខាងសរសៃប្រសាទសុខភាព Sutter ឯកទេសនៃការគេង និងជាស្ថាបនិកនៃ Sehatu Sleep នៅភាគខាងជើងរដ្ឋកាលីហ្វ័រញ៉ាបាននិយាយថា គូស្នេហ៍គួរតែរួមភេទឲ្យបាន៣ទៅ៥ដងក្នុងមួយសប្តាហ៍ជួយឱ្យអ្នកឆាប់ងងុយគេងដោយហេតុថា អរម៉ូនអុកស៊ីតូស៊ីន ដែលមានឈ្មោះហៅក្រៅថា "អរម៉ូននៃក្តីស្រលាញ់" បានបញ្ចេញក្នុងពេលរួមភេទដែលអាចជួយរក្សាវ័យរក្សាសម្រស់ និងគេងលក់ដោយស្ងប់ចិត្តជាងមុនផងដែរ។
សូមបញ្ជាក់ផងដែរថា ការលើកឡើងនូវពាក្យពេចន៍ខាងលើនេះមិនមែនជំរុញឱ្យនរណាម្នាក់ប្រព្រឹត្តរឿងមិនគប្បីដែលខុសក្រមសីលធម៌នោះទេ ផ្ទុយទៅវិញការលើកឡើងនេះគ្រាន់តែជាការចែករំលែកនូវចំណេះដឹងថ្មីសម្រាប់ដៃគូ និងប្តីប្រពន្ធតែប៉ុណ្ណោះ ដែលអាចទទួលបានគុណប្រយោជន៍ពីការរួមភេទនេះ៕ អត្ថបទដោយ៖ ទ្រ សុភាព