ពេលខ្លះបុរសមិនសូវជាចាប់អារម្មណ៍ប៉ុន្មានទេ រឿងពាក់ខោក្នុងឬពាក់ខោទ្រនាប់នេះ។ តាមការសិក្សាជាច្រើនបានចុះផ្សាយថា បុរសៗ ពាក់ខោទ្រនាប់រឹតតឹងខ្លាំងជាប្រចាំថ្ងៃនោះ វានឹងជះឥទ្ធិពលដល់ការរំខានដល់លិង្គឬប្រដាប់បន្តពូជរបស់បុរស ហេតុផលចម្បងមកពីវាហប់ក្តៅជាហេតុធ្វើឱ្យបរិមាណ និងគុណភាពមេជីវិតបុរសមានការធ្លាក់ចុះ បានធ្វើឱ្យបុរសៗ ពិបាកមានកូននៅពេលក្រោយ។
យោងតាមគេហទំព័រ the Guardian បានចុះផ្សាយថា លោកវេជ្ជបណ្ឌិត Sami Almusawa នាយកផ្នែកវេជ្ជសាស្រ្ត និងអ្នកប្រឹក្សាការមានកូននៅគ្លីនិក Plan Your Baby telehealth និយាយថា បុរសៗ ដែលពាក់ខោទ្រនាប់តឹងជាប្រចាំថ្ងៃអាចបង្កើនសីតុណ្ហភាពដល់ថង់ពងស្វាស ហើយវាប៉ះពាល់អវិជ្ជមានដល់ការផលិតមេជីវិតឈ្មោល និងចលនាមេជីវិតកាន់តែខ្សោយកម្លាំង។ មានការសិក្សាមួយចំនួនបានរកឃើញថា ការស្លៀកខោក្នុងរឹតតឹងខ្លាំងបែបនេះ បានកើនកំដៅដល់លិង្គដូចជាការងូតទឹកក្តៅ ឬសូណា វាអាចបង្អាក់ដល់ការផលិតមេជីវិតឈ្មោល។ ការផលិតមេជីវិតស្ពែម៉ាតូហ្សូអ៊ីត វាទាមទារឱ្យមានសីតុណ្ហភាពទាបជាងរាងកាយទាំងមូល ប្រមាណជា ៣ទៅ៤អង្សា។
យ៉ាងណាក៏ដោយ ផលប៉ះពាល់ពាក់ខោក្នុងនេះ វានៅតែមានតិចតួចបើប្រៀបធៀបទៅនឹងកត្តាផ្សេងទៀត ដូចជារបៀបរស់នៅផឹកស្រា របបអាហារមិនល្អ និងការជក់បារីជាដើម។ ការប្តូរខោទ្រនាប់រាងធូររលុងវាបានផ្តល់អត្ថប្រយោជន៍ដល់សុខភាពមេជីវិតឈ្មោល ហើយមិនចាំបាច់ភ័យព្រួយការពិបាកមានកូននោះទេ។ ការពាក់ខោក្នុងរលុងៗ ជាដោះស្រាយល្អបំផុតសម្រាប់បុរស។ ហើយពេលយប់បុរសៗ គេងដោយមិនចាំបាច់ស្លៀកពាក់ខោក្នុងកាន់តែល្អដល់លិង្គ ហើយធ្វើឱ្យអ្នកគេងលក់ស្រួលផងដែរ៕ អត្ថបទដោយ៖ ទ្រ សុភាព