បើអ្នកព្យាយាមសរសើរខ្លួនឯងថា សេចក្តីល្អព្រោះតែមេត្តាធម៌ ហើយតម្លៃជីវិតស្ថិតលើអ្នកជាអ្នកកំណត់តម្លៃឱ្យ ពេលអ្នកប្រព្រឹត្តបែបនេះ ផលចេញមកគឺក្តីសុខ។ សេចក្តីល្អខាងក្នុងមានតម្លៃធំធេងជាងរូបសម្បត្តិខាងក្រៅឆ្ងាយណាស់។ ពេលអ្នកគិតតាមររបៀបនេះ ចិត្តរបស់អ្នកទទួលបានសន្តិភាព ទោះបីគ្មានគេមើលមិនឃើញពីតម្លៃរបស់អ្នកក៏ដោយ។ តាមព្រះពុទ្ធសម្តែងថា ក្តីសុខរបស់មនុស្សកើតចេញពីខាងក្នុងចិត្ត”។ ពេលអ្នកចេះពេញចិត្តនឹងខ្លួនឯង ជីវិតអ្នកនឹងបានក្តីសុខ។

អ្នកមិនគួរចុះទុនក្នុងការចំណាយពេលវេលា និងកម្លាំងទៅលើបុគ្គលណាម្នាក់ឱ្យតម្លៃរូបសម្បត្តិខាងក្រៅធំជាង សំខានជាងសេចក្តីល្អពីខាងក្នុងចិត្តគំនិត វិធីគិត និងស្មារតីនោះទេ។ ព្រោះរបស់ខាងក្នុងរបស់អ្នកទាំងនេះ នាំឱ្យជីវិតរបស់អ្នកមានក្តីសុខពិតប្រាកដ។ ពេលអ្នករស់នៅជាមួយតម្លៃខាងក្នុង ចេះពេញចិត្តលើខ្លួនឯង មានក្តីស្រឡាញ់ជាមួយជីវិតរបស់ខ្លួន និងពង្រឹងស្មារតីរៀនសូត្រជាបប្រចាំថ្ងៃនោះ ជីវិតរបស់អ្នកកាន់តែប្រមូលក្តីសុខច្រើនឡើងក្នុងផ្លូវចិត្ត។ លម្អពីខាងក្រៅគ្មានអ្វីលើសពីការបំពេញចិត្តទៅលើតម្រូវការខាងក្រៅនោះទេ។ មានតែមនុស្សល្អទេ ទើបធ្វើឱ្យអ្នកដទៃមានបីតិសោមនស្សក្នុងចិត្ត គំនិត និងស្មារតីបាន។

អ្នកត្រូវចាំថា កាយរបស់យើងមានការផ្លាស់ប្តូរ តែការលម្អខាងក្នុងនាំអ្នកបន្តដំណើរទៅក្តីសុខពេញមួយជីវិត។ នេះជាគុណតម្លៃរបស់អ្នក។ វាជាហេតុផលដែលថា ហេតុអ្វីទើបការចំណាយពេលទៅលើការបណ្តុះទម្លាប់ល្អៗគឺជារឿងសំខាន់។ ព្រោះទម្លាប់នាំចិត្តរបស់អ្នកមានក្តីសុខ។ ហៅថា ចិត្តមានវិន័យ៕ អត្ថបទដោយ៖ ទ្រ សុភាព