យោងតាមសារព័ត៌មាន Daily Mail បានរាយការណ៍ពីការសិក្សាមួយនៅប្រទេសកាណាដា ដែលធ្វើទៅលើសិស្សនិស្សិត និងមនុស្សពេញវ័យចំនួនជាង ៤០០ នាក់។ អ្នកស្រាវជ្រាវបានឃើញថា សមត្ថភាពផ្តោតអារម្មណ៍របស់អ្នកចូលរួមកើនឡើង ខួរក្បាលរបស់ពួកគេដូចមនុស្សដែលមានអាយុតិច ជាងអាយុបច្ចុប្បន្នរបស់ពួកគេដល់ទៅ ១០ឆ្នាំ។ ជាងនេះទៅទៀត ៩០% នៃអ្នកចូលរួមបានរាយការណ៍ថា សុខភាពផ្លូវចិត្ត និងអារម្មណ៍សុខុមាលភាពរបស់ពួកគេបានប្រសើរឡើងផងដែរ។ 

អ្នកស្រាវជ្រាវបានរកឃើញថាបន្ទាប់ពីពួកគេបានអនុវត្តការបិទអ៊ីនធឺណិតទូរស័ព្ទ វាជាឱកាសឱ្យពួកគេអាចចំណាយពេលច្រើនក្នុងការជួបមុខមនុស្សពិតៗ អាចចំណាយពេលជួបជុំគ្រួសារ មានពេលធ្វើលំហាត់ប្រាណ និងចូលរួមសកម្មភាពផ្សេងៗ។ ការផ្លាស់ប្ដូរទម្លាប់ទាំងនេះជួយឱ្យខួរក្បាលមានភាពស្រស់ថ្លា ស្ងប់ស្ងាត់ និងជំរុញដល់ការគិតឱ្យកាន់តែមានប្រសិទ្ធភាពជាងមុនផងដែរ។  

តើហេតុអ្វីបានជាការបិទអ៊ីនធឺណិតជួយឱ្យខួរក្បាលស្រស់ថ្លា? ព្រោះនៅពេលដែលមនុស្សមិនភ្ជាប់អ៊ីនធឺណិត ពួកគេនឹងមានពេលសម្រាកខួរក្បាល ចូលរួមសកម្មភាពបន្ថែមជាមួយមនុស្សជាទីស្រលាញ់ និងកាត់បន្ថយការទទួលព័ត៌មានលើសកម្រិត។ វាផ្តល់ឱកាសឱ្យខួរក្បាល “ស្ដារឡើងវិញ” និងកែលម្អសមត្ថភាពក្នុងការផ្តោតអារម្មណ៍។ អ្នកជំនាញថែមទាំងបញ្ជាក់ថា ការប្រើទូរស័ព្ទញឹកញាប់អាចប៉ះពាល់ដល់ស្បែក បង្កឱ្យកើតស្នាមជាំខ្មៅលើស្បែក និងពន្លឿនដល់ភាពចាស់ជាងវ័យផងដែរ។

យ៉ាងណាក៏ដោយយើងមិនអាចបដិសេធបានទេថា ទូរស័ព្ទពិតជាសំខានក្នុងការស់នៅប្រចាំថ្ងៃ ប៉ុន្តែក្នុងករណីនេះអ្នកអាចប្រើវាបានក្នុងពេលដែលចាំបាច់ដូចជា ពេលធ្វើការងារ ដើម្បីស្វែងរកព័ត៌មាន ឬសម្រាប់ការទំនាក់ទំនង តែបើមិនមានអ្វីចាំបាច់ទេអ្នកគួរតែផ្អាកឬបិទអ៊ីនធឺណិតចោល ដើម្បីជៀសវាងការរំខាន និងការទាក់ទាញដោយព័ត៌មានដែលមិនចាំបាច់។ 

បិទអ៊ីនធឺណិតទូរស័ព្ទពេលចូលគេង ដើម្បីឱ្យខួរក្បាលសម្រាកបានពេញលេញ។ ទុកទូរស័ព្ទឱ្យឆ្ងាយពីខ្លួន នៅពេលធ្វើការដែលត្រូវការផ្តោតអារម្មណ៍។ ជំនួសឱ្យពេលមើលអេក្រង់ ដោយការទៅជួបមុខមនុស្សពិត ធ្វើសកម្មភាពខាងក្រៅផ្ទះ ឬចំណាយពេលវេលាជាមួយអ្នកដែលអ្នកស្រលាញ់ វានឹងជួយឱ្យអ្នកអាចបង្កើតអនុស្សាវរីយ៍ល្អៗសម្រាប់ជីវិត។ 

ការលេងអ៊ីនធឺណិតនឹងមិនអាក្រក់ទេ ប្រសិនបើយើងដឹងពីរបៀបប្រើប្រាស់វា។ ប៉ុន្តែការប្រើវាច្រើនពេកអាចធ្វើឱ្យខួរក្បាលនិងរាងកាយយើងហើយនឿយ។ ការបិទអ៊ីនធឺណិតជាប្រចាំមិនត្រឹមតែជួយឱ្យអ្នកស្ងប់ចិត្តនិងគេងលក់ល្អប៉ុណ្ណោះទេ ប៉ុន្តែវានឹងជួយឱ្យខួរក្បាលរបស់អ្នក “នៅក្មេងជាងវ័យ” ដូចជាការធ្វើឱ្យជីវិតមានភាពស្រស់ថ្លាម្ដងទៀត៕

អត្ថបទដោយ៖ សារួ